Read Northern Rengma Naga AYENZHÜNENG 2 Bible Online

AYENZHÜNENG 2 - Northern Rengma Naga bible

AYENZHÜNENG 2

¹ Ithu na kheneng sen Apvüwa na kekhi ti Aqaba yyitssüvü wi kewa len yyikeshü non wi du, nu ithu na matsü kesiela Edom yyishiphon diyyiwa wi keqoedeja wa.

²“Tsaseng wi Apvüwa na hi kizala,

³ithu na matsü kesiela yyishiphon hathu wi keqoedeja wa kesalina ithu na aghawa shulo khi.

⁴ Ma hi kecükegwe hathu pi nthu cülo kiza: ‘Nthu na lenkesie wi nthu shili Esau shicübvüghathu yyi, Edom yyishiphon diyyiwa tsü pvüdhi wa tendha. Mathu na nthu messi ben,

⁵isala nthu na mathu ssinu aghi nsala, kepaghenanye hi mathu yyi meter kesüla pi nthu cü nten. Hi Edom pi Esau shicübvüghathu cüdha.

⁶Nthu na mathu wi kedsakejjü nu atssü shüya mehai.’

⁷“Apvüwa nthu Nyiza na khatila nthu kekuli alentagha wila sawegü pi nthu cü khe tsü meshen yalo. Nthu na ayyikeshü kedi hawi keqoedeja keten wi ma nthu nonccaya. Ma amapi jügha ha chuli nthu ssi benden, nu nthu na nthu nsenthu keyishü tsüdila benya thsüa.

⁸“Tsalina ithu na Elath nu Eziongeber nyunutithu wina Keshü Tssükedone wi kewa len tsü teshi nu apen ketsen wa, nu ithu na aghawa nishu Moab kepeghewa tsü wa.

⁹Apvüwa na hi kiza, ‘Lot shicübvüghathu, Moab nyi tsü nkivvüla nyelela mathu ssinu aghi nsala. Hi Ar nyunuti tsüpi mathu cüdha, nu mathu yyi keula pi nthu cü nten.’”

¹⁰(Kücanyi gei Emim le kesawa tsü na Ar witsü hangden. Mathu na kücanyi gei kepathu Anakim kesie thuthu.

¹¹Mathu la pi Anakim ti Refaim le khiden, isala Moab nyithu na mathu pi Emim le ciden.

¹²Hor nyi na Edom wi hang keten, isala Esau shicübvüghathu na mathu jügüshi, mathu mizzatenti yasa, nu mathu na ciwi hang wa, tsüna Israel nyithu na Apvüwa ayyi pi mathu kecü witsü nkhewi mathu ghinyithu jügüshi kesa ti sa.)

¹³“Tsaseng wi Apvüwa na ithu kekiza ti ithu na Zered Ghaku tsü pvüdhi wa.

¹⁴Hawa ha ithu na Kadesh Barnea teshi nu changha nu tazen mapi. Apvüwa na mathu shüaben le kekhi tsü bvüye wi npvüza aghikesa qo nyi tsüdila shü.

¹⁵Apvüwa na mathu tsüdi npi keyasakhi chu mathu shun.

¹⁶“Mathu tsüdi keshü seng wi,

¹⁷Apvüwa na ithu kiza,

¹⁸‘Nansü nthu na Ar wi kewa len sala Moab yyi pvüdhi waden.

¹⁹Ciwi nthu na Lot shicübvügha Ammon nyithu yyi tetsaki yaben. Mathu nkivvüla nyelela mathu ssinu aghi nsala, kepaghenanye hi ayyi pi mathu cü ketheng tsü keula pi nthu cü nten.’ ”

²⁰(Ayyi hawa ha pi anyi ciwi hang ketenthu nyan Refaim yyi lela khiden; Ammon nyithu na tsüthu pi Zamzummim le ciden.

