Read Northern Rengma Naga JOHAN 12 Bible Online

JOHAN 12 - Northern Rengma Naga bible

JOHAN 12

¹Shhukeya Kho npi ghanan tugho tuwi Jisu na ma Lazar sa pi hangneng kecü Bethani nyu witsü wa.

²Ciwi mathu ma ghena kedsakejjü kiden, nu Martha na kugü; Lazar na nyu kepa wi gweghe miz wi donkiben.

³ Maria na adeli menkedhu ntsa nard pi kesa pahan sengho Jisu ccü miwi zügüchi nu ma lissen pi nyen, isanu adeli han na ajjen maben kepong sa.

⁴Isala sansikeyathu jawi meshu kesü Jisu matsa ketenwa Iskariot kekhi na,

⁵“Mangkesa na adeli ha pi akutimen meza kecheng jeü ya nu apisa tsü pi ketha-u cü nsa nu?”

⁶(Ma ketha-u cüki kemeshen ghena ajüh ha nkhi, isala ma kaghanfü nyi kesü ghena. Ma apisa hikhu tsü pvü nu ciwi ma ghena apisa tsü khuyaya saden.)

⁷Isala Jisu na khi, “Ma kesasa sa thsülo! Ma mangwa ben khe pi hi kevhü tsathang ghena thengya thsülo.

⁸ Nthu na keshüthangla ketha-u ssi benden, isala nthu na keshüthangla hi gweghe ben nben.”

⁹Anyi kejon na Jisu na Bethani wi benle kesa zaya, tsalina mathu Jisu ghena ketan nyela ma keshü wina sa pi hangneng kecüwa Lazar la ghangchile kesalina ciwi wa.

¹⁰Tsalina keqhaikedi ntsathu na Lazar la pathiale kesa acho kiden,

¹¹kepaghenanye ma ghena Judah nyi kejon na mathu teshi nu Jisu nondi wa bendha.

¹²Dhitsüwa wi anyitenti keti na Jisu na Jerusalem wi Shhukeya Kho kesa witsü gho tenle kesa zaya.

¹³ Tsalina mathu na palm chan cüna shhüya nu wa ma metu nu jisha, “Hosanna! Anyiza na sawegü pi Apvüwa nyan wi gho keten Israel Kadimiwa kecüwa salo!”

¹⁴Ntsawajüh wi khi keben ti, Jisu na gada zza kesü muya nu tsü miwi donkiya,

¹⁵ “Zion nyunutiwa, nmessi lalo! No Kadimiwa na Gada zza miwi donki nu gho tendha.”

¹⁶Ma sansikeyathu na aghatsan wi ha chüshi meya, isala Jisu nyankethang saya ccüla, mathu Ntsawajüh na ma cüki kekhi nu nyu ma miwi kulikechi ha meshenya.

¹⁷Jisu na ashüjjen wi Lazar cichi nu keshü wi ma sa pi hangneng kecü wi anyitenti ma gweghe kebenthu na ma sheipichi.

¹⁸Tsalina anyitenti na ma azensuthu ha sachile kesa zakeya wi ma metule wa.

¹⁹Tsaseng wi Farisithu na khokho wi khi, “Ghangchilo! Ikhang na mangla saya nbendha! Ayyi nyi maben la ma nie wa tendha le!”

²⁰Jerusalem wi akho tsü wi kinyi kewathu jawi Grik nyi pahan na ben.

²¹Mathu Filip (Galilee yyi Bethsaida wina keghowa) wi gho nu ma kiza, “Kediwa, ikhang na Jisu ghangchi mvu ben le!”

²²Filip na wala Andria kiza, nu manyi gweghe wa Jisu kiza.

²³Jisu na manyi wi khineng, “Anyi Tsawa nyanthang yale kesalina matsü na ghodha.

²⁴Hi atsentsawa nshinyi kizaden: asu bi kesü tsüna qancadu ayyi wi npi keshüchi chu tsüna kesütan saben. Isala keujüla tsüna shüchi lethu ma bi kejon bün yaden.

²⁵ Anyi thowa na ma kahang tepagha ten khe bhataghaben, isala thowa na ayyi ha wi ma kahang tepagha nten khe noncca pi anuphan kahang wi chiaben.

²⁶Anyi thowa na hi kekuli sa mvu ten khe hi n-niethu yishü, isathu hi kekuli kesa nyi na hi gweghe benyaden. Thowa na hi kekuli saten khe Abawa la ma nyuwaküden.

