Read Northern Rengma Naga JOHAN 7 Bible Online

JOHAN 7 - Northern Rengma Naga bible

JOHAN 7

¹Tsaseng wi Jisu na Galilee yyi wi wa; ma Judea wi nwa mvu, kepaghenanye Judah nyi kekhang kesenthu na ma pathiale bhaden.

²Kelishu Kho kesa tsü na cu wadha,

³tsalina Jisu cünyuthu na ma wi khi, “No keniethu la no kuli kebenthu muya thsüle kesalina no apen ha teshi nu Judea wi walo.

⁴Kepaghenanye anyi kesütanla nyu ya ma chüya thsüle sathu nyu kuthi nu kuli nten. No hathu kuli keben ghena ayyi nyithu yala no chüya thsülo!”

⁵(Ma cünyuthu lela ma nondi nten.)

⁶Jisu na mathu wi khi, “Itsüwa na npi cu, isala nthu tsüwa tsü keshüthangla ben.

⁷Ayyi nyithu na nthu nanmeghü meyacha, isala hi nanmeghü ben, kepaghenanye hi mathu kekulithu tsüna nmehai le pi kiza keten ghena.

⁸Nthu na akho witsü shulo. Hi akho hawa ha wi shuya nten, kepaghenanye itsüwa na npi cu.”

⁹Ma hati khi nu Galilee wi ben wa.

¹⁰Ma cünyuthu na akho wi keshu seng wi Jisu la nyu nchü thsüla kuthi akho wi wa.

¹¹Judah nyi kekhang kesenthu na akho witsü Jisu bha nu “Ma khiewa ben nu?” tsüti keü.

¹²Ciwi anyitenti jawi kicennali nu pahan na “Ma anyi kemehai kesü le,” nu kepa na “Nyele, ma anyi ssideja tenle,” isa khi.

¹³Isala mathu na Judah nyi kekhang kesenthu kemessi ghena thola ma cüki tsü khishi nwa.

¹⁴Akho tsü sa mnon keben wi Jisu na wa Kekinyijjen wi nyu sansi shhu.

¹⁵Judah nyi kekhang kesenthu na ma kesansi jüh ghena amansa nu khi, “Anyi hawa ha khiela lesüjjen wi nwa lethu, ma khati nu pala hajuju chüben nu?”

¹⁶Tsalina Jisu na mathu wi khi, “Hi pi nthu kesansi jüh hana ijüh nye, isala hi kesun kechiwa jüh le!

¹⁷Keujüla anyi kesü le kesü lela Anyiza kenenwa tsü sa mvu ten lethu, ma hi kesansi jühwa hana Anyiza wina ghola hi ketanla hi kekhang wina khiben khe chüya ben.

¹⁸Anyi thowa na ma ketanla ma kekhang wina khiten khe tsüna ma ketanla ma nyankethang tsü bhaden, isala thowa na ma kesun kechiwa nyankethang bhaten khe tsüna atsentsa, nu ma wi milikemesa mangla nmi.

¹⁹Mosa ayenwa tsü pi nthu ncü kwe? Isala nthu na tsü nie nten. isathu nthu mangkesa na hi pathiale bhaten nu?”

²⁰Anyitenti tsüna khi, “No wi atsaghang kesü ben man ha! Thowa na no pathiale bhaten nu?”

²¹Jisu na luneng, “Hi azensu kulichi nan nthu tsüdila amansa.

²² Mosa na nthu tsathu hyuhan lo kiza (tsüna Mosa na nye isala nthu bamyithu na sa shagha), nu nthu na Sabbath tsathang wi atsa hyuhan den.

²³ Mosa Yenwa tsü npasa le kesa ghena Sabbath tsathang wi atsa hyuhan den, isalethu, mangkesa na hi Sabbath tsathang wi anyi kesü sa pi mehai cencu kecü ghena nthu na imiwi aghepvü ten nu?

²⁴Amei wi kemu ketan wi kemehai-keteshi chüyale nsa la, isala atsentsa wina kessi nu chüyalo.”

²⁵Jerusalem wi anyi pahan na hati khi, “Anyi hawa ha kekhang kesenthu na ma pathiale bha ketenwa tsü nye kwe?

²⁶Ghangchilo! Ma anyitenti jawi ajühkhiben, nu thola ma wi mangla nkhi le! Mathu na hawa ha ntsakhiwa Messiya le kesa chüya nben kwe?

