Read Northern Rengma Naga AYENZHÜNENG 26 Bible Online

AYENZHÜNENG 26 - Northern Rengma Naga bible

AYENZHÜNENG 26

¹“Apvüwa nthu Nyiza na ayyi pi nthu cü keben tsü yaya nu ciwi benkeya seng wi,

² nthu kesüsü alliwwi tegü wi asu pi ashijü kesü wi chiya nu tsü sen nu kekinyipen witsü nwathu yishü.

³Tsü tsüwi keqhaikedi sa kebenwa wi wa nu ma wi khilo, ‘Hi khili Apvüwa iNyiza na ayyi pi ithu cüle ithu bamyithu wi khishiketheng witsü duyadha kesa chüben.’ ”

⁴Keqhaikediwa na nthu kwen wi ashijü tsü khuya nu sen wa Apvüwa nthu Nyiza kekinyipen tuwi chiben.

⁵Tsaseng wi nthu na Apvüwa tuwi ajüh hathu khiben: “Ibamyi na Arameya nyi kesü sala keqoedeja keten ma theghi ssi wa Ejipt wi hang. Mathu na anyi keu ketan ciwi wa, isala mathu na mizzatenti keti kekhang kesü saya.

⁶Ejipt nyithu na ithu metenmesha ntsa sa, nu ithu meten pi nssümagha kekuli sa thsü.

⁷Isanu ithu na magha nu ithu bamyithu Nyiza Apvüwa wi kekiqa khie. Ma ithu hhai zaya nu ithu na ketizenkesa, agükeccü, nu kemeten-kemesha wi keben muya.

⁸Ma kekhang nu kezü keti pi Ejipt wi ithu kekasha ya. Ma azensu nu amankesa kuli, nu pala qhethiketen kesathu sa thsü.

⁹Ma ithu ssi ghola hewi ayyi kemehai nu kinyan hapi ithu cüdha.

¹⁰Tsalina hi khili ma pi hi kecü allikewwi mukeya atuwa ha sen nu Apvüwa wi ghoben le.” “Tsaseng wi Apvüwa tuwi na ashijü tsü pishaya nu ciwi kinyi ben.

¹¹Apvüwa nthu Nyiza na pala kemehai pi nthu nu nthu theghi kecü ghena anonghelo; nu nthu jawi hang keben Levi nyithu nu asangthu ya nthu gweghe anonkeghe kemishu sa thsülo.

¹²“Amapi kechengwa kaghapenla nthu yangdsaketenthu gishü tagha wi kesü tsü khuchi pi Levi nyithu, asangthu, maghamaghangthu, nu denyilethu cülo, isanu azitenti tsüdi jawi la mathu nsenthu keyishü benya thsüle kesalina. Nthu na ha saya lethu,

¹³Apvüwa wi khiben, ‘Gishü tagha wi kesü kemethawa tsü ijjen wina khushitha pi no hi salo kekiza ti hi tsüpi Levi nyithu, asangthu, maghamaghangthu, nu denyilethu cüdha. Hi gishü tagha wi kesü ghena no ayenkhukechi tsü n-niela nyelela mali nsale.

¹⁴Hi anongü keben wi tsü kesüla ndsa; hi keccüna wi nmethala keben wi ijjen wi tsü kesüla nkhushi; nu hi keshü ghena kekinyi kesa wi tsü kesüla nkhuchile. O Apvüwa; hi njüh niedha. No gishü tagha wi kesü ghena khikechi tsü hi tsüdila sadha.

¹⁵Tangwi no kemetha pen wina yasha ghang nu sawegü pi n-nyi Israel cü; nu no ithu bamyithu wi khishi kechi ti ayyi kemehai kinyan pi ithu kecüwa ha miwi la sawegü chilo.’

¹⁶“Nansü Apvüwa nthu Nyiza na ma yenthu tsüdila nieyalo nthu kizaben; tsalina nthu leben tsüdi pi tsüthu nieyalo.

¹⁷Nansü nthu na Apvüwa tsüna nthu Nyiza le khishidha; nthu na ma jühkina, ma yenthu, nu ma kekhithu tsüdila sabenle khishidha.

¹⁸Nansü Apvüwa na ma nthu wi khishiketheng ti nthu pi ma nyithu sayadha; nu ma yenthu tsüdila nieyalo nthu kizaben.

¹⁹Ma nthu sapi ma sakechi mizzatenti kepathu miwi diki cüden, nu nthu na ma nyan keseng, nu kinyikü sengho ben. Ma khishiketheng ti nthu na ma nyithu saben.”