Read Northern Rengma Naga KEKULI 1 Bible Online

KEKULI 1 - Northern Rengma Naga bible

KEKULI 1

¹ Kinyiküwa Theofilo: Hi ilesüshen atuwa wi Jisu kekuli nu ma nyu kesansi cüki tsüdi zhütheng,

²tsüna aghatsan na wala Anyiza na ma zanki pi tang wi chiya kesa tsü npi kecu chu cüki. Ma tang wi npi kewa wi Kemetha Ghamu kekhang wina kecükegwe pi ma anyi kessi pi apostel saya kesathu cü.

³Ma keshü seng wi ghanan jügha jü wi ma hangben le kesa kejon tughula mathu tuwi gho, nu ajjügi kejonla pi mathu ccüca. Mathu na ma mu, nu ma Anyiza Kadiyyi cüki khi pi mathu ccüneng.

⁴ Ma mathu gweghe dsajjü keben wi ma hati mathu wi kiza, “Jerusalem nteshila, isala iBa na aju khishi ketheng, hi pi nthu kekiza ajuwa tsü hie ben lalo.

⁵ Johan na atssü pi nyu baptaiz sa, isala ghanan keu seng wi Kemetha Ghamu pi nthu baptaiz sa cüaben.

⁶Apostelthu na gho saghu keya wi mathu na Jisu wi keü, “Apvüwa, no khili tsü ha Kadiyyi tsü pi Israel nyi cü neng tendha la?

⁷Jisu mathu wi khi, “Matsü nu ma tsathang tsüna iBa na ma ketanla ma kekhang wina ssan theng, nu khathansha wi saben khe nthu na kechü-u nye.

⁸ Isala Kemetha Ghamu na nthu miwi gho lethu kekhang pi nthu pong cüben, nu nthu na Jerusalem, Judea, nu Samaria tsüdi wi nu ayyi ccügwen wi lela ighena chüzathu saben.”

⁹ Ma ha kekhi seng wi mathu na ma ghang keben na tang wi ma zankiya nu mathu tuwi na akulukeshü na gho ma shanbhonya.

¹⁰Ma wa kesa seng wi mathu na tang wi ghangki ben nan meshu keni athsü kemiki mphi nu wan gho mathu kete wi nganya.

¹¹Manyi na mathu wi, “Nthu Galilee nyithu mangkesa na ciwi ngan nu tang wi ghang ben nu? Nthu wina ssi sen nu tang wi wa kesawa Jisu hana nthu ma tang wi wa keten kemu tsü makesü gho neng ben le!”

¹²Tsaseng wi apostelthu na Oliv Yikha wina kheneng sen nu Jerusalem wi gho, tsüna anyunuti manyi jü kilometer kesü-u na ben.

¹³Mathu na Jerusalem wi dula mathu na ben keten ajjenshha tangwa wi ben. Tsüthu na Pitor, Johan, James nu Andria, Filip nu Thoma, Bartholoma nu Mathi, Alfa tsawa Jakob, Simon kempvüzawa, nu Jakob tsawa Judah.

¹⁴Mathu tsüdi nu nzathu pahan, Jisu jja Maria nu ma cünyuthu tsüdi gweghe nu kekhie saki ben wa.

¹⁵Ghanan keu seng wi kenondithu anyi meza nu nkwe ghola mehu keben wi Pitor na shagha ajühkhi.

¹⁶Ma kekhi na, “Icünyuthu, kheni na Kemetha Ghamu na David pang wina Judah na nyu ssi wa Jisu ghanya thsüa ketenwa cüki khi ketheng Ntsawajüh tsü nsacenthu yishü.

¹⁷Judah na ikhang jawi anyi kesü, kepaghenanye ma kessi pi ikhang gweghe kekuli sa thsü kesalina.”

¹⁸ (Judah na ma nkemehai kekuli kutimen apisa tsü pi alli kesü sheiya. Ma ciwi shü nu ma pvü nbvü pi ma non wi nkemetha tsüdila amei wi shhughoa.

¹⁹Jerusalem wi kahangthu tsüdila tsü cüki zaya nu mathu jüh wina alli tsü pi “Akeldema” ma jjügi “Ajjü lli” isa cia.)

²⁰ “Kepaghenanye Zakeci lesüshen wi hati zhütheng, ‘Ma jjen yala kaghacang sa thsülo; nu thola ciwi nhang thsü lalo.’ Nu hati la zhütheng, ‘Nyu kepa wi ma kuti sala kekuli sa thsülo.’

²¹Tsalina anyi kesü ikhang gweghe nu Apvüwa Jisu hangneng- keshagha tsü chüza nsa thsüthu yishü ben. Ma Jisu na ikhang ssinu cüshu keten wi, aghatsan Johan na ma baptaiz [1] kesa cüki pi nyu kesansi tsü wina ghola ikhang jawi na Jisu zanki pi tang wi chiya kesa kecu matsü tsüdi wi ikhang gweghe keten nyi kesü nsathu yishü.

²³Tsalina mathu na meshu keni nyan khi: Josef pi Barsabba le khi ketenwa (Justa lela khiden), nu Mathia manyi.

²⁴Tsaseng wi mathu kekhie sa, “O Apvüwa, no anyi tsüdi leben kechüwa, tsalina pi ikhang ccücalo, no ha manyi khawa kessi pi

²⁵Judah na teshi theng nu ma pen wi wa kesawa tsü mithon wina apostel kesü kekuli sa thsüten khe.”

²⁶Tsaseng wi mathu na manyi ghena akezen sa nu kessi, nu Mathia kessiya, ma pi apostelthu taghakhen tsü wwaya.