Read Northern Rengma Naga JOHAN 17 Bible Online

JOHAN 17 - Northern Rengma Naga bible

JOHAN 17

¹Jisu na ajüh ha kekhi cen seng wi ma tang wi ghang nu khi, “IBa, matsü na ghodha. Atsawa ya n-nyanthangya thsüle kesalina anyankethang pi Atsawa cülo.

²Kepaghenanye ma anuphan kahang pi no pi ma kecüthu tsüdi cü thsüle kesalina no anyi tsüdi miwi kekhang pi ma cüdha.

³Nu anuphan kahang ma jjügi no atsentsawa Nyiza, nu no kesun kechiwa Jisu Khrista tsü chüya thsüle kesalina.

⁴No hi ya salo kesa pi hi kecü tsü sacen kechi wina hi n-nyankethang pi ayyi nyi ccüca chidha.

⁵O, iBa, kheni ayyi npi sakechi wi hi no gweghe keben wi nyankethang tsü makesü khili no inyanthang chi cülo.

⁶“Hi n-nyan pi no ayyi wi anyithu pi hi kecüthu wi chüya thsüdha. Mathu na nji, nu no mathu pi hi cü. Mathu na njüh kinayadha,

⁷nu mathu no pala pi hi kecü tsüdila no wina ghole kesa chüyadha.

⁸No ketsijüh pi hi kecüthu hi tsü pi mathu cü nu mathu tsü yayadha; mathu na hi ntsakhiwa no wina ghole kesa chüyadha, nu no hi kesun chile kesa nondiyadha.

⁹“Hi mathu ghena khieben. Hi ayyi nyithu ghena nyela no pi hi kecüthu ghena khieben, kepaghenanye mathu na nji.

¹⁰Hi keben tsüdila nji, nu no keben tsüdila iji; nu hi mathu wina inyankethang sa chidha.

¹¹Hi khili no wi gha tendha; hi khilitsü ayyi ha wi nbendha, isala mathu tsü ha wi benden. O, Kemetha Bawa! No pi hi kecüthu tsü n-nyan kekhang wina mathu noncca ben tenlo, isanu mathu la ishinyi ti kesütan saben thsülo.

¹² No pi hi kecüthu tsü hi mathu ssi keten chu n-nyan kekhang wina hi mathu noncca ghole. Hi mathu hie gho nu kesütanla nbhatagha thsü, isani Ntsawajüh wi zhüketheng tsü cenyale kesalina meshu kesü kheni na ma cüki khi ketheng tsüti bhatagha.

¹³Nu hi khili no wi gha tendha, inonkeghe ya mathu miwi ben cencuya thsüle kesalina hi ayyi wi keben jü hathu ha khiben.

¹⁴Hi njüh pi mathu cüchidha, nu ayyi nyi na mathu nanmeghü ben, kepaghenanye hi ayyi ji nkenye tsüti mathu la ayyi ji nye.

¹⁵Hi no ayyi wi mathu ssiyalo khie nben, isala atsaghang nkemehaiwa kwen wina mathu noncca yalo khieben.

¹⁶Hi ayyi ji nkenye tsüti mathu la ayyi ji nye.

¹⁷Atsentsawa pi mathu satemetha pi no wi chiyalo; njüh na atsentsawa.

¹⁸No hi kesun pi ayyi wi kechi tsüti hi la mathu kesun pi ayyi wi chidha.

¹⁹Nu mathu la atsentsa wina satemetha pi no wi chiya thsüle kesalina mathu ghena hi ketanla hi satemetha pi no wi chiben.

²⁰“Hi khili mathu ghena ketan khie nbendha, isala anyi mathu jüh wina hi nondi kebenthu ghena la khieben.

²¹Mathu tsüdila kesütan saya thsülo khieben. O, iBa, no hi kesun chile kesa ayyi nyi ya nondiya thsüle kesalina no hi wi ben nu hi la no wi ben keten tsüti mathu la ishinyi wi benya thsülo.

²²Mathu la ishinyi ti kesütan saya thsüle kesalina no anyankethang pi hi kecü tsü hi la pi mathu cüdha.

²³Ayyi nyi yala no hi kesunchi nu hi tizenghali keten tsüti mathu la tizenghali tenle kesa chüya thsüle kesalina hi no wi ben, nu no hi wi ben, isanu mathu ya kesütan saya thsülo.

²⁴“O, iBa, no mathu pi hi cüdha, mathu ya no pi hi kecü inyankethang tsü muya thsüle kesalina hi mathu pi hi gweghe ben thsü mvu ben, kepaghenanye no ayyi npi sakechi wina hi tizenghali den.

²⁵O, Ketsatan Bawa! Ayyi nyi na no nchü, isala hi tsü no chü, nu hathu ha no hi kesun chile kesa chüben.

²⁶No ighena tizenghali kebenwa tsü mathu wi la benya nu hi la mathu wi benya thsüle kesalina hi n-nyan pi mathu chüya thsüdha, nu tsüti sa benden.”