Read Northern Rengma Naga JOHAN 16 Bible Online

JOHAN 16 - Northern Rengma Naga bible

JOHAN 16

¹“Nthu kenondi nteshi thsüle kesalina hi ha pi nthu kizadha.

²Sinagogthu wina nthu jügüshiaben, ntsakhiwa, thowa na nthu pathi khe ma tsüti kesa wina Anyiza kekuli sa benle kemeshen matsü na gho tendha.

³Anyithu na nthu miwi hathu ha saben, kepaghenanye mathu na Abawa nyelela hi la nchü.

⁴Isala hi ha pi nthu kizadha, isanu khathansha wi mathu ghena hathu ha sale kesa matsü na gho khe, nthu na hi nthu kekiza tsü meshen yaben. “Hi nthu ssiben keten ghena hi aghatsan wi hathu pi nthu nkiza.

⁵Isala hi khili hi kesun kechiwa wi wa tendha, isani nthu kesüla hi khiewa wa ten khe nkeü.

⁶Hi khili hathu pi nthu kekiza ghena hathakina na nthu leben pongdha.

⁷Isala hi atsentsawa nthu kizaden: hi bvü kesawa nthu ghena mehai, kepaghenanye keujüla hi nbvü lethu, Kekiqawa tsüna nthu miwi gho nben. Isala keujüla hi bvü lethu hi ma kesun pi nthu wi chi cüben.

⁸Nu ma gho lethu, ma ayyi nyithu kesami cüki, ketsatan cüki, nu Anyiza jüh kekaghaten cüki sazzi keben tsü khiti pi kizaden.

⁹Mathu na kesami cüki wi sazzi ben, kepaghenanye mathu na hi n-nondi;

¹⁰mathu na ketsatan cüki wi sazzi ben, kepaghenanye hi iBa wi wa tendha nu nthu na hi mu nbendha,

¹¹nu mathu na ajühkekaghaten cüki wi sazzi ben, kepaghenanye ayyi hawi kekhang kesenwa jühkaghaten tendha.

¹²“Hi pala kejon pi nthu kizale ben, isala nthu na khili tsü chüya nben.

¹³Khathansha wi Aghamu tsüna gho khe ma Anyiza cüki atsentsa pi ccücaben, ma nthu ssi wa atsentsawa wi chi cüben. Kepaghenanye ma ma kekhang wina khi nben, isala ma za keyathu tsü khi nu haseng wi gho keten cüki pi nthu kizaben.

¹⁴Ma inyanthang chi cüben, kepaghenanye ma ijüh khuya nu pi nthu kizaben.

¹⁵Abawa keben tsüdila iji; tsalina hi hati khi, ‘Aghamu na iji khuya nu pi nthu kizaben.’ ”

¹⁶“Matsü keujü nthu na hi nmula ben, nu matsü keu seng wi nthu na kheneng hi mu yaben.”

¹⁷Ma sansikeyathu pahan na mathu jawi khokho wi keü, “Ma hati ikhang kekiza ha ma jjügi mangwa nu? ‘Matsü keujü nthu na hi nmula ben, nu matsü keu seng wi nthu na kheneng hi muya ben.’ nu ma hati la khi, ‘Tsüna hi Abawa wi wa keten ghena.’

¹⁸Mathu kekhi na ‘matsü keujü’ tsüna mang jjügi nu? Ikhang na ma mangwa khiben khe nchü le!”

¹⁹Jisu na mathu ma wi keü mvu keben tsü chüya, tsalina ma mathu wi khi, “Hi ‘matsü keujü nthu na hi nmula ben, nu matsü keu seng wi nthu na kheneng hi muya ben,’ kekhi tsüna ajjügi mangwa nu kesa nthu jawi khokho wi keüben kwe?

²⁰Hi atsentsawa nthu kizaden: nthu na qai nu ahathana ben, isala ayyi nyi na anonghe ben; nthu na ahathana ntsa saben, isala nthu hathakina tsü khapeghe pi nonkeghe saben.

²¹Nza kesü na pvüghale keben wi ma güccü benden, kepaghenanye ma ketizenkesa tsüwa na ghodha; isala ma atsanga pvüghaya lethu, ma ketizen kesawa tsü maliden, kepaghenanye ma atsanga kesü pvügha pi ayyi wi chiya kesa ghena ma nongheden.

²²Tsü makesü nthu na khili ahathana ben; isala hi nthu wi gho neng ben, nu nthu leben wi nonkeghe benya ben, thola nthu nonkeghe tsü khusen bvü meyacha.

²³“Tsü tsathang kegho wi nthu na hi wi mangla khie nben. Hi atsentsawa nthu kizaden: keujüla nthu na inyan wina Abawa wi katsüha lela khie lethu ma tsü pi nthu cüben.

²⁴Khili kecu nthu na inyan wina mangla npi khie, khielo nthu na muya ben, isathu nthu nonkeghewa tsü cencu yaben.

²⁵“Hi ajühkaghapethu sen nu hathu pi nthu kiza. Isala matsüwa na ghothu hi ajühkaghape hathu nsendha, isani nkuthila Abawa cüki pi nthu wi khiben.

²⁶Tsü tsathang na gho lethu, nthu na inyan wina ma wi khieden, nu hi nthu mithon wina Abawa wi khie tenle nkhidha.

²⁷Kepaghenanye nthu na hi tizenghali nu hi Abawa wina ghole kesa nondiya kesalina Abawa na ma ketanla nthu tizenghaliden.

²⁸Hi Abawa wina ayyi wi gho, nu khili ayyi teshi nu Abawa wi wa tendha.”

²⁹Tsaseng wi ma sansikeyathu na ma wi khi, “No khili ajühkaghape nsenla khitha bendha.

³⁰Ikhang na khilitsü no pala tsüdi chübenle kesa chüyadha; nu thola no wi pala nkeü thsü la mehaidha. Ha ghena ikhang na no Anyiza wina ghole kesa nondiya thsüben.”

³¹Jisu na mathu luneng, “Nthu khilitsü nondi bendha ma?

³²Matsü na ghoden, nu tsüna khili ghodha, nthu tsüdila bvüzighe nu papa jjen wi wa, nu hi ketan saaben. Isala hi ketan nye, kepaghenanye Abawa na hi ssi benden.

³³Nthu hi wi keben ghena kecca benya thsüle kesalina hi ha pi nthu kizadha. Nthu na ayyi hawi ketizen saben. Isala nthu kempvüza sayalo! Hi ayyi ha miwi khangyadha.