²¹Mathu na Anakim kesie thuthu. Ciwi mathu na anyi kejon, nu mathu na kekhang gei kesü. Isala Apvüwa na mathu yasa nu Ammon nyithu na mathu yyi yaya nu ciwi hang wa.

²²Apvüwa na Esau shicü Edom nyithu ghena Edom yyishiphon diyyiwa wi hang ketenthu miwi la tsü makesü sa. Ma Hor nyithu yasa nu Edom nyithu na mathu yyi yaya nu ciwi hang wa, nu mathu na khilila ciwi hangben.

²³Anyi Kreta tssümangkehi wina ghola Mediterranean tssükaten yyi witsü hang benden. Mathu na ciwi hang tegüthu Avvim yasa nu mathu yyi tsüdi wa acülawa Gaza nyunuti kecu yaya.)

²⁴Ithu na Moab yyi kepvüdhi seng wi Apvüwa na ithu kiza, ‘Khili lentsen sen Arnon Ghaku pvüdhi wayilo. Hi Heshbon wi Amor kadimiwa Sihon nu ma yyi saghu pi nthu kekhu wi chiaben. Ma ssikesali nu ma yyi nkayalo.

²⁵Nansü nten na hi apen tsüdi wi anyithu sapi nthu messi thsüaden. Nthu nyan teng kechi wi tsüdila messi nu kedheggüben.’

²⁶“Tsaseng wi hi Kedemoth yyikeshü wina nyilo kesun pi keccawa sale kesa jüh hathu sen nu Heshbon kadimi Sihon wi wa thsü:

²⁷‘Ithu ya n-yyi pvüdhi waya thsülo. Ithu na alen nteshila meshonqhe wabenle.

²⁸Ithu na kedsakejjü nu atssü men pi nthu cüben. Ithu na n-yyi pvüdhi wamvu keben ketanle,

²⁹ithu na Jordan Ghaku pvüdhi sen Apvüwa ithu Nyiza na ayyi pi ithu cü keben witsü npi dukeya chu. Esau shicübvügha Edom wi hang kebenthu nu Moab nyi Ar wi hang kebenthu na ithu yala mathu yyi pvüdhi waya thsüle.’

³⁰“Isala kadimi Sihon na ithu ya ma yyi pvüdhi nwa thsü mvula sa. Apvüwa nthu Nyiza na ma leben sapi dhu thsü nu matang, isanu ithu na ma miwi khangya nu ithu khili hang keben ma yyi ha nkaya thsüale kesalina.

³¹“Tsaseng wi Apvüwa na hi kiza, ‘Ghangchilo, hi kadimi Sihon nu ma yyi pi no cüa tendha, wala ma yyi tsü nkaya nu ciwi benyalo.’

³²Sihon na ma nyithu tsüdi ssinu ithu ssikesali le Jahaz nyuti kete wi shhugho,

³³isala Apvüwa ithu Nyiza na ma pi ithu kekhu wi chia, nu ithu na ma, ma tsathu, nu ma nyithu tsüdi pathia.

³⁴Tsü tsüwi ithu na anyuti tsüdi yasa, nu nza, npvüza, nu ghanyithu tsüdi yathia. Thola pi nhang thsü.

³⁵Ithu na asahangthu khuya nu anyutithu wi atsanqaithu tsüdila shuya.

³⁶Apvüwa ithu Nyiza na ithu yala Arnon yyiketijü katen Aroer wi anyuti tsüdi, nu ayyikeshü non wi anyunutiwa, Gilead wi kewa len kecu tsüdi yaya thsüa. Ciwi anyuti khweti kesüla ithu ghena khang mtsü nsa.

³⁷Isala Apvüwa ithu Nyiza na ithu kekiza ti ithu na Ammon nyithu yyi, Jabbok Ghaku ghüsa, yyishiphon diyyiwa wi anyutithu kete wi, nyelela apen kepa wi khiela nwa.”