Read Northern Rengma Naga JOHAN 14 Bible Online

JOHAN 14 - Northern Rengma Naga bible

JOHAN 14

¹Jisu na mathu kiza, “Nthu leben ketizen nsala. Anyiza nondiben, nu hi la nondiben yalo.

²IBa jjen wi apen kejonla ben; keujüla tsüti nyelethu, hi wa nthu ghena apen kiden tenle nthu kiza kesa kwe?

³Hi wala nthu pen kidenya lethu hi kheneng gho nthu ssiyaben, isanu nthu la hi keben pen wi benyaben.

⁴Nthu na hi wa keten pen lenwa tsü chüben.”

⁵Thoma na ma wi keü, “Apvüwa, ikhang na no khiewa waten khe nchü, tsalina ikhang khatinu tsü chüyaben nu?”

⁶Jisu na ma luneng, “Hi alenwa, atsentsawa, nu kahangwa; anyi thola hi wina nkenye tsü Abawa wi waya nben.

⁷Keujüla nthu na hi chü lethu, iBa la chüben; nu khili nten nthu na ma chüben, nu ma muyadha.”

⁸Filip na ma wi khi, “Apvüwa, Abawa tsü pi ikhang ccücalo, tsüna ikhang kenenwa le!”

⁹Jisu na luneng, “Hi matsü kesie nthu ssiben wadha; isala Filip, no hi nchü kwe? Thowa na hi muya khe Abawa la muyadha. Isathu, no khatinu “Abawa pi ikhang ccücalo khiten nu?

¹⁰Filip, no hi Abawa wi ben, nu Abawa na hi wi ben kesa tsü n-nondi kwe? Hi ajüh pi nthu kekiza tsüna hi kekhang wina nkhi, isala Abawa na hiwi ben nu ma kekuli saben.

¹¹Hi Abawa wi ben nu Abawa na hi wi ben kesa tsü nondi yalo, nyelela hi amankesa kekulithu wina nondi yalo.

¹²Hi atsentsawa nthu kizaden, thowa na hi nodiya khe hi sa ketenwa tsü ma la sayaden — anle, ma hathu miwi la kediki sayaden, kepaghenanye hi Abawa wi wa tendha.

¹³Nthu na inyan wina pala katsüha lela khiethu hi sa cüben, isanu Atsawa miwi na Abawa nyankethang pi ccücaben.

¹⁴Keujüla nthu na inyan wina pala katsüha hi wi khie lethu, hi tsü sa cüben.

¹⁵“Keujüla nthu na hi tizenghali lethu, nthu na iyenkhuchithu nie ben.

¹⁶Hi Abawa wi khiethu, ma anuphan nthu ssiben keten Kekiqa kepawa pi nthu cüben.

¹⁷Ma Aghamu, atsentsa Abawa cüki pi ccücaden. Ayyi nyi na ma yaya nben, kepaghenanye tsü na ma nmu nyelela nchü. Isala nthu tsü ma chüben, kepaghenanye ma nthu wi ben nu nthu wi hangben.

¹⁸“Hi nthu teshi pi nthu ketan ben thsü nben; hi nthu wi ghoneng ben.

¹⁹Matsü keujü ayyi nyi na hi nmu laben, isala nthu na hi muben; nu hi hangkeben ghena nthu la hangyaben.

²⁰Tsü ghanan gho lethu, nthu na hi iBa wi ben nu hi nthu wi keben tsüti nthu na hi wi ben kesa chüyaben.

²¹“Thowa na iyenkhukechithu ha yaya nu tsü nieten khe ma hi tizenghali ketenwa tsü. IBa na thowa hi tizenghali ten khe tsü tizenghali den. Hi la ma tizenghali nu hi pi ma ccüca den.”

²²Judah (Judah Iskariot nye) na keü, “Apvüwa, no khati nu no ketanla no pi ayyi nyi nccücala pi ikhang ccücaya mehai nu?”

²³Jisu na ma luneng, “Thowa na hi tizenghali ten khe hi kesansijüh nie ben. IBa na ma tizenghali ben, nu iBa ishinyi na ma wi gho ma ssinu hangben.

²⁴Thowa na hi tizenghali nten khe hi kesansijüh la nie nten. Nthu na zakeya kesansijüh tsüna ijüh nye, isala Abawa hi kesun kechiwa jüh.

²⁵“Hi nthu ssi keben jü wina ha pi nthu kizadha.

²⁶Kekiqawa, Kemetha Ghamu, Abawa na inyan wina kesunchi ketenwa tsüna pala tsüdi pi nthu sansi cüben nu nthu yala hi pi nthu kekiza tsüdila meshen nengya thsüaben.”

²⁷“Hi kecca pi nthu cüben; tsüna iji kecca hi pi nthu cüben. Ayyi nyi na pi kecü ti hi tsü pi nthu cü nben. Nthu leben ketizen sa hathana nu nmessi lalo.

²⁸Hi nthu wi kekiza tsü nthu na zayadha, ‘Hi bvüaden, isala hi nthu wi gho neng den.’ Keujüla nthu na hi tizenghali lethu, hi Abawa wi wa keten ghena nthu nonghe kesa, kepaghenanye ma imiwi diki.

²⁹Hathu ha tsüdi npi sa kegho wina hi nthu kizadha, isanu tsü sa kegho wi nthu nondiya thsüle kesalina.

³⁰Hi matsü kesie nthu ccüneng benya ntendha, kepaghenanye ayyi ha wi kekhang kesenwa na gho tendha. Ma imiwi kekhang nmi,

³¹isala ayyi nyi na hi Abawa tizenghaliden kesa chü meyathu yishü, tsalina hi ma kekhi tsüdila saden. “Ghalo, ikhang he wina bvüa na.