²⁷Anyi hawa ha khie wina gho khe ithu tsüdila chüben, isala Messiya tsü kusi khie wina gho ten khe anyi thola nchü.

²⁸Jisu na Kekinyijjen wi nyu kesansi wi jisha nu khi, “Nthu na ntsakhiwa hi nu hi khiewa na gho khe chüben kwe? Hi ketanla hi kekhang wina ngho, hi kesun kechiwa tsüna atsentsawa, isala nthu na ma nchü.

²⁹Hi ma chüben, kepaghenanye hi ma wina gho, nu ma hi kesunchi.”

³⁰Mathu na ma ghanyale kiden, isala anyi kesütanla ma nkidhen, kepaghenanye ma tsüwa na gho npi cu.

³¹Isala anyitenti jawi kejon na ma nondiya nu khi, “Messiya tsüna gho lethu, ma anyi hawa miwi azensuthu ji kayi kulichi ben kwe?”

³²Farisithu na anyitenti jawi Jisu cüki hathu khi keben zaya, tsalina mathu nu keqhaikedithu na aghikehiethu pahan kesun pi Jisu ghan wa thsü.

³³Jisu na khi, “Hi matsü keu nthu gweghe benla nu tsaseng wi hi kesun kechiwa wi waben.

³⁴Nthu na hi bhaben, isala nthu na hi muya nben, kepaghenanye nthu na hi khiewa wa ten khe ciwi ghaya nben.”

³⁵Judah nyi kekhang kesenthu na mathu jawi khi, “Anyi ha ma khiewa wale keben ghena ithu ma muya nben nu? Ma ithu nyi na wa hang keben Grik nyunutithu wi wala Grik nyithu sansi wa ben la?

³⁶Ma mangwa jjügi na hati khiben nu? ‘Nthu na hi bhaben, isala nthu na hi muya nben, kepaghenanye nthu na hi khiewa wa ten khe ciwi ghaya nben.’ ”

³⁷ Akho ghanan asakhenwa wi tsüna atsathang kemechan ntsawa, ciwi Jisu na shagha jisha nu khi, “Anyi kesü le kesü lela dighe ben lethu ma yala hi wi gha nu jjüya thsülo.

³⁸Ntsawajüh khi keben ti, ‘Anyi thowa na hi nondi ten khe ma leben wi kahang khuchi keten ghaku tssü lle shhugho ben.’ ”

³⁹Jisu na ha ma nondi keyathu na aghamu muya keten cüki khichi. Tsü tsüwi aghamu tsü npi khuchicü, kepaghenanye Jisu na ma nyankethang npi sachi.

⁴⁰Anyitenti jawi pahan na ma ha kekhi zaya nu khi, “Anyi hawa ha ntsakhiwa atusenjüh-kechüwa tsü le!”

⁴¹Kepathu na khi, “Ma Messiya le!” Isala kepathu na khi, “Messiya tsüna Galilee wina ghoben kwe?

⁴² Messiya tsüna Kadimi David shicü kesü sa nu David kahang pen Bethlehem nyuti witsü pvüghaya benle kesa Ntsawajüh na khiben.”

⁴³Tsalina ciwi anyitenti jawi Jisu ghena gishü kepapa sa.

⁴⁴Pahan na ma ghanya mvu sa kiden, isala thola ma kidhen meya la.

⁴⁵Aghikehiethu na kheneng keqhaikedithu nu Farisithu wi gho nan hati mathu wi keü, “Nthu mangkesa na ma ghan sen ngho nu?”

⁴⁶Aghikehiethu na luneng, “Anyi thola ma ti ajühkhi meya le!”

⁴⁷Farisithu na mathu wi keü, “Ma nthu la juyadha kwe?

⁴⁸Kekhang kesenthu nyelela Farisithu kesü la ma nondikeya nthu na chüyale nu?

⁴⁹Anyitenti hawa ha Mosa Yenwa tsü nkechü ghena mathu Anyiza kishen-keshi pvüyadha le!”

⁵⁰ Ciwi Farisi kesü Nikodema, hatu wi Jisu wi keghowa tsüna kepathu wi khi,

⁵¹“Ithu Yenwa kenie wina anyi kesü ma mangwa kulitheng khe npi zakeya nu chükeya tuwi ithu ma meshensaya nben.”

⁵²Mathu na luneng, “Mehaiben, no la Galilee wina gho la? Ntsawajüh tsü si nanlo, atusenjüh-kechü kesü la Galilee wina gho nben kesa no chüyaben.”