Read Northern Rengma Naga AYENZHÜNENG 30 Bible Online

AYENZHÜNENG 30 - Northern Rengma Naga bible

AYENZHÜNENG 30

¹“Hi nthu na khili kishen-keshi nyethu kesawegü kessiyalo khuchiben. Khathansha wi pala ha tsüdila nthu miwi gho, nu Apvüwa nthu Nyiza na nthu jügüzighe pi mizzatentithu jawi hang wa thsü khe nthu na hi kessiyalo pi nthu kecü ha meshen yaben.

²Keujüla nthu nu nthu shicübvüghathu na Apvüwa wi khapeghe gho nu nthu leben tsüdi pila hi nansü pi nthu cü keben ma yenkhukechithu nieya lethu,

³Apvüwa nthu Nyiza na nthu nantizen chicüaben. Ma nthu jügüzighe pi mizzatentithu jawi chi ketheng yyi wina nthu ssineng gho nu nthu sapi mehai kayiya thsüaben.

⁴Nthu jügüzighe pi ayyi kenten ccügwen ntsa wi wa lela Apvüwa nthu Nyiza na nthu saghuya nu ssineng ghoaben,

⁵isanu nthu na nthu bamyithu na kheni kahang pen ayyi tsü yaneng yaben. Nu ma nthu sapi kheni nthu bamyithu miwi mehai kayi nu ji kayiya thsüaben.

⁶Apvüwa nthu Nyiza na jühkeya leben pi nthu nu nthu shicübvüghathu cü, isanu nthu na nthu leben tsüdi pi ma tizen nu nthu na ayyi ciwi hangki benya ben.

⁷Ma kishen-keshi hathu pi nthu ghinyithu, nthu nankemeghüthu, nu nthu kepashathu miwi chiaben,

⁸nu nthu na kheneng ma jühkeya nu hi nansü pi nthu cü keben ma yenkhukechithu tsüdi nieben.

⁹Apvüwa na nthu kekuli tsüdi wi sapi mehai kayi cüaben; nthu na atsanga, asahangthu kejon benya, nu nthu llikecah wi asu pvüya ntsa saben. Ma kenen wi nthu bamyithu sapi mehai kayi kecü tsüti nthu sapi mehai kayi kecü tsüna ma kenen saben,

¹⁰isanu nthu na ma jühkina nu ma kesansijüh lesüshen hawi zhü ketheng ma yenthu tsüdi nieben. Nthu leben tsüdi sen nu ma wi kheneng ghoaben.

¹¹“Hi nansü ayenkhukechi pi nthu cü kebenwa ha nthu ghena dhu nyelela nthu na tsü n-nie chala kesa ji nye.

¹² Tsüwa tsüna atssan wi nkeben ghena nthu na hati nkeüla, ‘Ithu na tsü kina nu nieyale kesalina thowa na ki tsü sen dugho ithu cü thsü nu?’

¹³Nyelela tsüna atssükedone khhakawa nkenye ghena nthu na hati nkeüla, ‘Ithu na tsü kina nu nieyale kesalina thowa na atssükedone pvüdhi khhakawa tsü sengho ithu cü thsü nu?’

¹⁴Nyele, tsüna hewi nthu jawi ben. Nthu na tsü chüben nu tsü khiya mehai, tsalina khili tsü nieyalo.

¹⁵“Hi nthu na nansü kemehai nyethu nkemehai, kahang nyethu keshü kessiyalo khuchiben.

¹⁶Keujüla nthu na hi nansü pi nthu cü keben Apvüwa nthu Nyiza yenkhukechithu ha nieya, ma tizenya, ma jühkina, nu ma yenthu tsüdi nieya lethu, nthu na mehai kayi nu anyi kejon sala mizzatenti kesü sayaben. Apvüwa nthu Nyiza na nthu wala ayyi yaya keten witsü sawegü pi nthu cüaben.

¹⁷Isala nthu na ma jüh meyala hhaghe, nu nthu ssinu acenpvü kepa wi kinyi bvü thsü lethu,

¹⁸nthu yasa piaben — Hi khili hewi nthu kitsan chiben. Nthu na Jordan khhakawa wala yaya keten yyi witsü matsü kesie hangya nben.

¹⁹Hi nthu na khili kahang nyethu keshü, Anyiza kesawegü nyethu kishen-keshi kessiyalo khuchiben, nu hi atssan ayyi cipi nthu na kessikeya tsü chüza sa thsüben. Kahangwa tsü kessiyalo.

²⁰Apvüwa nthu Nyiza tizenyalo, ma jühkina nu ma wi jühtsentsa sa lethu, nthu nu nthu shicübvüghathu na ma ayyi khipi nthu bamyithu Abraham, Isak, nu Jakob kecü witsü kesie hangyaben.”