Read Northern Rengma Naga AYENZHÜNENG 31 Bible Online

AYENZHÜNENG 31 - Northern Rengma Naga bible

AYENZHÜNENG 31

¹Mosa na ajühkhi pi Israel nyithu kiza ben,

² nu ma khi, “Hi kahang khili amapi meza nu ngwe sadha nu hi nthu ccüliwa sa meyadha. Tsümiwi Apvüwa na hi Jordan pvüdhi khhaka waya nbenle kizadha.

³Apvüwa nthu Nyiza na ma ketanla nthu tuwi wa nu ciwi hang keben mizzatentithu yasa cü lethu nthu na mathu yyi yaya mehai; nu Apvüwa na kekhi ti Joshua na nthu ccüliwa saben.

⁴ Apvüwa na Amor nyithu kadimi Sihon nu Og manyi chaya nu manyi diyyiwa yasa kesa ti anyi tsüthu yasa cü ben.

⁵Apvüwa na nthu ya mathu miwi khangya thsü lethu nthu na mathu miwi hi nthu na salo kekiza ti salo.

⁶Lebenzü nu kempvüza saya. Mathu nmessila. Apvüwa nthu Nyiza na nthu ssiden. Ma nthu mali nyelela nthu teshia nben.”

⁷Tsaseng wi Mosa na Joshua cichi nu Israel nyi tsüdi tuwi na ma wi khi, “Lebenzü nu kempvüza sayalo; no anyi hathu ssi wa Apvüwa na mathu bamyithu wi khishiketheng yyiwa tsü yaya thsüaben.

⁸ Apvüwa na ma ketanla nthu len tsütson nu nthu ssibenden. Ma nthu malia nyelela nthu teshia nben; tsalina accükwenshü nu nmessi lalo.”

⁹Tsalina Mosa na Anyiza Yenwa tsü zhüya nu tsüpi Levi nyi keqhaikedi Apvüwa Cenkethenjüh Khitson kenonccathu, nu Israel nyi ccülikesathu cüa.

¹⁰ Ma mathu wi khi, “Amapi tagü kecen kaghapenla amenkepvü teshi pi kecü mapi kegho wi Kelishu Kho witsü ayenwa ha misikhhali sichilo.

¹¹Israel nyithu na kekinyi pen kesü wi Apvüwa nthu Nyiza kinyile gho lethu mathu wi ha sichilo.

¹²Npvüza, nza, nu ghanyithu, nu nthu nyutithu wi hang keben asangthu tsüdi cighu chi nu tsüdila tsü zaya nu Apvüwa nthu Nyiza kekinyikü yen chüya, nu ma kesansijühthu tsü atsentsa sa nieya thsüle kesalina.

¹³Hatinu nthu shicübvüghathu na Apvüwa nthu Nyiza Yenwa tsü npi za keyathu na tsü zayaben. Isanu mathu na nthu wala Jordan khhakawa yaya keten yyiwi tsü hang keben chu ma jühkekina yen chüyaben.”

¹⁴Tsaseng wi Apvüwa na Mosa wi khi, “No kesie hang ntendha. Joshua cisen nu Nithsüjjen wi gholo, isanu hi kecükegwethu ha pi ma cüden.” Mosa nu Joshua manyi na Nithsüjjen wi wa,

¹⁵nu ciwi Apvüwa na akulukeshü cü wina manyi tuwi gho; akulukeshü tsüna gho Nithsüjjen jenka wi ngan wa.

¹⁶Apvüwa na Mosa wi khi, “No wan shü wa tendha, nu no keshü seng wi anyithu na hi wi jühtsentsa nsala hi mathu ssinu cenkethenjüh tsü pakhhiaben. Mathu na hi teshi nu wala mathu na dule keben yyiwi kahangthu cenpvü kinyi waben.

¹⁷Khathansha wi tsüti sa wa khe hi mathu miwi aghepvüben; hi mathu teshi nu nyu na mathu yasaben. Ketizenkesa kejon na mathu miwi ghoaben, nu mathu na hi mathu Nyiza, hi mathu nssila kesalina pala hathu na mathu miwi ghoben le kesa chüyaben.

¹⁸Nu hi mathu nkiqa cü mvula hhagheben, kepaghenanye mathu na nkemehai sa nu acenpvü kepathu kinyi wa kesalina.

¹⁹“Khili, akhwi ha zhüyalo. Tsüpi Israel nyithu sansi cü, isanu tsü yala mathu shunben le kesa chüza sa thsüle kesalina.

²⁰Hi mathu bamyithu wi khishiketheng ti hi mathu ssi wa ayyi kemehai nu kinyan wi chicüaden. Ciwi mathu na kedsa mvu tsse tsüdila benya, nu anonkwenla hang yaben. Isala mathu na hi wina khapeghe wala acenpvü kepa wi kinyi waben. Mathu na hi meya mvula nu hi cenkethenjüh tsü pakhhiaben,

²¹nu ketizenkesa kejon na mathu miwi ghoaben. Isala akhwi ha saben, nu tsüna mathu keshun chüza saben. Khili lela hi mathu ssinu ayyi pi mathu cüle khishiketheng wi npi kewa wina hi mathu na mangwa meshenben khe chüben.”

²²Tsü ghanan Mosa na akhwi tsü zhüya nu pi Israel nyithu sansi cü.

²³ Tsaseng wi Apvüwa na Nun tsawa Joshua ccüneng nu ma wi khi, “Lebenzü nu kempvüza sayalo. No Israel nyithu ssinu hi ayyi pi mathu cüle khishiketheng witsü waden, nu hi no ssibenden.”

²⁴Mosa na Anyiza Yenwa tsü kesüla nteshila tsüdi zhüpi lesüshen kesü saya.

²⁵Ma tsü sacen keya seng wi Levi nyi keqhaikedi Apvüwa Cenkethenjüh Khitson kenonccathu wi khi,

²⁶“Anyiza Yenwa lesüshen ha khuya nu sen wa Apvüwa nthu Nyiza Cenkethenjüh Khitson kete wi chi, isanu tsü ya ciwi ben nu ma nyithu keshun chüza kesü sa thsülo.

²⁷Mathu na khatila leben-dhu nu kematang nyi khe hi chüben. Mathu na hi kahang tsüwi Apvüwa matang, nu hi keshü seng wi lela mathu na tsümiwi ma matangben.

²⁸Nthu mizza wi ccülikesa nu kedithu tsüdi cipi ituwi saghu thsülo. isanu hi pala hathu pi mathu kizale kesalina, hi atssan ayyi cipi mathu keshun hi chüza sa thsüden.

²⁹Hi keshü seng wi anyithu na gheshighena nu hi mangwa pi mathu sansi cü khe tsü meya mvula saben kesa hi chüben. Nu matsü ghaketen wi mathu na ketizenkesa metu yaben, kepaghenanye mathu na Apvüwa na nsa lalo kesa tsü sapi ma ya aghepvü thsüben.”

³⁰Tsaseng wi Israel nyithu tsüdila kina keben wi Mosa na akhwi ha tsüdi sa.