Read Northern Rengma Naga AYENZHÜNENG 22 Bible Online

AYENZHÜNENG 22 - Northern Rengma Naga bible

AYENZHÜNENG 22

¹“Keujüla nthu na nthu cünyuthu mesü nyelela khaghaneni na kenengca sen nu bvü keten mu lethu, nkechüghe nsala tsü ssineng wa ma cülo.

²Isala keujüla ma pvüwa tsüna alen kesie wi hangden nyelela tsüna thowa ji khe nchü lethu, nthu na tsü ssinu ajjen wi whalo. Ma pvüwa na tsü bhagho lethu tsüpi ma cülo.

³Nthu Israel nyi ji kebhatagha gada, athsümeni, nu pala katsüha muya lela tsü makesü salo.

⁴“Keujüla ncünyuthu gada nyelela amesü na khuli keben muya lethu, nkechüghe nsala ma kiqachi nu asahang tsü ya shagha yathsülo.

⁵“Nza na npvüza thsümeni npvüla, nu npvüza na nza thsümeni npvü lalo; Apvüwa nthu Nyiza na anyi hati kesathu nanmeghü den.

⁶“Keujüla nthu na awa ghacen kesü achanton nyelela ayyi wi ma bvü na ma ghatsü nyelela ma zza ghong keben muya lethu, nthu na ma bvü tsü khuya nsala.

⁷Nthu na ma zza khuya lela ma bvü ya bvü thsü nsathu yishü, isalethu nthu na kesie hang nu mehai yaben.

⁸“Nthu na ajjen ketheü kesü sa lethu, ajjenmili kevü tsüpi chi metsilo. Isanu keujüla anyi pahan ciwi na khuli wa kecenthi lela nthu na akhhi pvüya nben.

⁹ “Alli kesü wi asu lenkeni pi kemeshentsse gweghe n-yangla; isalethu nthu na kemeshentsse bi nu yangdsaketen kepa wi mukeya lela sen thsü nben.

¹⁰“Amesü süpon pi gada kesü manyi gweghe alli nchhü thsüla.

¹¹“Assenthsü pi linen manyi kedegho tsü n-mephila.

¹² “Nthu thsümeni katen mejü wi ma ladanthu pi degü gholo.

¹³“Keujüla npvüza kesü na nza kesü yaya nu ashiseng wi ma n-nenla ma teshia le sa.

¹⁴Tsalina ma milikemesa khipi nzawa shun, nu manyi benkewa tsüwi ma pvünyimetha nbenla le khipi ma kimenni.

¹⁵“Keujüla tsüti sa lethu, nzawa bajja na nzawa pvünyimetha le kesa benkewa wekeshithsü wi ajjü kaki keben tsü khuya nu sen wa anyuti wi ccülikesathu kemehu wi ccüca.

¹⁶Nzawa ba na mathu wi khiben, ‘Hi inga pi anyi hawa wi n-nuwa thsü nan khili tsü ma inga meya mvula saben.

¹⁷Ma milikemesa wina manyi benkewa tsüwi ma pvünyimetha nben lale khipi ma shunben. Isala inga na pvünyimetha le chütha kesa benkewa wekeshithsü wi ajjü na kekaki ha ghang chilo!’

¹⁸Isalethu anyuti wi ccülikesathu na awubawa kiccü ben.

¹⁹Mathu na ma wi kedhikejü apisa rükatssü meza khuya nu tsüpi nzawa ba cüaben, kepaghenanye anyi tsüwa na kejüghekeya sengho Israel nzawa miwi chi kesalina. Tsümiwi la ma nzawa tsüpi ma wubvü sa, nu ma hang keben chu nzawa tsü yishaya nben.

²⁰“Isala keujüla ma kekhi tsüna atsentsa nu nzawa na pvünyimetha le kesa chütha kesa nmi lethu,

²¹mathu na nzawa ssi shhula ma ba jjen kedulen wi anyunuti tsüwa wi anyithu na alon pi ma kecenthiaben. Kepaghenanye ma npi n-nukewa ma ba jjen wi hang keben jüwi nyu kepa wi gweghemehai nu kejüghekeya sengho ithu nyi jawi chicü. Hatinu nthu jawi nkemehaiwa tsü samethaben.

²²“Keujüla anyi kesü na anyi kepawa wubvü ssimehai keben muya lethu, manyi qho pi shü thsüaben. Hatinu nthu jawi nkemehaiwa ha samethaben.

²³“Keujüla anyi kesü na anyuti wi nyu na keü ketheng nzawa tsü ssimehai keben muya lethu,

²⁴nthu na manyi ssi shhula anyuti na ameiwa alon pi kecenthilo. Nzawa tsüna shüben, kepaghenanye ma anyuti wi ben lela ma kekiqa ghena magha nchila kesalina. Nu npvüzawa tsü la shüben, kepaghenanye ma nzawa nyu na keü kethengwa tsü ssimehai kesalina. Hatinu nthu jawi nkemehaiwa ha samethaben.

²⁵“Keujüla anyi kesü na ayela wi nza nyu na keü ketheng kesü messameshü lethu, npvüzawa tsü ketan pi shü thsüaben;

²⁶nzawa miwi mangla sa nben, kepaghenanye ma keshü qo kesami nsa. Ha jjügi ha anyi kesü na kepawa ssikesali nu ma pathi kesa tsü makesü.

²⁷Nza nyu na keü kethengwa na ma kekiqa ghena maghachi lela thola gho ma kiqa meyala kesa wi anyi tsüwa na ayela wi ma messameshüa.

²⁸ “Keujüla anyi kesü na nza nyu na keü nketheng kesü messameshü lethu,

²⁹ma shanyili men rükatssü deni pi nzawa ba dhiben, nu nzawa tsüna ma wubvü sa waben, kepaghenanye ma nzawa meten nu ma ssimehai kesalina. Ma hang keben chu khiela nzawa tsü yishaya nben.

³⁰ “Anyi kesüla ma ba wubvü kesüle kesü lela ssimehai nu ma ba nyankenyen keya nmi.”