Read Northern Rengma Naga AYENZHÜNENG 18 Bible Online

AYENZHÜNENG 18 - Northern Rengma Naga bible

AYENZHÜNENG 18

¹“Keqhaikedishi Levi mizza ha Israel jawi mathu shei ayyi muya nben; isala mathu na nyu keben khukechi nu ahhansha sapi Apvüwa kekinyi tsü dsa nu hangben.

² Mathu na amizza kepathu ti ayyi ben nben; Apvüwa na khishiketheng ti Apvüwa ghena keqhaikedithu kesawa tsüna mathu shei.

³“Khathansha wi amesüsi nu khaghaneni pi ahhansha sa khe ma kanku, ma hakheng, nu ma pvü tsüpi keqhaikedithu cü.

⁴Asu, kisengtssü, oliv deli, nu assenthsü hathu atuwa tsüpi mathu shei saben.

⁵Apvüwa na nthu mizzathu jawi Levi mizza kessi pi anuphanla ma ghena keqhaikedithu kekuli sa thsü.

⁶“Israel nyuti wi hang keten Levi nyi kesüle kesü lela kekinyipenwa witsü gho mvu lethu gho Apvüwa kinyiya mehai,

⁷nu Levi nyi kepathu ciwi kekuli sa keben ti Apvüwa ma Nyiza ghena keqhaikedi kesü sa kekuli saya mehai.

⁸Ma la keqhaikedi kepathu na atsse mukeya tsü makesü muya, nu ma theghi na mangwa pi ma wi kesunchi khe pi thengya mehai.

⁹“Khathansha wi nthu na Apvüwa nthu Nyiza na ayyi pi nthu cü keben witsü ghoya khe ciwi keben mizzatentithu na nankiqanan kekuli sa keten tsü n-niela.

¹⁰ Nthu tsanga pi nthu kekinyipen miwi anni wi ahhansha nsala; nu nthu nyithu yala kedema kekuli, matsü kepapa ghang nu akezen wwi,

¹¹ nyelela ghaketen cüki khi nu mathu ya keshü ghamuthu ssinu keccüneng tsü nsa thsüla.

¹²Apvüwa nthu Nyiza na anyi nankiqanan kekulithu ha sa ketenthu nanmeghüden, tsalina nthu na atujügüwathu ma ayyi hewi mizzatenti hathu ha jügüshiaben.

¹³ Apvüwa wi jühtsentsa salo.”

¹⁴Tsaseng wi Mosa na khi, “Nthu na wala ayyi yaya keten witsü anyithu na kedema kekulithu sa nu matsü kepapa ghang nu akezen wwi benden, isala Apvüwa nthu Nyiza na nthu ya ha nsa thsü mvule.

¹⁵ Tsüti kesawa nye, ma nthu nyi jawi na hi ti kesa atusenjüh-kechü kesü kesun chicüben, nu nthu na ma jüh kinaben.

¹⁶“Nthu na Sinai Yikha wi gho saghu keben ghanan wi nthu na Apvüwa jühkekhi nkina neng mvu nyelela ma keten nnikeqhe tsü n-ghang neng mvule kesa khi, kepaghenanye nthu na shüabenle kesa messi.

¹⁷Tsalina Apvüwa na hi kiza, ‘Mathu na metsashhu khiechidha.

¹⁸Hi mathu nyi jawi na no ti kesa atusenjüh-kechü kesü kesun chicüden; mangwa nkhithu yishü khe hi ma kizaden, nu ma hi khikechi tsüdi pi anyithu kiza- ben.

¹⁹ Ma inyan wina kekhijüh tsü anyi thowa na n-nie mvula hhaghe khe hi kemeten pi cüden.

²⁰Isala atusenjüh-kechü kesüle kesü lela nmessila hi ma ya khilo nkekhi jüh tsü inyan wina khi lethu ma tsüghena shüaben, nu tsüti atusenjüh-kechü kesüle kesü lela acenpvü kepathu nyan wina kekhiwa la shüaben.’

²¹“Nthu khati nu ajüh tsüwa tsüna Apvüwa wina nghole kesa chüya mehai nu?

²²Keujüla atusenjüh-kechü kesü Apvüwa nyan wina khi nu ma kekhi jüh tsü nsala lethu, tsüna Apvüwa wina kegho jüh nyele. Atusenjüh-kechüwa tsüwa tsüna ma kemeshen wina kekhi, nthu na ma nmessila.”