Read Northern Rengma Naga AYENZHÜNENG 20 Bible Online

AYENZHÜNENG 20 - Northern Rengma Naga bible

AYENZHÜNENG 20

¹“Khathansha wi nthu na nthu ghinyithu ssikesali wa khe mathu gorugarithu, goruthu, nu süpahizi na nthu miwi ji kayi lela mathu nmessila. Apvüwa nthu Nyiza Ejipt wina nthu kekasha keyawa na nthu ssiden.

²Nthu na nyu npi ssikesa wi keqhaikediwa na atu wi shhu nu süpahizi wi khiben,

³‘Israel nyithu, kinalo! Nthu nansü aghiwa tendha. Nthu ghinyithu nmessila nu leben nzzala.

⁴Apvüwa nthu Nyiza na nthu ssi waden, nu ma khangkeya pi nthu cüben.’

⁵“Tsaseng wi kedithu na anyithu wi khiben, ‘Hewi anyi pahan na ajjen ketheü sa nu tsü sakemetha nkesa na ben kwe? Isalethu ma ajjen wi wha thsülo. Nyelethu, ma aghi wi shü lethu anyi kepa na ma jjen tsü sametha yaben.

⁶Hewi anyi pahan na kemeshentsse pi shengchi nu ma bi npi laya kwe? Isalethu ma ajjen wi wha thsülo. Nyelethu, ma aghi wi shü lethu anyi kepa na anonkeghe sala kisengtssü tsü sen waben.

⁷Hewi anyi pahan na awubvü yale ajühcen ketheng na ben kwe? Isalethu ma ajjen wi wha thsülo. Nyelethu ma aghi wi shü lethu anyi kepa na ma yale cenketheng nzawa tsü yaya ben.’

⁸“Kedithu na kheneng anyithu wi khiben, ‘Hewi anyi pahan na aghi gheya nu messiben kwe? Isalethu ma ajjen wi wha thsülo. Nyelethu ma anyi kepathu leben yasa ben.’

⁹Khathansha wi kedithu na süpahizi wi ajühkhisha khe azi kesüsü wi benchüthu kessiyalo.

¹⁰“Khathansha wi nthu na anyunuti kesü nkayale wa khe mathu yala atuwa sa nthu kwen wi duya kemehai matsü pi cülo.

¹¹Keujüla mathu na kaghapeng jenka shachi nu nthu kwen wi du lethu, mathu tsüdi nthu nssümagha sa wa nu nthu kekuli saben.

¹²Isala keujüla anyunuti tsüwa wi anyithu na nthu kwen wi du nsamvu lethu, mathu ssikesali le nthu süpahizi pi vüyalo.

¹³Isanu Apvüwa nthu Nyiza na nthu ya anyunuti tsü yaya thsü lethu, ciwi npvüzathu tsüdila pathilo.

¹⁴Isala nthu na nzathu, ghanyithu, asahangthu, nu ciwi pala tsüdila khuya mehai. Nthu na ghinyithu ji tsüdila senya mehai. Apvüwa na tsüpi nthu cüdha.

¹⁵Tsütinu nthu na wa benketen yyi lenkesie wi anyunutithu tuwi tsüti saben.

¹⁶“Isala khathansha wi Apvüwa nthu Nyiza na ayyi pi nthu kecü witsü nthu na anyunutithu nkaya khe kahangli keben tsüdi pathilo.

¹⁷Apvüwa na nthu kekiza ti anyi tsüdi pathitha salo: Hitti, Amor, Kanaan, Periz, Hivi, nu Jebus nyithu.

¹⁸Mathu pathilo, isanu mathu cenpvüthu kekinyi wi pala nankiqanan sa ketenthu tsüdi pi nthu sansi nu nthu sami pi Apvüwa nshun thsüle kesalina.

¹⁹“Nthu na anyunuti kesü nkayale kesalina matsü kesie aghisa wa lela mathu kedsau tonthu nshüchila. Kedsau tsü dsalo, isala ma tonthu meyasala; kepaghenanye ma tonthu tsüna nghinyithu nye.

²⁰Nthu na achan kepa wi shüchi pi anyunuti tsü npi yakeya chu aghapeng saya mehai.”