Read Northern Rengma Naga AYENZHÜNENG 3 Bible Online

AYENZHÜNENG 3 - Northern Rengma Naga bible

AYENZHÜNENG 3

¹“Tsashi ithu na apen ketsen sen aghawa Bashan yegu wi wa, nu kadimi Og na ma nyithu tsüdi ssinu ithu ssikesali le Edrei nyuti kete wi shhugho.

²Isala Apvüwa na hi kiza, ‘Ma nmessi lalo. Hi ma, ma nyithu, nu ma yyi tsüdi pi nthu cüaben. Nthu na Amor nyi kadimi Sihon Heshbon wi kekhang sen kebenwa miwi sa kechi tsü makesü ma miwi la sachi cülo.’

³“Tsalina Apvüwa na kadimi Og nu ma nyithu la pi ithu kekhu wi chi cüa, nu ithu na mathu tsüdi pathia.

⁴Tsü tsüwi ithu na ma nyutithu kesüla nteshila tsüdila nkaya. Ithu na Bashan wi Kadimi Og na kekhang sen keben Argob yegu maben wi anyuti achentugho tsüdila yaya.

⁵Anyuti hathu tsüdila akhweti misikhhali, kaghapeng-jenka, nu ajenka kekhenji mehaitsü sapi khen, nu ciwi anyu kejon na akhweti nkemi la ben.

⁶Ithu na Heshbon wi kadimi Sihon nyutithu miwi sakechi ti ithu na anyutithu tsüdila yasa, nu nza, npvüza, nu ghanyithu tsüdi pi shü thsüa.

⁷Ithu na asahangthu khuya nu anyuti wi atsanqai tsüdi shuya.

⁸“Tsü tsüwi ithu na Amor kadimi keni wi ayyi Jordan Ghaku na nishuwa, Arnon Ghaku na wala Hermon Yikha kecu tsü yaya.

⁹(Hermon Yikha tsüna Sidon nyi na pi Sirion, nu Amor nyi na pi Senir le khiden.)

¹⁰Ithu na Bashan wi kadimi Og yyi tsüdi yaya: yikhami ketijü wi anyunutithu, Gilead nu Bashan yeguthu, wala nishuwa anyunutithu Saleka nu Edrei kecu.”

¹¹(Kadimi Og na Refaim nyi sakhenwa. Ma kamang-nku[1] na alon[2] ma kedi na meter keni nu kesie na meter tagha-mejüu sa, tsü tsüwi kekidegü kenie wina. Tsüna khili Ammon nyi nyunuti Rabbah wi muyaben.)

¹²“Ithu na ayyi tsü yakeya wi hi ayyi Aroer nyuti na aghawa Arnon Ghaku ketsaki nu Gilead yyishiphon diyyiwa pahan pi anyutithu saghu pi Reuben nu Gad mizzathu cüa.

¹³Hi Gilead tsü pahan nu Bashan wi kadimi Og na kekhang sen keben Argob yegu maben la pi Manasseh mizza gishü pahanthu cüa.” (Bashan tsüna Refaim yyi le khiden.

¹⁴Manasseh mizza wi Jair na Argob yegu maben, tsüna Bashan, wala Geshur nu Maaka ggü kecu tsü khuya. Ma anyuti tsüpi ma nyan cia, nu tsüthu tsüpi khilila Jair nyuthu le khiden.)

¹⁵“Hi Gilead tsüpi Manasseh mizza wi Makhir gei cüa.

¹⁶Nu hi ayyi Gilead na wala Arnon Ghaku kecu tsüpi Reuben nu Gad mizzathu cüa. Mathu ggü acülawa na aghaku tsü non nu aghawa na pahanwa Ammon nyi kemeggü sa keben Jabbok Ghaku.

¹⁷Mathu yyi niduwa na wala Jordan Ghaku cuben, aghawa Galilee Ghajü na cü acülawa Keshü Tssükedone, nu nishuwa na wala Pisga Yikha ccü kecu.

¹⁸ “Tsü tsüwi hi kecükegwe hathu pi mathu cü: ‘Apvüwa ithu Nyiza na ayyi Jordan na nishuwa ha nthu na benyalo nu pi nthu cüdha. Khili nthu aghikesa nyi kidenya nu kesun pi Israel mizza kepathu kiqa nu mathu na Jordan pvüdhi wala mathu yyi nkaya thsülo.

¹⁹Nthu wubvü, tsanga, nu asahangthu ketan — hi nthu na asahangthu kejon ben kesa chüben — tsüthu pi hi anyutithu pi nthu kecü witsü benla thsülo.

²⁰No Israel nyi kepathu na wala Apvüwa na ayyi pi mathu cü keben Jordan na niduwa witsü Apvüwa na hewi nthu ghena sakechi ti ma mathu ya ciwi ceen npi hangkeya thsü chu mathu kiqalo. Tsaseng wi ccüna nthu na kheneng sen hi ayyi pi nthu kecü wi ha ghoya mehai.’

²¹“Tsaseng wi hi Joshua kecükegwe chi: ‘No Apvüwa n-Nyiza na kadimi ha keni -Sihon nu Og manyi miwi kulikechi tsüdila muyadha; nu ma no wala ayyi nkaya keten nyithu tsüdi miwi tsü makesü saden.

²²Mathu nmessi lalo, kepaghenanye Apvüwa n-Nyiza na nghena mathu ssisaben.’

²³ “Tsü tsüwi hi lebenchi ntsanu khie,

²⁴‘Kekhang ntsa Apvüwa, no sale keben kedi nu amankesa sa tegü ketan pi hi ccücaben kesa hi chüben. Atssan nu ayyi wi acenpvü kesüla no pala kedi kulikechi hati saya nben.

²⁵Apvüwa, hi ya Jordan pvüdhiki khhakawa ayyi kemehai, yyishiphon diyyiwa tsikemehai nu Lebanon Yikhathu tsü muya thsülo.’

²⁶“Isala nthu ghena Apvüwa na imiwi aghepvü nu nkina mvu la. Tsüti kesawa nye, ma khi, ‘Tsüna cendha! Ha nkhineng layilo!

²⁷Wala Pisga Yikha shoni wi ki nu acüla, agha, nidu nu nishu ghape kevüli chilo. Mehaitsü ghang yalo, kepaghenanye no Jordan pvüdhi waya nben.

²⁸Ma kecükegwethu pi Joshua cülo. Ma kemeshen satezü cü, kepaghenanye ma anyithu ssi wa no ayyi kemuwa tsü nkaya thsüden.’

²⁹“Tsalina ithu na Bathpeor nyuti kaghape yyiketijü witsü ben wa.”