Read Northern Rengma Naga KEKULI 14 Bible Online

KEKULI 14 - Northern Rengma Naga bible

KEKULI 14

¹Ikonium wi la tsü makesü sa. Paul nu Barnaba manyi Judah nyi Sinagog wi du ajüh khi ntsa nu Judah nyi nu Judah nyi nkenyethu la kejonla kenondi nyi saya.

²Isala Judah nyi nkenondithu na Judah nyi nkenyethu leben sameshü pi kenondithu nanmeghü thsüa.

³Apostel keni na ciwi matsü kesie-u ben nu manyi kempvüza sala Apvüwa jüh khi. Manyi na Apvüwa nanketizen cüki kekhi tsüna atsentsa le kesa ma amankesa nu azensuthu kuliya kemehai kekhang pi manyi cü nu kuli thsü.

⁴Anyunuti tsüwa wi anyithu gishü pi keni sa; pahan na Judah nyithu wiwa, nu pahan na apostelthu wiwa sa.

⁵Isanu Judah nyithu nu Judah nyi nkenyethu saghuya nu mathu ccülikesathu ssighola apostel keni meten-mesha nu alon pi manyi kecenthiale keben chüya.

⁶Apostel keni na tsü cüki za keya wi manyi bvü sen nu Lukaonia yyi wi anyunutithu Lustra nu Derbe, nu ayyi tsü kevü wi wa.

⁷Manyi na ciwi Jühtheü Kemehaiwa pi nyu sansi.

⁸Ciwi Lustra wi meshu kesü ma kepvügha wina accü nkemehai nu ma khiela alen npi tsenya kesa na ben.

⁹Ma ciwi donki nu Paul jüh kina. Paul na ma nondiben nu ma sa pi mehai yaben kesa muya, tsalina ma anyi tsü ghang,

¹⁰nu ahhai misikhhali khi, “Shagha nu mehaitsü ngan yalo!” Tsümeyi ma ngan shagha alentsenya.

¹¹Anyitenti na Paul kekuli tsü muya meyi mathu Lukaonia jüh wina, “Acenpvü na anyithu ceng sen nu ithu jawi ghodha le!” isa khi.

¹²Mathu na Barnaba nyan pi Zea, nu Paul nyan pi Herma ci, kepaghenanye ma ajüh kekhi khang.

¹³Anyuti tsüna ameiwa Zea kekinyijjen na ben, ciwi keqhaikediwa na amesü süpon nu athighithu sen nu ajenka wi gho, kepaghenanye ma nu anyitenti na apostelthu kinyi mvu sa.

¹⁴Isala Paul nu Barnaba manyi mathu tsüti sale keben tsü zaya meyi manyi thsümeni zanqhe nu anyitenti jawi bvüdu nu jisha,

¹⁵ “Ae, anyithu, nthu mangkesa na hati saben nu? Ishinyi la nthu ti anyi le! Ishinyi na nthu yala ma men nkemi hathu wina khapeghe sen nu Anyiza atssan, ayyi, atssükedone, nu ciwi kebenthu tsüdi sakechiwa wi tsü ghoya thsüle kesalina Jühtheü Kemehaiwa khi pi nthu wi thangchile ghoben.

¹⁶Ma hatu wi anyi tsüdila ya mathu kenen wi hang thsü.

¹⁷Isala ma keshüthangla ma hang benle kesa chüya thsüle kesalina pala kemehai kuliden: ma tang wi na atsangho pi nthu cü nu matsü wina pala bi bünya thsüden; ma kedsakejjü khuchi nu anonkeghe pi nthu leben pong cüden.”

¹⁸Apostelthu na ajüh tsüthu pi anyitenti na manyi nkinyi thsüle kesa khen dhu ntsa nu khenya.

¹⁹Judah nyi pahan na Pisidia yyi Antiok nu Ikonium wina gho; mathu na anyitenti zan pi mathu wiwa saya, nu alon pi Paul kecen nu ma shüdhale sala zan sen wa anyuti khesha wi khala.

²⁰Isala kenondithu ma vüsen keben wi shagha anyutiwa wi du neng. Ma dhitsüwa wi Barnaba ssinu Derbe wi wa.

²¹Paul nu Barnaba manyi na Jühtheü Kemehaiwa pi Derbe wi nyu sansi nu anyi kejonla sansikeyathu saya. Tsaseng wi manyi ciwi na Lustra, Ikonium, nu Pisidia yyi Antiok wi wha neng.

²²Manyi ciwi wa kenondithu na kenondi tsentsa wi benya thsüle kesalina mathu satezü nu kechü-kenong nu khi, “Ithu na Anyiza Kadiyyi wi dule kesalina agükeccü kejon saben.”

²³Manyi na kemehu tsüdi wi accülikesathu kessi pi cü, manyi zi nu kekhie sa nu mathu pi mathu na nondi ketenwa Apvüwa kwen wi chia.

²⁴Manyi Pisidia yyi tsüdi wi kewa cen seng wi Pamfilia wi gho.

²⁵Manyi Perga wi ketsijüh pi nyu sansi nu tsaseng wi Attalia wi wa,

²⁶nu ciwi atssü wina Antiok wi gho neng, apen ciwi na manyi Anyiza nanketizen sen nu kekuli salo kesunshi kechi tsü manyi na khili sacendha.

²⁷Manyi na Antiok wi ghoya meyi kemehu nyithu cighu chi nu Anyiza na manyi ssinu kekuli sa keyathu nu Judah nyi nkenyethu ya nondiya thsüle kesa ghena alen shachi kecü cüki tsüdi khi pi mathu kiza.

²⁸Isanu manyi ciwi kenondithu ssinu matsü kesiela ben.