Read Northern Rengma Naga AYENZHÜNENG 6 Bible Online

AYENZHÜNENG 6 - Northern Rengma Naga bible

AYENZHÜNENG 6

¹“Ayen hathu ha tsüdi Apvüwa nthu Nyiza na hi pi nthu sansi cülo kekiza. Nthu na dula benya keten yyiwi tsüthu tsü nieyalo.

²Nthu na hang keben chu, nthu nu nthu shicübvüghathu na Apvüwa nthu Nyiza kinyikü nu hi pi nthu cü keben ma yenthu ha tsüdi nielo, isathu nthu na ayyi ciwi kesie hangyaben.

³Israel nyithu, tsüthu tsü kina nu nieyalo! Isalethu pala tsüdi wi nthu ghena mehai yaben, nu Apvüwa ithu bamyithu Nyiza na khishiketheng ti nthu na mizzatenti kekhang kesü saya nu ayyi kinyan nu kemehai witsü hangyaben.

⁴ “Israel, ha meshenyalo! Apvüwa — nu Apvüwa ketan na ithu Nyiza.[3]

⁵ Nleben tsüdi, no kahang tsüdi, nu no kezü tsüdi pi Apvüwa n-Nyiza tizenyalo.

⁶ Ayenkhukechithu hi nansü pi nthu cü keben ha nmalila metsilo.

⁷Tsüthu pi nthu tsangathu sansi. Nthu na ajjen wi donki kebenle alentsen keten wi lela, mnan kebenle kuli keben wi lela tsüthu tsü khibenlo.

⁸Meshenyale kesalina tsüthu pi nthu hacü wi bhenki nu pi nthu tie wi zhüki pvülo.

⁹Tsüthu pi nthu jenka donbvüthu nu ajjen kaghapeng-jenkathu wi zhüki yalo.

¹⁰“Apvüwa nthu Nyiza na nthu bamyithu Abraham, Isak, nu Jakob wi khishiketheng ti ma anyunutithu keti nu kemehai nthu na sa nketheng tsüpi nthu cüaden.

¹¹Nthu na pi chi nketheng atsanqai kemehai na ajjen pong benden, nu ciwi nthu na chhü nketheng atssükhangthu, nu nthu na pi yang nketheng kemeshentsse lli nu oliv sankuthu na benben. Apvüwa na nthu ssi wa ayyi ciwi duya nu nthu na nthu kedsamvu tsüdila benya lethu,

¹²nthu na Ejipt wi nyu nssümagha sa keben wi nthu khushikeyawa Apvüwa tsü nmalila metsilo.

¹³ Apvüwa nthu Nyiza kinyikü, ma ketan kinyi nu ma nyan wina ketan nthu jühkhishi tenlo.

¹⁴Acenpvü kepa nthu kevü wi keben nyi cenpvüthu tsü khiela nkinyila.

¹⁵Keujüla nthu na acenpvü kepa wi kinyi lethu, Apvüwa ghekepvü na anni ti nthu miwi gho nu nthu yasatha saben, kepaghenanye Apvüwa nthu Nyiza nthu gweghe kebenwa tsüna anonkemeyen Nyiza.

¹⁶ “Nthu na Massa wi kesa tsüti Apvüwa nthu Nyiza leben npiela.

¹⁷Nthu na ma ayenthu pi nthu kecü tsüdila nieya metsilo.

¹⁸Apvüwa na mangwa meshen nu mehaile khi khe tsü salo, isalethu pala tsüdi wila nthu ghena mehaiyaben. Apvüwa na nthu bamyithu wi ayyi kemehai khishiketheng tsü nthu na yaya mehai,

¹⁹nu ma khishiketheng ti nthu na nthu ghinyithu jügüshi shaben.

²⁰“Matsü ghaketen wi nthu tsangathu na nthu wi kinaben, ‘Mangkesa na Apvüwa ithu Nyiza na ithu ayen hathu tsüdi nieyalo kiza nu?’

²¹Isalethu mathu wi kizalo, ‘Ithu na Ejipt kadimiwa nssümagha sa keben wi Apvüwa na ma kekhang kedi pi ithu khushiya.

²²Ithu na ithu nyon pi ma amankesa nu qhethiketen kuli pi Ejipt nyithu, mathu kadimiwa nu ma kekhu wi kedithu tsüdi miwi kechi tsü muya.

²³Ma Ejipt wina ithu lisha sen shhugho pi ithu bamyithu cüle khishiketheng ti hewi ayyi hapi ithu cüa.

²⁴Isanu Apvüwa ithu Nyiza na ithu ayen hathu tsüdi nieya nu ma kinyikülo ithu kiza. Keujüla ithu na tsüti sa lethu ma keshüthangla ithu mizzatenti hie nu tsü ya mehai kayi yathsüben.

²⁵Keujüla ithu na jühtsentsa sa nu Anyiza na ithu kekiza tsüdi nie lethu ma ithu nenthi saben.’ ”