Read Northern Rengma Naga KEKULI 13 Bible Online

KEKULI 13 - Northern Rengma Naga bible

KEKULI 13

¹Antiok wi kemehu wi atusenjüh-kechüthu nu kesansithu Barnaba, Simeon (kenimeghowa), Lusia (Ciren wina keghowa), Menaen (Ahng Herod[4] na noncca keghowa), nu Saul hathu na ben.

²Mathu na zi nu Apvüwa kinyi keben wi Kemetha Ghamu na mathu kiza, “Barnaba nu Saul manyi na ighena nu hi manyi ci keya kekuli tsü sa thsüle kesalina manyi kesunshi chilo.”

³Mathu na zi nu kekhie sa, nu mathu kwen chang pi manyi miwi chi nu kesunshi chia.

⁴Kemetha Ghamu na kesunshi kechi ti Barnaba nu Saul manyi na Selusia wi wa nu ciwi na ayyi mangkehi Cipra wi wa.

⁵Manyi wala Salami cu keya wi Judah nyi Sinagog wi wa Anyiza jüh khi pi nyu sansi. Manyi Johan Mark yala kekuli wi manyi kiqa thsüle ssiya.

⁶Mathu na ayyi mangkehi maben pvüdhi sen wa Pafa cuya, nu ciwi kedema kesü ma nyan Bar-Jisu, ma ketanla ma pi atusenjüh-kechüwa sa keten Judah nyi kesü metuya.

⁷Anyi tsüna ayyi mangkehi tsüwa wi ahng Sergia Paulo pvüshangwa, ma kemetsa nyi kesü. Ahng na Anyiza jüh kina mvu kesalina Barnaba nu Saul manyi ci pi ma tuwi chi.

⁸Isala kedema nyi kesü (Grik jüh wina ma nyan) Eluma tsüna manyi shun nu kenondi wina ahngwa ssi bvüale sa.

⁹Isala Saul pi Paul lela khi ketenwa na Kemetha Ghamu pi ma pong pvünu kedemawa ghangchi nu khi,

¹⁰“No atsaghang tsawa! No acho nkemehai tsüdi pi no pong pvüden. No pala kemehai tsüdi ghinyiwa, nu keshüthangla Apvüwa cüki atsentsawa tsü pi milikemesa sale saden!

¹¹Apvüwa kekhang na khili nmiwi dugho nu n-nyon nmula, nu matsü kesü wi aghani kewegü mu nben.” Tsümeyi anikhu kejang ti kesa na gho Eluma nyon shan bhonya, nu ma nyu yala ma zan sen nu alentsen thsüle kesa bha kevüli shagha .

¹²Ahng na kekuli tsü muya nu ma nondiya; ma Apvüwa cüki kesansijüh tsü ghena amansa ntsa sa.

¹³Paul nu ma pvüshangthu na Pafa wina sa sen nu Pamfilia yyi Perga wi ghoya, isala Johan Mark na ciwi manyi teshi theng nu Jerusalem wi wha neng.

¹⁴Manyi Perga wina sa sen nu Pisidia yyi Antiok wi ghoya. Manyi Sabbath tsathang wi Sinagog wi du nu donki ben.

¹⁵Mosa Yenwa nu atusenjüh-kechüthu kezhü tsü kesi seng wi Sinagog wi kedithu na manyi wi ketsijüh kesunchi nu khi, “Acünyuthu, nshinyi na anyithu ghena kechü-kenong jüh ben lethu, ikhang na nshinyi yala tsü khi pi mathu kiza thsü mvu ben le!”

¹⁶Paul na shagha ma kwen zanki nu ajüh khi: “Hi Israel nyithu nu Judah nyi nkenyethu he wi ben nu Anyiza kinyi kebenthu, ijüh kina chilo!

¹⁷ Israel nyithu Nyiza na ithu bamyithu kessiya, nu mathu na Ejipt yyi wi kijünyi thu sa nu hang keben jüwi mathu ya amizza kejiwa sa thsü. Anyiza na ma kekhang wina mathu ssinu shhugho.

¹⁸Nu amapi jügha ayyikeshü wi ma kekheneng nu mathu noncca.

¹⁹ Ma Kanaan yyi wi mizzatenti tagü yasa pi nu Israel nyithu pi ayyi tsü nkaya thsüa.

²⁰ Hathu ha tsüdi amapi meza mejü nu deni-u jü wi sa.” “Ha seng wi Samuel atusenjüh-kechüwa tsü npi kecu chu ma pendhethu pi mathu cü gho.

²¹ Mathu na kadimi kesü kekhie wi Anyiza na Benjamin mizza wi Kish tsawa Saul pi amapi jügha mathu kadimiwa sa thsü.

²² Ma khukea seng wi Anyiza na David pi mathu kadimiwa sa thsü. Hawa ha Anyiza na ma cüki kekhi: ‘Hi anyi kemehai kesü ileben kaghawa Jesse tsa David muyadha, ma hi ma yala sa thsü mvu kebenthu tsüdi saden.’

²³Anyiza na ma jüh khi kechi ti David shicübvügha wi meshu kesü Jisu pi Israel nyi Hangshawa sa thsü.

²⁴Jisu npi kegho tuwi Johan na Israel nyi tsüdila kesami wi leben khapeghe yalo kesa pi sansi gho.

²⁵ Johan na ma kekuli sacen keten pang wi ma anyithu wi kiza, ‘Nthu na hi thowa le meshen ben nu? Hi nthu na hie kebenwa tsü nye. Isala kinalo! Ma iseng wi ghoden, nu hi ma ccüguwen la nlisha qo le!’

