Read Northern Rengma Naga AYENZHÜNENG 17 Bible Online

AYENZHÜNENG 17 - Northern Rengma Naga bible

AYENZHÜNENG 17

¹“Amesüsi nyelela khaghaneni nyu ghojünkeya keben pi ahhansha sapi Apvüwa nthu Nyiza ncüla; Apvüwa na ha nanmeghüden.

²Keujüla nthu nyuti kesü wi npvüza nyelela nza pahan na Apvüwa tuwi sami nu ma cenkethenjüh tsü pakhhia

³ tsüna Apvüwa yenkhukechi tsü matangla acenpvü kepathu nyelela aghani, asha, ghotsithu kinyi nu kekuli sawadha le kesa zaya.

⁴Nthu na ajühjüwa tsüti kesa zaya lethu, ccügwencüka kina nanlo. Nu ntsakhiwa Israel jawi pala nkemehai hati sabenla lethu,

⁵anyi tsüwa ssi shhula anyuti na ameiwa alon pi kecenthilo.

⁶ Isala ma keshun jüh chüza keni nyelela kecheng muya ccüla ma pi shü thsülo.

⁷ Chüzathu na atuwa sala alon pi anyi tsüwa kecen, nu tsaseng wi ccüna anyi kepathu pi ma kecen thsü; hatinu nthu jawi nkemehaiwa tsü sametha ben.

⁸“Pala pahan ghena nthu pendhethu na südhele kesa dhu mtsüben, tsüthu tsüna kicennali, mesa-mena kesa, nyelela anyi kepathithu ghena saya mehai. Hati ha sa lethu apen kesü Apvüwa nthu Nyiza na kessikeya witsü walo,

⁹nu ajjügi tsüpi Levi nyi keqhaikedithu nu pendhenyi tsü tsüwi kekuli sa kebenwa tuwi chi nu mathu ya tsü südhe thsülo.

¹⁰Mathu na ajüh südhekeya tsü khuchithu nthu na mathu kekhi tsüti salo.

¹¹Mathu na südhekechi tsü yaya nu mathu kecükegwethu maben nie yalo.

¹²Anyi kesü le kesü lela pendhenyi nu keqhaikedi kekuli sa kebenwa jüh nkinala lethu ma pi shü thsülo; hatinu nthu na Israel jawi nkemehaiwa tsü khupiaben.

¹³Tsaseng wi anyi tsüdila tsü zaya nu messi; nu thola kekuli hati ha sale kesa messiaben.

¹⁴ “Apvüwa nthu Nyiza na ayyi pi nthu cü keben tsü yaya nu ciwi benkeya seng wi nthu kevü mizzatentithu ti kadimiwa kesü senle kesa südhe yaben.

¹⁵Nthu na anyi kessi pi kadimi sa ketenwa tsüna Apvüwa na kessikeya nyi pi sa metsilo. Ma nthu nyi kesü nsathu yishü; asang kesü pi nthu kadimiwa nsala.

¹⁶ Kadimiwa na ma süpahizi ghena goru kejon pi theng nben, nu ma anyi kesun pi Ejipt wi goruthu shü wa thsü nben, kepaghenanye Apvüwa na ma nyithu wi mathu na khiela ciwi wa neng nben khitheng.

¹⁷ Kadimiwa na ma wubvü kejon ben nben, kepaghenanye tsüwa tsüna ma sapi Apvüwa wina kheneng bvü thsüaben; nu ma rükatssü nu suna pi ma sapi keban sa nben.

¹⁸Ma khathansha kadimiwa saya khe Anyiza yen nu kesansijühthu Levi nyi keqhaikedithu na pi ketheng tsü zhüpi lesüshen kesü sapi theng ben.

¹⁹Ma Apvüwa kinyikü kesa chüya nu ciwi kekhi tsüdi nie kaketsü sayale kesalina lesüshen hapi ma kete wi chi nu kahang chu tsü siben.

²⁰Hawa ha ma sapi ma Israel nyi kepa miwi mehaiki le sa thsü nben, nu ma khiela Apvüwa yenkhukechithu n-niela sa thsü nben. Isalethu ma amapi kejon kadisa, nu ma shicübvüghathu na abvüye kejon wila Israel jawi kekhang senben.”