Read Northern Rengma Naga JOHAN 11 Bible Online

JOHAN 11 - Northern Rengma Naga bible

JOHAN 11

¹ Bethani wi kahang nyi kesü ma nyan Lazar na naa ben. Bethani tsüna Maria nu ma pvünonwa Martha manyi nyu.

² (Maria hana adeli pi Apvüwa ccü miwi keshushachi nu ma lissen pi nyen pi kesawa tsü, ma baghawa Lazar na naa ben.)

³Tsalina ma pvünon na nyu kesun pi Jisu wi kiza thsü, “Apvüwa, npvüshangwa no ma tizen ketenwa tsüna naa ben.”

⁴Jisu na ajüh tsü zakeya wi ma hati khi, “Hawa ha Lazar keshü kinaa nye, isala ha wina Anyiza nyanthangya thsüle kesalina. Isanu ha ghena Anyiza Tsawa nyankethang sayaben.”

⁵Jisu na Martha nu ma pvünonwa nu Lazar tizenghali den.

⁶Isala ma Lazar na naa benle kesa zakeya seng wi ciwi ghanan keni ben neng wa.

⁷Tsaseng wi ma sansikeyathu wi khi, “Ikhang Judea wi wa na ghalo.”

⁸Sansikeyathu na luneng, “Kesansiwa, Judah nyithu khili siekhang nkesa wi alon pi no kecenthiale bha tenthu no ciwi wa nengle ben kwe?”

⁹Jisu na khi, “Ghanan kesü wi amighe kekihhe taghakeni nye kwe? Tsalina thowa na aghanan wi alentsenten khe ma ccümeshü nten, kepaghenanye ma ayyi wi kewegüwa tsü muben.

¹⁰Isala keujüla ma aghaja wi alentsen lethu, ma ccümeshü den, kepaghenanye ma kewegüwa tsü nmi.”

¹¹Jisu na ajüh hati khi nu mathu wi kiza, “Ikhang pvüshangwa Lazar na jen wadha, isala hi wala ma pamechü aden.”

¹²Sansikeyathu na luneng, “Apvüwa, keujüla ma jenben lethu, ma mehai neng yaben.”

¹³Jisu na Lazar shü kesa cüki khiben, isala mathu kemeshen ma ntsakhiwa kejen cüki khibenle sa.

¹⁴Tsalina Jisu na nkuthila mathu wi khi, “Lazar na shüdha.

¹⁵Isala nthu ya nondiya thsüle kesalina hi ma gweghe nbenla kesa ghena inonghe ben. Isala khili ikhang ma wi wa na ghalo.”

¹⁶Thoma (pi Deduma le ci ketenwa) na ma pvüshang sansikeyathu wi khi, “Ikhang la Kesansiwa gweghe wa nu shüana ghalo.”

¹⁷Jisu na gho cukeya wi Lazar pi kevhü ghanan mejü sa kesa muya.

¹⁸Bethani nu Jerusalem manyi jü na kilometer kecheng ncen.

¹⁹Judah nyi kejon na Martha nu Maria manyi baghawa keshü ghena manyi leben satecca cüle ghoben.

²⁰Martha na Jisu gho tenle kesa zakeya wi ma wa Jisu metule shhu, isala Maria na ajjen wi ben.

²¹Martha na Jisu wi khi, “Apvüwa, keujüla no he wi benle keathu, ibaghawa na shü nkesa le!

²²Isala khili lela no Anyiza wi mangwa khie khe ma pi no cüben kesa hi chüben.”

²³Jisu na ma kiza, “Nbaghawa na hangneng-shagha ben.”

²⁴Martha na luneng, “Ma hangneng-keshagha tsathang asakhen wi hang shagha neng shaben kesa hi chüben.”

²⁵Jisu na ma wi kiza, “Hi hangneng-keshaghawa nu kahangwa. Anyi thowa na hi nondi ten khe ma shü lela hang yaben,

²⁶nu thowa na hi nondi nu hang ten khe ma khiela shü meyacha. No ha nondi ben ma?”

²⁷Martha na luneng, “Anle, Apvüwa! No Anyiza Tsawa, Khrista ayyi wi ghoten kesawa tsüle kesa hi nondiben.”

²⁸Martha na ha khitheng nu kheneng wa ma pvünonwa Maria ci, “Kesansiwa na he wi ben nu no keü benle,” isa khi.

²⁹Maria na ajüh tsü zaya meyi kaghaji sen nu ma metule wa.

³⁰(Jisu na gho anyu npi cu, isala khili la Martha na ma kemetu pen wi tsü ben.)

