Read Northern Rengma Naga KEKULI 12 Bible Online

KEKULI 12 - Northern Rengma Naga bible

KEKULI 12

¹Ha tsüwi ha Herod Kadimiwa [3] na kemehu nyithu pahan meten-mesha shagha.

²Ma njünnu pi Johan cünyuwa Jakob süthi thsüa.

³Ma tsüna Judah nyithu kenen le kesa mukeya wi ma wala Pitor la ghanya. (Hawa ha Azimi nkechi Mesa Kemishu Kho tsüwi sa.)

⁴ Ma Pitor ghanya nu pi akhang mejü na meshu mejüjü sala aghihie keben tssüzüjjen wi chia. Herod na Shhukeya Kho kesa seng wi Pitor ssigho anyithu tuwi ajühkaghaten le sa.

⁵Tsalina Pitor pi atssüzüjjen wi chitheng, nu kemehu nyithu na ma ghena Anyiza wi khie ntsa saben.

⁶Herod na ma ssinu anyithu tuwi npi kegho ghaja wi Pitor na amighe ssüli keni pi ma bhen pvünu aghikehie keni jüwi jenben, nu aghikehiethu na atssüzüjjen jenka hie ben.

⁷Zuli tangnyilo kesü na wan gho ciwi nganya nu kewegü kesü na ajjen keshondhi tsü wegüya. Nu tangnyilowa na Pitor zankejula ma pamechü nu khi, “Wan, shagha lo!” Amighe ssüli pi Pitor kwen kebhen tsü ma ketanla qanca.

⁸Tsaseng wi tangnyilowa na khi, “Ngeshi qhanya nu nccüguwen pvüyalo.” Pitor na tsüti saya nu tangnyilowa na khi, “Nthsü mphiya nu hi nie ghalo.”

⁹Pitor na atssüzüjjen wina ma nie sen shhu, isala ma tangnyilowa na kuli keben tsüna atsentsa wila nye khe nchü, ma kemanthi muben le meshen.

¹⁰Manyi ajenka atuwa wi shhuya, nu tsaseng wi keniwa wi shhuya, nu asakhenwa wi amighe jenka anyunuti wi keshhuwa wi tsü ghoya. Ajenka tsüna ma ketanla sha. Manyi wa alen tonti cukeya wi tang- nyilowa na wan Pitor teshi nu bvüa.

¹¹Tsaseng wi Pitor na ma miwi khati sa khe chüya nu khi, “Hawa ha atsentsa wi le kesa hi khili chüyadha! Apvüwa na ma nyilo kesun pi Herod kekhang nu Judah nyithu na meshen nu kiden kebenthu tsüdi wina hi khushiyadha.”

¹²Ma kekuli hathu chükeya wi anyi kejon na saghu nu kekhie sa keben Johan Mark jja Maria jjen wi tsü wa.

¹³Pitor na akhemi wi wala ajenka kekha chi nan maghale kesü ma nyan Rhoda kesa tsüna ajenka sha chile shhugho.

¹⁴Ma Pitor hhai chüya nu ma nonghe ntsa sa ajenka la nsha chila bvü neng du Pitor na akhemi wi benle kesa mathu kiza.

¹⁵Mathu na “No deja benle” khi. Isala ma ntsakhiwa le kesa khi khvu sa. Tsalina mathu luneng, “Tsüna ma ghamu saben.”

¹⁶Tsü meyi Pitor na ajenka kekha neng chi. Asakhen wi mathu wala ajenka sha chi nan ma muya nu mathu mansa.

¹⁷Ma kwen kejen pi mathu ccen benlo kesa kiza, nu ma Apvüwa na khati nu atssüzüjjen wina ma ssigho khe khimetha pi mathu kiza. Ma khi, “Ha pi James nu kenondithu kizalo; ” isanu ma apen tsü teshi nu kepa wi bvüa.

¹⁸Ghanenwa wi Pitor na khati sadha nu kesa aghikehiethu jawi kivvü ntsa sa.

¹⁹Herod na Pitor bha nanlo kesa ahza khuchia, isala mathu na ma mu meya. Tsalina ma aghikehiethu jühkaghaten nu mathu pi shü thsülo khichia. Ha seng wi Herod na Judea teshi nu wa Kaesarea wi matsü keu ben.

²⁰Herod na Tur nu Sidon nyithu miwi aghepvü ntsa sa, tsalina mathu na akhang sa wala ma metu. Mathu atuwa sala kadipen wi kedi kesü Blasta tsü zan pi mathu wiwa saya. Tsaseng wi mathu na Herod ssinu keccawa sale wa, kepaghenanye mathu yyi tsüna kadimiwa diyyi wina kedsakejjü tsüdi muyaden.

²¹Atsathang ssan ketheng ghanan wi Herod na ma kadimi thsümeni pvüya nu ma kadipen wi donki nu ajühkhi pi anyithu kiza.

²²Anyithu na magha nu khi, “Hawa ha acenpvü kesü na ajühkhi keben khe anyi nye le!”

²³Tsü meyi Apvüwa nyilowa na Herod whengshia, kepaghenanye ma Anyiza nkinyiküla. Acaniethu na ma ghothi nu shü.

²⁴Tsü tsüwi Anyiza jüh na ji kayi nu shigü kayi wa.

²⁵Barnaba nu Saul manyi na jühketsinyi kekuli sacen nu Johan Mark ssinu mathu gweghe Jerusalem wi gho neng.