²⁷“Khilitsü hi ileben ketizen sa wadha, nu hi khatile khi nu? ‘IBa, matsüwa ha pi imiwi ngho thsü lalo,’ isa khi kwe? Isala hi matsü hawa ghena ghole — tsalina hi ketizenkesa tsüwa wi ha saaden.

²⁸IBa, n-nyankethang sa keyawa salo!” Tsaseng wi tang wina ahhai kesü gho, “Hi anyankethang sa chidha, nu hi tsü sa neng chiden.”

²⁹Anyitenti ciwi ngan kebenthu na tsü zaya nu pahan na tsüna atsankeshigü le khi, nu kepathu na “Tangnyilo kesü ma ccüneng benle!” khi.

³⁰Isala Jisu na mathu wi khi, “Ahhai tsüna ighena nyela nthu ghena ghole.

³¹Khili ha ayyi nyi jühkaghaten den; khili ha ayyi hawi kekhang kesenthu jügüa tendha.

³²Ayyi wi hi zankiya lethu, hi anyi tsüdi zan pi hi wi chiya ben.”

³³(Ha kekhi ha ma keshü khati kesa wi shü ten khe pi ccüca kechi.)

³⁴ Anyitenti na luneng, “Khrista tsüna anuphanla hang benle kesa Ayenwa na ithu kizaben. Isathu, no khati nu Anyi Tsawa tsü zankiya nsathu yishü le khiya mehai nu? Anyi Tsawa tsüna thowa nu?”

³⁵Jisu na luneng, “Kewegüwa na matsü keu nthu jawi benden. Kejangwa na nthu wi ngho thsüle kesalina kewegüwa keben jü ciwi alentsen tenlo; kepaghenanye kejang wi alentsen ketenwa na ma khiewa wa ten khe chü nten.

³⁶Kewegüwa na nthu jawi keben jü tsü nondiyalo, isathu nthu na kewegü tsangathu sayaben.” Jisu na ha khichi nu mathu kuthi bvüa.

³⁷Ma mathu jawi azensuthu ha tsüdi sachi lela mathu na ma nondi meya,

³⁸ tsalina kheni Isa atusenjüh- kechüwa na kekhi tsü sacen: “Apvüwa, thowa na ithu ketsijüh ha nondiya nu? Apvüwa na ma kekhang pi thowa ccücachi nu?”

³⁹Tsalina mathu na nondi meyala, kepaghenanye Isa na hati la khi:

⁴⁰ “Anyiza na mathu nyon pabhon nu mathu leben shanbhondha; isanu mathu nyon pi mu nu mathu leben pi chüshiya, nu hi wi kheneng ghothu hi mathu sa pi mehai cüthu keyishü ghena.”

⁴¹Isa na Jisu nyankethang nu ma cüki khi ketheng ghena ma ha khichi.

⁴²Tsüti sa lela Judah nyi kekhang kesenthu kejon na Jisu nondiya; isala Farisithu na Sinagog wi mathu jügüshithu kemessi ghena mangla nkhi la.

⁴³Kepaghenanye mathu na Anyiza miwi anyi kesengwa tsü nen kesalina.

⁴⁴Jisu na jisha nu khi, “Anyi thowa na hi nondi ten khe hi kesun kechiwa la nondiden.

⁴⁵Nu thowa na hi mu ten khe hi kesun kechiwa la muden.

⁴⁶Hi kewegüwa sa nu ayyi wi gho, isanu thowa na hi nondi ten khe kejang wi ben meyacha.

⁴⁷Keujüla kesü le kesü lela ijüh zaya nu tsü n-nondi lethu, hi ma ghan-nan nten. Kepaghenanye hi ayyi nyi meshensale kesawa nyela tsü hangshayale kesa ghena gho.

⁴⁸Thowa na hi meya mvu nu ijüh kina nten khe ma ghan-nan ketenwa kesü na ben. Hi kekhi jühthu tsüna atsathang sakhen wi ma kaghanwa saben.

⁴⁹Tsüna ntsakhiwa, kepaghenanye hi ketanla hi kekhang wina nkhi, isala Abawa hi kesun kechiwa na hi nkhithu keyishü pi hi kiza.

⁵⁰Nu ma khikechi tsüna anuphan kahang senghoden kesa hi chüben. Tsalina hi mangwa khi khe tsüna Abawa na hi khilo kekiza le!”