³¹Anyi ajjen wi Maria leben satecca kebenthu na Maria na shagha kaghaji bvü keten tsü muya nu ma nie wa. Mathu na ma ashüjjen wi qai wa tenle sa.

³²Maria na Jisu keben pen wi gho ma muya nu ma ccü wi akhhutsüdu hati khi, “Apvüwa, keujüla no he wi benle keathu, ibaghawa na shü nkesa le!

³³Jisu na Maria nu anyi ma nie keghothu la qai keben mu, tsalina ma leben güccü nu ma nongü ntsa saya.

³⁴Ma mathu wi keü, “Nthu ma pi khiewa vhütheng nu?” Mathu luneng, “Apvüwa, ghala he wi ghangchilo.”

³⁵Jisu qai.

³⁶Anyithu na khi, “Ghangchilo, ma khatila Lazar tizen nu!”

³⁷Isala mathu pahan na khi, “Ma anyon nkemu nyi sa pi muya thsüthu, ma Lazar pi nshü thsü la saya nben kwe?”

³⁸Tsaseng wi Jisu na ma leben güccü ntsa nu ashüjjen wi wa, tsüna alonku kesü alon keti pi kedulen tsü khentheng.

³⁹Jisu na “Alon tsü khupilo!” khi. Keshüwa tssüggüwa Martha na khi, “Apvüwa, pi kevhü na ghanan mejü sakea ghena khili hansa benladha le!”

⁴⁰Jisu na ma wi khi, “No nondiya lethu, Anyiza nyankethang muyaben na kesa hi no nkiza kwe?”

⁴¹Tsalina mathu na alon tsü khupia, nu Jisu na yaki ghang nu khi, “IBa, hi no sengle, no hi kekhie kina keten ghena.

⁴²No keshüthangla hi kekhie kina ten kesa hi chüben, isala anyi he wi kebenthu ghena, no hi kesunchile kesa mathu ya nondiya thsüle kesalina hi ha khiben.”

⁴³Ma ha kekhi seng wi ma hhai misi ntsa jisha nu cichi, “Lazar, shaghalo!”

⁴⁴Keshüwa na shagha, ashüjjen thsümeni na ma ccükwen meju nu ma mmi shang pvüben. Jisu na mathu kiza, “Ma lisha nu ma yala bvü thsülo.”

⁴⁵Anyi kejon Maria hhainan keghothu na Jisu kekulithu tsü muya nu ma nondiya.

⁴⁶Isala mathu kheneng wa Jisu na kuli kechithu cüki khi pi Farisithu kiza.

⁴⁷Tsalina keqhaikedi ntsathu nu Farisithu na keccünengli nu khi, “Ikhang khati sa nu? Anyi hawa ha azensuthu ha tsüdi sabendha le!

⁴⁸Keujüla ikhang na ma ya hati sa thsü lethu, anyi kejon na ma nondi wa ben, isalethu, Rom nyi kekhang kesenthu na ghola ithu Kekinyijjen nu ithu diyyi yasa cüben le!”

⁴⁹Mathu jawi meshu kesü tsü mapi keqhaikedi sa kebenwa na khi, “Nthu na mangla nchü!

⁵⁰Diyyi maben yasa kesa tsü anyithu ghena meshu kesü pi shü thsü kesawa nthu ghena mehaile kesa meshenshi meya kwe?”

⁵¹Ajüh ha ma ketanla ma kemeshen wina nkhi, isala ma tsü mapi keqhaikediwa sa keben ghena Jisu na Judah nyithu ghena shü keten atusenjüh-khi,

⁵²nu mathu ghena ketan nyela Anyiza nyithu bvü zighe kebenthu tsüdila saghu pi agwo kesütan sayaben

⁵³Tsü nten na Judah nyi kekhang kesenthu na Jisu pathiale acho kiden wa.

⁵⁴Tsalina Jisu na yazishu Judea wi wa meyala, isala ma ciwi na wa apen kesü ayyikeshü tetsaki Efraim nyuti wi ma sansikeyathu gweghe ben wa.

⁵⁵Shhukeya Kho tsü kesa tsü na cu wa, nu akho tsü npi tuwi anyi kejon na diyyiwa wina Jerusalem wi shula keccüna wi mathu satekemetha yen tsü sa.

⁵⁶Mathu na Jisu kegho ghangben, nu mathu na Kekinyijjen wi saghu nu khokho wi keü, “No tsü khati meshen ben nu, ma akho wi ha gho nben kwe?”

⁵⁷Keqhaikedi ntsathu nu Farisithu na anyi kesü le kesü lela Jisu keben pen chüya lethu mathu kizalo kesa ahza khuchi, isanu mathu na ma ghanyale kesalina.