Read Northern Rengma Naga JOHAN 15 Bible Online

JOHAN 15 - Northern Rengma Naga bible

JOHAN 15

¹“Hi kemeshentsse ton ntsawa, nu iBa na alli kenonccawa.

²Ma hi wi acüna kesü le kesü lela abi nkebünwa tsü shüchiaben, nu ma acüna abi bün kebenwa tsü satemetha, isanu tsü ya metha nu abi kejon bünya thsüle kesalina.

³Hi kesansijüh pi nthu kecü tsü ghena nthu na satemetha yadha.

⁴Hi wi benyalo, isathu hi la nthu wi benyaden. Acüna kesü na maton wi nkeben tsü ma ketanla abi bün nkeya tsüti nthu la hi wi nkeben tsü nthu bi bünya nben.

⁵“Hi kemeshentsse tonwa nu nthu na acünathu. Thowa na hi wi ben nu hi ma wi ben khe abi kejon bün yaben, kepaghenanye nthu na hi nsenla mangla saya nben.

⁶Anyi thowa na hi wi nben khe tsüna acüna kesü pi khala nu shü thsü keten tsüti; hati kesa cünathu saghu pi annibhon wi khalachi nu mecang thsüaben.

⁷Keujüla nthu na hi wi ben nu ijühthu na nthu wi ben lethu, nthu na mangwa nen khe khielo, isathu pi nthu cüben.

⁸Nthu bi kejon bünkeya wina iBa nyankethangwa tsü pi ccüca chiben; hati nu nthu na hi sansikeyathu sayaben.

⁹Iba na hi tizenghali keten tsüti hi la nthu tizenghali den, hi tizenghali wi ben yalo.

¹⁰Hi iBa yenkhukechithu nieya nu ma tizenghali wi ben keten tsüti keujüla nthu na iyenkhukechithu tsü nieten lethu, hi tizenghali wi benya ben.

¹¹“Inonkeghe na nthu wi benya nu nthu nonkeghe ya cencuya thsüle kesalina hi ha pi nthu kizadha.

¹² Hawa ha iyenkhukechi: hi nthu tizenghali kesa tsüti nthu la khokho tizenghali liyalo.

¹³Anyi meshu kesü ma pvüshangthu ghena tizenghali di ntsawa benya kemehai tsüna mathu ghena ma kahangli khukechi.

¹⁴Keujüla hi nthu kekizathu tsü saten lethu, nthu na ipvüshangthu.

¹⁵Hi nthu pi amaghathu le ncidha, kepaghenanye amaghawa na ma pvüwa na mangwa saten khe chü nten. Hi nthu pi ipvüshangthu isa ciden, kepaghenanye hi iBa wi zakeya tsüdi pi nthu kizadha.

¹⁶Nthu na hi kessi meya, isala hi nthu ya wa nu nthu bi anuphan benya keten tsü kejon bünyalo kesalina hi nthu kessiya nu nthu pi kekuli sa thsü. Isathu nthu inyan wina Abawa wi mangwa khie khe ma tsü pi nthu cüden.

¹⁷Hawa ha iyenkhuchi pi nthu kecü: nthu khokho tizenghali liyalo.

¹⁸“Keujüla ayyi nyi na nthu nanmeghü lethu, tsüna hi nanmeghü tegüdha le kesa meshen yalo.

¹⁹Keujüla nthu na ayyi nyi lethu, ayyi nyi na ma ji ti nthu tizenghali kesa. Isala hi ayyi hawa wina nthu kessiya kesalina nthu na ayyi nyi nye; tsalina ayyi nyi na nthu nanmeghüden.

²⁰ Hi pi nthu kekiza tsü meshen yalo, ‘Amagha kesü tsüna ma pvüwa miwi ndiki.’ Keujüla mathu na hi metenmesha lethu, nthu la meten- mesha ben; nu hi kesansijüh kina lethu, nthu jüh la kina ben.

²¹Isala nthu na iji ghena mathu na ha tsüdi nthu miwi sachi ben; kepaghenanye mathu na hi kesun kechiwa tsü nchü.

²²Keujüla hi ghola mathu nkiza lethu, mathu na kesami ben nkesa; isala khili mathu kesami ghena teshi kecü nmidha.

²³Thowa na hi nanmeghü ten khe iBa la nanmeghü den.

²⁴Keujüla hi mathu jawi thola saya nketen kekulithu nsachi lethu, mathu na kesami ben nkesa; isala mathu khili hi kekuli tsü muya nu iBa ishinyi qho nanmeghü wadha.

²⁵ Isala mathu yenwa wi hati zhüketheng tsü cenya thsüle kesalina, ‘Mathu na ajjügi nkemi wina hi nanmeghü.’

²⁶“Khathansha wi hi Abawa wina kesun pi nthu wi chi keten Kekiqawa, Abawa wina keshhugho atsentsa Ghamu tsüna gho khe ma isheipi ben.

²⁷Nu nthu la isheipi ben, kepaghenanye nthu aghatsan wina hi gweghe den.