Read Northern Rengma Naga AYENZHÜNENG 16 Bible Online

AYENZHÜNENG 16 - Northern Rengma Naga bible

AYENZHÜNENG 16

¹ “Abib sha wi Shhukeya Kho tsü sa nu Apvüwa nthu Nyiza kinyikülo; tsü sha wi aghaja kesü ma Ejipt wina nthu khushiyale.

²Kekinyipen kesü witsü wa nu ciwi Shhukeya Kho tsse ghena nthu khaghaneni nyelela amesüsi kesü pathi pi Apvüwa nthu Nyiza tsü kinyilo.

³Nthu na atsse tsü kedsa wi azimi pi kechi mesa ndsala. Nthu na kaghajila Ejipt teshi wale keben wi kesa ti nthu na ghanan tagü azimi pi nkechi mesa dsaben. Amesa pi ketizen kesa mesa le khi keten ha dsalo, nu nthu hang keben chu nthu na ketizen kesa pen Ejipt wina shhugho keya tsathang tsü meshen benle kesalina.

⁴Nthu yyiwi ghanan tagü anyi kesüla ma jjen wi azimi pi nthengla; nu atsathang atuwa shitawa wi asahang kepathi sa tsü tsü ghaja dsakhi nsathu yishü.

⁵“Shhukeya Kho ghena sahangthu tsüpi kekinyipenwa witsü khe Apvüwa nthu Nyiza na pi nthu cü keten yyiwi tsü apen kepa wi npathila. Nthu na Ejipt keteshi tsathang witsü aghani du keten wi ha salo.

⁷Asa tsüpi güya nu kekinyipenwa wi tsü dsalo; nu ghanenwa wina ajjen wi gho.

⁸Tsaseng wi ghanan tugho tsü nthu na azimi pi nkechi mesa dsaben, nu tagü tsathang wi Apvüwa nthu Nyiza kinyile kesa ghena saghuya, nu tsü tsathang wi kekuli mangla nsala.

⁹“Nthu na alli wwi keshhu nten na hapta tagü siya,

¹⁰nu Matheükedhi Kho sapi Apvüwa nthu Nyiza kinyikülo; ma sawegü pi nthu kecü qei wina kenenkunong kekinyi sengho ma cülo.

¹¹Nthu tsangathu, nthu maghathu, nu nthu nyunuti wi hang keben Levi nyithu, asangthu, maghamaghangthu, nu denyilethu gweghe Apvüwa ketenpen tuwi anonghelo. Kekinyipenwa witsü ha salo.

¹²Nthu na ayenkhukechi hathu ha nieya metsilo; nthu na Ejipt wi nyu nssümagha kesa tsü nmalila.

¹³ “Nthu na asu tsüdi ghacengya nu kemeshentsse bi tsüdi misügükeya seng wi ghanan tagü Kelishu Kho tsü salo.

¹⁴Nthu tsangathu, nthu maghathu, nu nthu nyutithu wi hang keben Levi nyithu, asangthu, maghamaghangthu, nu denyilethu ssinu anonghelo.

¹⁵Kekinyipenwa witsü ghanan tagü akho ha sapi Apvüwa nthu Nyiza kinyikülo. Anonghelo, kepaghenanye Apvüwa na sawegü pi nthu llikewwi nu kekuli wi chicüdha.

¹⁶“Nthu mizzatenti wi npvüzathu tsüdila amapi kesü wi kecheng tughu Shhukeya Kho, Matheükedhi Kho, nu Kelishu Kho tsüwi kekinyi pen kesü witsü Apvüwa kinyi ghoben. Anyi kesüsü ma saya kemehai wi

¹⁷Apvüwa nthu Nyiza na sawegü pi ma kecü qei wina aju sengho ben.

¹⁸“Apvüwa nthu Nyiza na pi nthu kecü anyuti tsüdi wi pendhenyi nu kedinyithu kessi yalo. Anyi hathu ha nyu nankepapa nsala ajüh kaghakhipen.

¹⁹Mathu na ajüh kaghakhi wi nkemeshon nu nankepapa sa nben; nu mathu na alaa ya nben, kepaghenanye alaa tsüna anyi kemetsawa nu atsentsawa nyon sapi nmu thsüla nu mathu ya kesazzi wi südhe chicüden.

²⁰Keshüthangla ketsatan nu kemeshonwa ketan salo, isanu Apvüwa nthu Nyiza na ayyi pi nthu cü keben tsü yaya nu ciwi hangki benyale kesalina.

²¹ “Nthu na Apvüwa nthu Nyiza ghena kekinyipen kesa wi achan pi acenpvü nzawa Asherah tsi sapi tsü kete wi nchila.

²² Nu tsikezhü kekinyi ghena alon ducü la nzhüla; Apvüwa na tsüthu tsü nanmeghüden.”