Read Northern Rengma Naga JOHAN 20 Bible Online

JOHAN 20 - Northern Rengma Naga bible

JOHAN 20

¹Apvüwa tsathang wi ghanen mitu atsajang keben wi Magdalen Maria na ashüjjen wi wha nan ashüjjen lon khakuli ketheng muya.

²Tsalina ma bvü sen wa Simon Pitor nu Jisu tizenghali keten sansikeyawa keni wi kiza, “Mathu ashüjjen wina Apvüwa kamang pie bvüdhale, nu ikhang na mathu ma pie wa khie wi chitheng khe nchü.”

³Tsaseng wi Pitor na shagha sansikeya kepawa ssiya nu manyi gweghe ashüjjen wi wa.

⁴Manyi qho bvü sen nu wa, isala sansikeya kepawa na Pitor tughe sen wa ashüjjen cuya.

⁵Ma kukedu ghangchi nan ciwi linen thsü ketan keben mu, isala ma ciwi ndu.

⁶Tsaseng wi Simon Pitor na gho nu ashüjjen non wi du. Ma linen thsü ciwi keben mu,

⁷nu Jisu li kekijithsü la ciwi ben. Tsüna linen thsü manyi nsaghu, isani ma kepa sa apen kepawa meshenghu ben.

⁸Tsaseng wi wa ashüjjen cu tegü keya sansikeya kepawa la ashüjjen wi du tsü muya nu nondiya.

⁹(Kepaghenanye manyi khili kecu Ntsawajüh wi ma keshü wina hangneng-shagha ben kesa zhüketheng tsü npi chüshiya.)

¹⁰Tsaseng wi sansikeya keni na kheneng manyi jjen wi wha.

¹¹Isala Maria na ashüjjen kete wi ngan nu qaiben. Ma qaiben meshi kukedu ashüjjen wi ghangchi nan

¹²ciwi tangnyilo meshu keni athsü kemiki mphi nu Jisu kamang pi kechi pen wi kesü na aliwa nu kepawa na accüwa wi donki keben muya.

¹³Manyi ma wi keü, “Nzawa, no mangkesa na qaiben nu?” Nzawa na luneng, “Mathu na iPvüwa pie bvüdha, nu mathu na ma pi khie wi chitheng khe hi nchü le!”

¹⁴Tsaseng wi ma ghangkevüli chi nan Jisu na ciwi ngan keben muya; isala ma tsüna Jisu le kesa chüshi meya.

¹⁵Jisu na ma keü, “Nzawa, no mangkesa na qaiben nu? No thowa bhaten nu?” Nzawa na tsüwa tsüna asanku kenonccawa she meshen nu ma wi khi, “Kediwa, no ma pieya lethu, ma pi khiewi chitheng khe hi kizalo, hi wa ma pieya tenle!”

¹⁶Jisu na ma wi khi, “Maria!” Nzawa na ma wiwa khapeghe nu Ibri jüh wina, “Rabboni” (ma jjügi “Kesansiwa”) isa khi.

¹⁷Jisu na ma wi kiza, “No hi ghanten nben lalo, kepaghenanye hi Abawa wi npi wa. Isala wala icünyuthu wi hi iBa nu nthu Ba, iNyiza nu nthu Nyiza wi wa nengdha le kizalo.”

¹⁸Tsalina Magdalen Maria na wala ma Apvüwa mudhale nu ma pala hathu pi ma kizale kesa pi sansikeyathu kizachia.

¹⁹Apvüwa tsathang minulen wi sansikeyathu na Judah nyi messila ajjen khenten pvünu keben wi Jisu na ghola mathu jawi nganya nu mathu wi kiza, “Kecca nthu ssiben keyawa salo.”

²⁰Ma tsüti khi nu ma kwen nu ma menni pi mathu ccüca. Sansikeyathu na Apvüwa muya meyi mathu nonghe ntsa saya.

²¹Jisu na kheneng mathu wi khi, “Kecca ya nthu ssiben keyawa salo. IBa na hi kesun kechi tsüti hi la nthu kesun chiben.”

²²Tsaseng wi ma hathakissa pi mathu miwi chi nu khi, “Nthu Kemetha Ghamu yayalo.

²³ Keujüla nthu na nyu kesami teshi pi cü lethu, teshi pi mathu cüdha; keujüla nthu na teshi pi mathu ncü lethu, teshi pi mathu ncü.”

²⁴Jisu kegho wi Thoma (Deduma le kesawa tsü) na sansikeyathu taghakeni jawi kesü tsüna mathu gweghe nmi.

²⁵Tsalina sansikeyathu kepa na ma wi kiza, “Ikhang na Apvüwa mudha le!” Thoma na mathu kiza, “Hi tsü ma kwen wi kejen yisü mu nu ikwenzza pi ayisü nu ma menni npi pakeya chu nondiya nben.”

²⁶Ghanan tagü seng wi sansikeyathu na kheneng ajjen khenten pvüben, nu Thoma la mathu gweghe ben. Ajenkathu khen theng, isala Jisu na dugho mathu jawi nganya nu khi, “Kecca ya nthu ssiben keyawa salo.”

²⁷Tsaseng wi ma Thoma wi kiza, “Nkwenzza pi panan nu ikwen ghangchilo, nu nkwen chang pi imenni pananlo. Nkesütu layi, isala nondiki benyalo!”

²⁸Thoma na ma luneng, “IPvüwa, nu iNyiza!”

²⁹Jisu na ma wi khi, “No hi kemu ghena nondiben ma? Hi nmula nondi kebenthu tsü khatila mihhidha nu!”

³⁰Jisu na sansikeyathu tuwi na amankesa kejon sa kechi pi lesüshen hawi zhü ntheng.

³¹Isala nthu yala Jisu tsüna Khrista nu Anyiza Tsawa le kesa nondi nu tsü kenondi ghena ma nyan wina kahang muya thsüle kesalina hathu ha zhü chitheng.