Read Northern Rengma Naga AYENZHÜNENG 34 Bible Online

AYENZHÜNENG 34 - Northern Rengma Naga bible

AYENZHÜNENG 34

¹Mosa na Moab deshentijü wina Nebo Yikha wi ki, Jerikho na nishuwa Pisga Yikha shoni wi ki nu ciwi Apvüwa na ayyi tsü maben pi ma ccüca: Gilead yyi na wala aghawa Dan nyuti kecu;

²Naftali yyi maben; Efraim nu Manasseh yyithu; Judah yyi na wala niduwa Mediterranean Tssükedone kecu;

³Judah yyi acülawa; nu Zoar wina wala palm chan nyunutiwa Jerikho cu keben deshentijüwa tsü.

⁴ Tsaseng wi Apvüwa na Mosa wi kiza, “Ayyi hawa ha hi Abraham, Isak, nu Jakob wi khishiketheng pi mathu shicübvüghathu cüle khi ketheng tsüle. Hi no ya tsü muya thsüdha, isala hi no ciwi waya thsü nten.”

⁵Tsalina Apvüwa maghawa Mosa, Apvüwa na ma shüaben le khi ketheng ti ma Moab yyiwi shüa.

⁶Apvüwa na ma pi Moab yyiketijü Bethpeor nyuti kaghape witsü vhüa, isala nansü kecu anyi thola ma pi kevhüpen tsü chüti nsa.

⁷Mosa na keshü tsü wi ma amapi meza nu ngwe sa; isala ma gwosajjü zü nu ma nyon la njang.

⁸Israel nyithu na Moab deshentijü wi ghanan changha ma ghena anongü.

⁹Nun tsa Joshua na kemetsa pi pong pvüden, kepaghenanye Mosa na Joshua pi ma kuti kesawa sa thsüdha. Israel nyithu na Joshua jühkina nu Apvüwa na Mosa wina ayenkhukechithu pi mathu kecü tsü nieya.

¹⁰Israel jawi atusenjüh-kechü kesüla Mosa ti kesa nmi; Apvüwa na ghang tanti ma ccüneng.

¹¹Atusenjüh-kechü kesüla Apvüwa na Mosa kesun pi Ejipt kadimiwa, ma kekhu wi kedithu, nu diyyiwa maben tuwi azensu nu amankesathu kekuli ti npi saya.

¹²Atusenjüh-kechü kesüla Mosa na Israel tsüdi tuwi kedi nu qhethiketen kekuli tsüti npi saya.