Read Northern Rengma Naga AYENZHÜNENG 5 Bible Online

AYENZHÜNENG 5 - Northern Rengma Naga bible

AYENZHÜNENG 5

¹Mosa na Israel nyi tsüdi cighu nu mathu wi khi, “Israel nyithu, hi nansü ayenthu pi nthu cü keben ha tsüdi kinayalo. Tsüthu tsü chüya nu nieya metsilo.

²Sinai Yikha wi Apvüwa ithu Nyiza na cenkethenjüh kesü sa,

³tsüna ithu bamyithu ketan nyela ithu nansü hang kebenthu tsüdila ssinu sa theng.

⁴Ciwi ayikha miwi Apvüwa na anni wina nthu mmi ghangtan ccüneng,

⁵Tsü tsüwi hi nthu nu Apvüwa jüwi ngan nu ma mangwa khi khe pi nthu kiza, kepaghenanye nthu na anni tsü messi nu ayikha miwi nkila. “Apvüwa na khi,

⁶‘Hi Apvüwa nthu Nyiza, nthu na Ejipt wi nyu nssümagha sa keben wi nthu ssi keshhughowa tsüle.

⁷“ ‘Hi ketan khe acenpvü kepa wi nkinyila.

⁸ “‘Nthu ghena atsikezhü mangla nsala, tsüna tangwi, ayyi miwi, atssü wi nyelela ayyi cakhu wi keben tsi ti mangla nsala.

⁹ Atsikezhü tuwi kukedu nyelela tsü nkinyila, kepaghenanye hi Apvüwa nthu Nyiza nu anonkemeyen Nyiza. Hi kemeten sengho hi nanmeghü ketenthu nu mathu shicübvüghathu abvüye kecheng nu mejü kecu cüden.

¹⁰Isala hi nanketizen pi hi ghali nu iyenthu nie ketenthu abvüye hazar hazar wi lela ccücaden.

¹¹ “‘Nkemehai ghena wi inyan nsenla, kepaghenanye hi Apvüwa nthu Nyiza, inyan sensa ketenwa metenmesha cüden.

¹² “‘Sabbath tsathang tsü nieya nu sen methayalo, hi Apvüwa nthu Nyiza, hi nthu kizadha.

¹³ Nthu na ghanan tugho jüwi nthu kekuli tsüdi saya,

¹⁴isala tagü ghananwa tsüna kemnan tsathang sametha pi hi wi chidha. Tsü ghanan wi thola kekuli nsala—tsüna nthu, nthu tsangathu, nthu maghathu, nthu sahangthu, nu nthu diyyiwa wi hang keben asangthu sa lela. Nthu maghathu la nthu ti mnan meya thsüthu yishü.

¹⁵Nthu na Ejipt wi nyu nssümagha sa keben, nu hi Apvüwa nthu Nyiza hi kekhang nu kezü wina nthu khushikeya tsü meshenyalo. Tsalina hi nthu na Sabbath tsathang tsü nieyalo nthu kizaben.

¹⁶ “ ‘Hi Apvüwa nthu Nyiza na nthu kiza keben ti, nba nu njja kinyikü yalo; isalethu pala tsüdila nthu ghena mehai nu hi ayyi pi nthu cü keben witsü nthu na kesie hangya thsüle kesalina.

¹⁷ “ ‘Nyu npathila.

¹⁸ “ ‘Keqheza nsala..

¹⁹ “ ‘Nghanfüla.

²⁰“ ‘Milikemesa chüza sen nu njenphon nshunla.

²¹ “ ‘Nyu keben ntepaghala, nyu wubvü, ma yyi, amaghathu, amesüsi, gadathu, nyelela ma keben katsüha lela ntepaghala.’

²² “Ayenkhukechi hathu ha nthu tsüdila ayikha wi saghu keben wi Apvüwa na pi nthu cü. Ma ahhai misi ntsa nu anni nu akulukeshü kejang wina ajühkekhi wi ayenkhukechi hathu ketan khe kepa wi nkhuchi. Ma tsüthu tsüpi alonpha keni miwi zhüya nu pi hi cü.

²³“Ayikha maben wila anni sa nu nthu na kejang wi ihhai zakeya wi nthu mizza wi ccülikesathu nu paghangthu na hi wi gho,

²⁴nu khi, ‘Apvüwa ithu Nyiza na anni wi ajüh kekhi hhai zakeya wi ma kekhang kedi nu anyankethang pi ithu ccücale. Anyiza na anyi kesü ccüneng lela anyi tsüna hangbenya mehai le kesa ithu na nansü muyadha.

²⁵Isalethu ithu na mangsale shüya kemehai saneng nu? Qhethiketen kesa nni tsüna ithu yasa ben. Apvüwa ithu Nyiza na ajühkhi pi ithu kekiza tsü zaneng lethu ithu na shü metsi.

²⁶Anyi kesütanla hankebenwa Anyiza anni wina ajüh kekhi zakeya seng wi hangben kwe?

²⁷Mosa, kheneng wala Apvüwa ithu Nyiza na kekhijüh tsüdi kina nanlo. Tsaseng wi kheneng gho ma mangwale khi khe pi ithu kizalo. Ithu na tsü kina nu nieben.’

²⁸“Apvüwa na ha zakeya seng wi ma hi wi kiza, ‘Anyi hathu na mangwale khi khe hi zayadha, nu mathu na meshon le.

²⁹Keujüla mathu na keshüthangla hati ketan meshen lethu, hi kinyikü nu hi ayenkhukechi tsüdila nieya, isalethu pala tsüdi wila mathu nu mathu shicübvüghathu ghena anuphanla mehaiyaben.

³⁰Wala mathu nithsüjjen wi ghonenglo kizalo.

³¹Isala Mosa, no hewi hi gweghe benlo, hi iyenkhukechi nu ahza tsüdi pi no cüden. Tsüthu pi anyithu sansi cülo, isanu mathu na hi ayyi pi mathu cü keben witsü tsüthu nieya thsüle kesalina.’

³²“Israel nyithu, Apvüwa nthu Nyiza na nthu kekiza tsüdila sa metsilo. Ma yenthu tsü kesütanla n-niela nsala.

³³Tsüthu tsüdila nieyalo isathu nthu na pala tsüdi wila mehaiyaben, isathu nthu na wala ayyi nkaya keten witsü hangki benyale kesalina.”