Read Northern Rengma Naga JOHAN 21 Bible Online

JOHAN 21 - Northern Rengma Naga bible

JOHAN 21

¹Tsaseng wi Jisu na kheneng Tiberia Ghajü kete wi ma sansikeyathu tuwi gho. Ma hati nu ma ketanla ma pi ccücachi.

²Ciwi Simon Pitor, Thoma (Deduma le kekhiwa), Nathanael (Galilee yyi Kana wina keghowa), Zebedee tsathu, nu kepa wi ma sansikeya meshu keni tsüdi gweghe ben.

³ Simon Pitor na kepathu wi khi, “Hi anga cü waten le!” Mathu na ma wi kiza, “Ikhang la no gweghe waden.” Tsalina mathu ahun wi duya nu wa, isala mathu tsü ghaja mangla ghan meya.

⁴Ghanenwa aghani na keshhugho seng wi Jisu aghüsa wi nganben, isala sansikeyathu na tsüna Jisu le kesa nchü.

⁵Jisu na mathu wi keü, “Ipvüshangthu, nthu na anga ghanyale nu?” Mathu na luneng, “Ikhang mangla ghan meya le!”

⁶ Ma mathu wi kiza, “Nthu kaghanthsü pi ahun na ajewa cüchilo, isathu nthu na pahan ghanya benna.” Tsalina mathu na kaghanthsü pi cüchi nu ciwi kejon cüya kesalina mathu kaghanthsü zanki meyala.

⁷Jisu ma tizenghali keten sansikeyawa na Pitor wi kiza, “Hawa ha Apvüwa le!” Pitor na tsüna Apvüwa le kesa zakeya wi (ma thsü khushi pi ketheng ghena) athsü pi ma kejiya nu atssü non wi pendua.

⁸Sansikeyathu kepa na ahun wina gho anga na kaghanthsü pongti keben tsü zanshiya. Mathu na aghüsa temeja wi nye, isani majü na meter meza-u wi ketan.

⁹Mathu na shhugho aghüsa cukeya wi amihi pi anni sa nu anga pi tsü miwi chi ketheng nu amesa la muya.

¹⁰Tsaseng wi Jisu na mathu wi kiza, “Nthu na khili anga ghankeya tsü pahan sen nu gholo.”

¹¹Simon Pitor na aghüsa wi whala kaghanthsü wi anga ketiti meza nu deni nu kecheng keben tsü zanshi pi aghüsa wi chiya; ciwi anga kejon na ben lela kaghanthsü tsü npaqhela zanshiya.

¹²Jisu na mathu wi kiza, “Nthu ghola leben-nacü yalo.” Khilitsü sansikeyathu thola “No thowa nu?” ma keü nmessi ladha, kepaghenanye mathu na ma Apvüwa le kesa chüyadha.

¹³Tsalina Jisu na ghola amesa nu anga khuya nu pi mathu cü.

¹⁴Ha khili kecheng tughuwa Jisu na ma keshü wina hangneng-keshagha seng wi sansikeyathu tuwi gho bendha.

¹⁵Mathu dsajjükeya seng wi Jisu na Simon Pitor wi keü, “Simon, Johan tsawa, no hathu nu kepa miwi la hi tizenghali ben ma?” Simon na luneng, “Anle, Apvüwa, hi no tizenghaliden kesa no chüben.” Jisu ma wi kiza, “Ikhaghaneni zzathu nonccayalo.”

¹⁶Jisu na keni tughuwa la ma wi keü, “Simon, Johan tsawa, no hi tizenghaliben ma?” Simon na luneng, “Anle, Apvüwa, hi no tizenghaliden kesa no chüben.” Jisu na ma wi khi, “Ikhaghaneni nonccayalo.”

¹⁷Jisu na kecheng tughuwa ma wi keü, “Simon Johan tsawa, no hi tizenghaliben ma?” Jisu na kecheng tughu ma wi “No hi tizenghaliben ma?” kekeü ghena Simon na ma hathana wa, tsalina ma khi, “Apvüwa, no pala tsüdila chüben; hi no tizenghaliben kesa no chüben le!” Jisu na ma wi khi, “Ikhaghaneni nonccayalo.

¹⁸Hi atsentsawa no kizaden: no kepvünyi tsüwi no ketanla ngeshi qhanya nu no kewa mvu wi waaben; isala no qhai wa lethu, nkwen zanki nu nyu na ngeshi qhan nu no ssinu no nkewa mvu pen wi waaben.”

¹⁹(Ha Jisu na Pitor khati kesa wi shü nu Anyiza nyankethang sengho ben khe tsü khi kechi.) Tsaseng wi Jisu na ma wi khi, “Hi nie ghalo!”

²⁰ Pitor na khapeghe wa Jisu ma tizenghali keten sansikeyawa hatu wi dsajjü keben wi Jisu tetsaki wha nu “Apvüwa, thowa na no matsa ben nu?” tsüti kekeüwa tsüna ma seng wi keben muya.

²¹Pitor na ma muya nu Jisu wi keü, “Apvüwa, anyi hawa tsü khati saben nu?”

²²Jisu na ma luneng, “Keujüla hi kenen lethu, hi npi kegho chu ma hangya thsüben, tsüna nghena mangwa ben nu? Hi nie ghalo!”

²³Tsalina sansikeya hawa ha shü nbenle kekhi tsüna Jisu senkeniethu jawi khi wa. Isala Jisu na ma shü nbenle nkhi, isani “Keujüla hi kenen lethu, hi npi kegho chu ma hangya thsüben, tsüna nghena mangwa ben nu?” isa khi.

²⁴Hawa ha sansikeya nyi ma hathu khi nu tsüthu la zhüchi, nu ithu na ma sheikepi tsüna atsentsa le kesa chüben.

²⁵Jisu na kulikechi kepa wi la kejon na ben. Keujüla tsüthu tsü kesüsü na zhü wa lethu, hi kemeshen tsü ayyi ha maben wi lela lesüshenthu tsü kechi pen nmi laben.