Read Northern Rengma Naga AYENZHÜNENG 9 Bible Online

AYENZHÜNENG 9 - Northern Rengma Naga bible

AYENZHÜNENG 9

¹“Israel nyithu kinalo! Nthu na nansü Jordan Ghaku pvüdhi wala nthu miwi ketiki nu kekhangki mizzatenti yyiwa tsü yaya tendha. Mathu nyunutithu na ketiti nu akhweti zhüpi atssan cutheng.

²Anyithu na zü nu sie ntsa; mathu na kücanyi, nu anyi thola mathu tuwi ngan nu mathu shunya nben kesa nthu na tsü zayadha.

³Isala nthu khili Apvüwa nthu Nyiza na annikeqhe kesü ti nthu tuwi wa keten muyaden. Nthu na atujügüwathu ma mathu miwi khangya, isanu ma khishiketheng ti wan mathu jügüshi nu yasa cüle kesalina.

⁴“Apvüwa nthu Nyiza na nthu ghena mathu kejügüshi seng wi nthu na ayyi ha keya qo ghena ma nthu ssigho ha yaya thsüle tsüti nkhila. Nyele, anyi hathu gheshighena ghena Apvüwa na nthu ghena mathu jügüshia tendha.

⁵Hawa ha nthu na mehai nu meshon kesa ghena Apvüwa na nthu yala mathu yyi yaya thsü nben. Ma mathu jügüshiaden kepaghenanye mathu na gheshighena nu ma nthu bamyithu Abraham, Isak, nu Jakob wi khishiketheng tsü sale kesalina.

⁶Nthu na ayyi kemehai ha keya qo ghena Apvüwa na tsüpi nthu cü nbenle kesa chüyalo. Nyele, nthu na lebenkedhu nyile.

⁷“Nthu na ayyikeshü wi khati nu Apvüwa nthu Nyiza sapi aghepvü thsü khe tsü khiela nmalila. Nthu na Ejipt keteshi ghanan nten na gho nansü hewi kecu nthu na ma matangla shunle.

⁸Sinai Yikha wi lela nthu na Apvüwa sapi aghepvü thsüa — nthu yasaya kemehai kecu wi aghepvü.

⁹Hi ayikha wi kila Apvüwa na nthu ssinu cenkethenjüh pi alonpha keni miwi zhüketheng tsü khuyale sa. Hi ciwi aghaja nu ghanan jügha ben nu mangla ndsajjü.

¹⁰Tsaseng wi Apvüwa na nthu ayikha wi keben ghanan wi ma anni wina mangwa pi nthu kiza khe ma kwen pi alonpha keni miwi zhüki ketheng tsüpi hi cü.

¹¹Anle, aghaja nu ghanan jügha seng wi Apvüwa na ma cenkethenjüh pi alonpha keni miwi zhüketheng tsüpi hi cüle.

¹²“Isanu Apvüwa na hi wi khi, ‘Ayikha wina wan cülo, kepaghenanye n-nyithu, no Ejipt wina ssi keshhughothu na meghangmeghe nu nkemehai sadha. Mathu na hi mathu mangwa salo kiza khe ciwi na khapeghedha, nu mathu na mathu ghena atsikezhü kesü sayadha.’

¹³“Palah Apvüwa na hi wi khi, ‘Anyi hathu ha khatila leben-dhu khe hi chüben.

¹⁴Hi nkhenla yilo. Hi anyi thola mathu meshen meya thsüla le kesalina mathu yasa piaden. Tsaseng wi ccüna hi no sapi mathu miwi kediki nu kekhangki mizzatenti kesü bawa saya thsüden.’

¹⁵“Tsalina hi khapegheya nu cenkethenjüh pi alonpha keni miwi zhüketheng tsü sen nu ayikha wina cü. Ayikha wi annikeqhe na shhughoben.

¹⁶Nthu na Apvüwa nthu Nyiza ayenkhukechi pi nthu kecü tsü n-niela kesa hi muya, nu nthu na amighe pi nthu ghena amesü zza asüpon kesü tsizhüya nu ma tuwi samidha.

¹⁷Tsalina ciwi nthu tuwi hi alonpha keni tsüpi ayyiwi khalachi nu kecencha zighe.

¹⁸Tsaseng wi hi kheneng Apvüwa tuwi aghaja nu ghanan jügha nkhwencadu nu mangla ndsajjüla sa. Hi hati sa, kepaghenanye nthu na Apvüwa tuwi sami nu ma sapi aghepvü thsü kesalina.

¹⁹ Hi Apvüwa ghekepvü tsü messi, kepaghenanye ma aghepvü ntsa pi nthu yasale kesalina; isala Apvüwa na kheneng ihhai kina chicü.

²⁰Apvüwa na Aaron miwi la aghepvü ntsa sa nu ma pathiale sa, tsalina hi Aaron ghena la kekhie sa.

²¹Hi nthu na amighe pi amesü zza asüpon sa ketheng kesami tsanqai tsü khuya nu tsüpi anni wi khalachia. Tsaseng wi hi tsüpi ayyiwi kecencha zighe nu pacha pi ayyinikhu sathsüa, nu tsüpi ayikha wina lle dugho keben akuza wi khalachia.

²²“Nthu na Taberah, Massa, nu Kibroth Hattaava wi keben wi la Apvüwa nthu Nyiza sapi aghepvü thsüa.

²³ Nu ma Kadesh Barnea wi ahza pi nthu cü nu wala ma ayyi pi nthu cü kebenwa tsü yayalo kesun kechi wi nthu na ma matangla shun; nthu na ma n-nondi nu ma jüh nkinala.

²⁴Hi nthu chükeya ghanan nten na nthu na Apvüwa matang nu ma shun ghoben.

²⁵“Tsalina hi Apvüwa tuwi aghaja nu ghanan jügha nkhwendu, kepaghenanye ma nthu yasale kidenya kesa hi chüya kesalina.

²⁶Nu hi kekhie sa, ‘Kekhang ntsa Apvüwa, no kekhang nu kezü wina Ejipt wi khushiya nu ssi keshhugho n-nyithu tsü meyasa lalo.

²⁷Nmaghathu Abraham, Isak, nu Jakob meshenchi, nu anyi hathu lebenkedhu, gheshighena, nu mathu kesami tsü nmeshen lalo.

²⁸Nyelethu, Ejipt nyithu na no n-nyithu ssinu no khipi mathu cü ketheng yyiwi tsü wa meya ladha le khiben. No n-nyithu nankemeghü ghena mathu ssishhula ayyikeshü wi pathiale sale mathu na tsüti khiben.

²⁹Isala, anyi hathu ha no pi n-nyithu sayale kesalina kessikeya nu no kedi kekhang nu kezü wina Ejipt wi mathu ssi shhughole.’ ”