Read Northern Rengma Naga AYENZHÜNENG 27 Bible Online

AYENZHÜNENG 27 - Northern Rengma Naga bible

AYENZHÜNENG 27

¹Tsaseng wi Mosa nu Israel ccülikesathu na anyithu wi khi, “Hi nansü kecükegwe pi nthu cü kebenthu ha tsüdi nieyalo.

² Nthu na Jordan Ghaku pvüdhi sen Apvüwa nthu Nyiza na ayyi pi nthu cü keben wi dukeya ghanan wi nthu na alon keti pahan pi shengya nu tsü miwi mehaitsü nyen kevüliya,

³nu ayen nu kesansijüh hathu tsüdi pi ciwi zhüki yalo. Nthu bamyithu Nyiza Apvüwa na nthu wi khiketheng ti nthu na ayyi kemehai nu kinyan witsü duya,

⁴nu nthu na Jordan khhaka wa benya lethu hi nansü nthu kecükegwe keben ti alon hathu pi Ebal Yikha wi shengya nu tsüthu miwi tsü mehaitsü nyenkevüliya.

⁵ Ciwi amighe tsanqai nsenla alon pi kekinyipen kesü saya,

⁶kepaghenanye nthu na Apvüwa nthu Nyiza ghena kekinyipen kesa tsüna alon nkepakhhi pi saben. Nthu na ciwi ahhanshathu sa nu pi mecangben,

⁷nu ciwi nthu na ahhansha sa nu nthu kecca ghena kekinyi kesa tsü dsa nu Apvüwa nthu Nyiza tuwi anonkeghe saben.

⁸Alonthu tsü miwi mehaitsü nyen ketheng miwi tsü Anyiza yenthu jüh tsüdi pi methasi zhükiyalo.”

⁹Tsaseng wi Mosa nu Levi nyi keqhaikedithu na Israel nyithu tsüdi wi khi, “Israel nyithu, ijühkina kaketsü sachilo. Nansü nthu na Apvüwa nthu Nyiza nyi sayadha;

¹⁰tsalina hi nansü ma yenthu pi nthu cü keben ha tsüdi kina nu nieyalo.”

¹¹Tsaseng wi Mosa na Israel nyithu wi khi,

¹² Nthu na wa Jordan pvüdhi keya seng wi anyithu miwi kesawegü khie keben wi amizza hathu na Gerizim Yikha miwi nganben: Simeon, Levi, Judah, Issakhar, Josef, nu Benjamin.

¹³Nu kishen-keshi khi keben wi amizza hathu na Ebal Yikha miwi nganben: Reuben, Gad, Asher, Zebulun, Dan, nu Naftali.

¹⁴Levi nyithu na ahhai misikhhali ajüh hathu khiben:

¹⁵ “ ‘Anyi thowa na alon, achan, nyelela amighe pi atsizhü nu kuthila kinyi khe ma Anyiza kishen-keshi pvüaben. Apvüwa na tsikezhü kekinyi tsü nanmeghü den.’ “Anyi tsüdila ‘Amen’ khineng ben.

¹⁶ “‘Anyi thowa na ma ba nyelela ma jja nkinyikü khe ma Anyiza kishen-keshi pvüaben.’ “Anyi tsüdila ‘Amen’ khineng ben.

¹⁷“‘Anyi thowa na ajenphon ggü papheghe khe ma Anyiza kishen-keshi pvüaben.’ “Anyi tsüdila ‘Amen’ khineng ben.

¹⁸“ ‘Anyi thowa na anyon nkemuwa len tsütson deja khe ma Anyiza kishen-keshi pvüaben.’ “Anyi tsüdila ‘Amen’ khineng ben.

¹⁹ “ ‘Anyi thowa na asangthu, maghamaghangthu, nu denyilethu kemeshonwa tsü nkhichi ten khe ma Anyiza kishen-keshi pvüaben.’ “Anyi tsüdila ‘Amen’ khineng ben.

²⁰ “ ‘Anyi thowa na ma ba n-nyuwala ma ba wubvü kesüle kesü lela ssimehai khe ma Anyiza kishen-keshi pvüaben.’ “Anyi tsüdila ‘Amen’ khineng ben.

²¹ “ ‘Anyi thowa na asahang kesü ssimehai khe ma Anyiza kishen-keshi pvüaben.’ “Anyi tsüdila ‘Amen’ khineng ben.

²² “‘Anyi thowa na ma tssüggüwa nyelela ma jja nga ssimehhai khe ma Anyiza kishen-keshi pvüaben.’ “Anyi tsüdila ‘Amen’ khineng ben.

²³ “ ‘Anyi thowa na ma nyie ssimehai khe ma Anyiza kishen-keshi pvüaben.’ “Anyi tsüdila ‘Amen’ khineng ben.

²⁴“ ‘Anyi thowa na kuthila nyu pathi khe ma Anyiza kishen-keshi pvüaben.’ “Anyi tsüdila ‘Amen’ khineng ben.

²⁵“ ‘Anyi thowa na kesami nkemi nyi tsü pathile nyu wi apisa khuya khe ma Anyiza kishen-keshi pvüaben.’ “Anyi tsüdila ‘Amen’ khineng ben.

²⁶ “ ‘Anyi thowa na Anyiza yenthu nu kesansijühthu tsü n-nie mvula sa khe ma Anyiza kishen-keshi pvüaben.’ “Anyi tsüdila ‘Amen’ khineng- ben.”