²⁶“Hi Israel nyithu, Abraham shicübvüghathu, nu Judah nyi nkenyethu he wi Anyiza kinyi kebenthu: ithu ghena hangshakeya ketsijüh ha kesun chi le!

²⁷Jerusalem wi kahangthu nu accülikesathu na ma Hangshawa kesa nchü, nyelela mathu na Sabbath tsathang kaghapenla si keten atusenjüh-kechüthu jüh tsü chüshi meyala. Isala mathu na Jisu meshensa nu atusenjüh-kechü jühthu tsü sacenya thsüa.

²⁸ Mathu na ma pi keshü tsü-u jjügi mangla mu meya lela Pilat kesun pi ma pi shü thsüa.

²⁹ Mathu na Ntsawajüh wi ma cüki khi ketheng tsüdi sacen kesa seng wi kross miwi ma piesha pi ashüjjen wi vhüa.

³⁰Isala Anyiza na keshü wi ma sa pi hangya thsüa,

³¹ nu ghanan kejon wi la kheni ma gweghe Jerusalem wina Galilee wi kewathu tuwi gho. Mathu na khili Israel nyithu tuwi ma ghena chüzathu saben.

³² Nu ikhang na he wi Jühtheü Kemehaiwa sengho nthu cüben: Anyiza na ithu bamyithu wi ma mangwa sale khishichi khe tsüdila khili Jisu sa pi hangneng kecü wina mathu shicübvügha ithu ha ghena sa cendha. Tsüna Zakeci keniwa wi zhü ketheng ti, ‘No iTsa; hi nansü nten nBa sadha.’

³³

³⁴ Hawa ha Anyiza na ma pi ashüjjen wi bighe nwa thsüle kesalina ma zankiya keten cüki khi ketheng tsü: ‘Hi David wi khishi ketheng kemetha nu muya metsi keten kemihhi tsü pi no cüden.’

³⁵ “Ntsakhiwa ma kepa wila khi pi theng: ‘No nmagha kemethawa pi ashüjjen wi bighe thsüa nben.’

³⁶David na ma kahang wi Anyiza kemeshenwa tsü sa nu shü, nu ma pi ma bamyithu kete wi vhüa. Ma kamang na ashüjjen wi bighe.

³⁷Isala Anyiza na ma sa pi hangneng kecüwa ha tsü tsüti nsa.

³⁸Tsalina icünyuthu, ikhang na nthu ya chüya thsü mvu kebenwa na Jisu wina kesami teshi kecü kesansijüh pi nthu sansi;

³⁹nu kesü le kesü lela ma nondi keyawa na Mosa Yenwa nthu lisha nkeyawa wina nthu kesami tsüdi teshi cü nu lishayadha kesa chütiyalo.

⁴⁰Tsalina atusenjüh-kechüthu na kekhi jüh tsü nthu miwi nsacen thsüle kesalina kiden-kesha yalo:

⁴¹ ‘Ghangchilo, nthu nyu nankeqhe ketenthu! Amansa nu shülo! Kepaghenanye hi nansü kuli kebenwa ha nthu na nondi nben, nyu na khimetha pi nthu kiza lela!’ ”

⁴²Paul nu Barnaba manyi na Sinagog teshi nu bvü keten wi anyithu na gha ketenwa Sabbath tsathang wi la ghola pala tsüthu khipfü pi mathu kizalo manyi ci.

⁴³Anyithu na zighe bvü kesa seng wi Judah nyi nu Judah nyi nkenye na Judah keccüna senwa kesathu kejonla Paul nu Barnaba manyi nie den. Apostel keni na mathu na Anyiza nanketizen wi hang ben tenlo kesa ajüh pi mathu kechü-kenong ntsa sachi.

⁴⁴Tsashiwa Sabbath tsathang wi anyunuti ciwi kebenthu tsüdila Anyiza jüh kina le gho saghuben.

⁴⁵Judah nyithu na anyitenti tsü muya theng nu anyonsa ya, mathu na Paul ssinu kicennali nu ma kimenni.

⁴⁶Isala Paul nu Barnaba manyi na tsü miwi kempvüza sa nu ajühkhi: “Anyiza jüh ha atuwa sa pi nthu nkizathu keyishü ghena. Isala nthu na tsü meya mvula nu nthu ketanla anuphan kahang tsü meya qo le sa kesalina ishinyi na nthu teshi nu Judah nyi nkenyethu wi wa tendha.

⁴⁷ Kepaghenanye Apvüwa na ayenkhukechi ha pi ishinyi cütheng: ‘Hi no pi Judah nyi nkenyethu kewegüwa sa thsüdha, isanu ayyi nyi tsüdila hangshaya thsüle kesalina.’ ”

⁴⁸Judah nyi nkenyethu na ajüh tsü za keya wi mathu nonghe ntsa sa nu Apvüwa jüh tsü seng; nu anuphan kahang ghena kessiya kesathu na kenondithu saya.

⁴⁹Apvüwa jüh na ayyi tsü kevü tsüdi wila vvü zighe bvüa.

⁵⁰Isala Judah nyithu na anyunuti tsüwa wi accülikesathu nu Judah nyi nkenye atheghi kemehai wi nza Anyiza kinyi ketenthu kethukehi chia. Mathu na Paul nu Barnaba manyi meten-mesha shagha nu ayyi tsüwa wina manyi jügü shia.

⁵¹ Apostel keni na mathu keshun zensu wi manyi ccü wi ayyinikhu kekhasha chi nu Ikonium wi wa.

⁵²Antiok wi kenondithu anonghe ntsa sa nu Kemetha Ghamu pi pong pvüya.