Read Northern Rengma Naga KEKULI 15 Bible Online

KEKULI 15 - Northern Rengma Naga bible

KEKULI 15

¹ Anyi pahan Judea wina gho Antiok wi kenondithu sansi nu khi, “Mosa Yenwa kenie wina nthu na ahyu nkahan tsü hangshakeya muya nben.”

²Paul nu Barnaba manyi na mathu ssinu ha jjügi ghena kicennali ntsa sa. Tsalina Paul nu Barnaba nu Antiok wi kahangthu pahan na Jerusalem wi wala ha ghena apostelthu nu keshenpfüthu metu wale cenya.

³Isanu kemehu na mathu kesun pi wa thsüa; nu mathu na Fonisia nu Samaria pvüdhi kewa wi Judah nyi nkenyethu na khati nu Anyiza wi ghoben khe tsü cüki pi nyu kiza; ajüh ha ghena kenondithu na anonghe ntsa sa.

⁴Mathu wala Jerusalem cukeya wi kemehu, apostelthu, nu keshenpfüthu na anonkeghe sa nu mathu ssiya, nu mathu wi Anyiza na mathu ssinu kekuli cüki tsüdi khi pi mathu kiza.

⁵Isala kenondithu pahan Farisithu zi wiwa sa nu shaghala khi, “Judah nyi nkenyethu la ahyuhan nu Mosa Yenwa tsü n-niethu yishü,” isa khi.

⁶Tsaseng wi apostelthu nu keshenpfüthu na saghu nu ha jjügi ghena keccünengli.

⁷ Matsü kesie kicennali seng wi Pitor na shagha nu khi, “Ipvüshangthu, nthu na chüben, Judah nyi nkenyethu na ipang wina Jühtheü Kemehaiwa chüya nu nondiya thsüle kesalina Anyiza na kheni na nthu jawi na hi kessiyadha.

⁸ Anyiza, anyi leben chü kebenwa na Judah nyi nkenyethu la nantizen tenle kesa Kemetha Ghamu pi ithu kecü tsüti pi mathu la cüa.

⁹Anyiza na ikhang nu mathu nankepapa nsa, ma mathu kesami teshi pi cü, kepaghenanye mathu na nondiya.

¹⁰Isalethu, nthu mangkesa na ikhang nu ithu bamyithu la nkepvücha akhhi tsü pi kenondithu miwi chi nu Anyiza ghan-nan le saten nu?

¹¹Nyele! Ikhang la mathu ti Apvüwa Jisu nanketizen wi nondi nu hangsha yadha.”

¹²Mathu tsüdila ccen ben nu Paul nu Barnaba manyi wi Anyiza na manyi ssinu Judah nyi nkenyethu jawi azensu nu amankesathu kuli kechi cüki kekhi jüh tsü kina.

¹³Manyi ajüh kekhithi seng wi James na shagha nu khi, “Icünyuthu, ijüh kinachilo!

¹⁴Anyiza na Judah nyi nkenyethu nantizen nu mathu jawi anyi mizza kesü pi ma nyithu sayale cikeya cüki khili Simon na khimetha chidha.

¹⁵Ntsawajüh na khi keben ti, atusenjüh-kechüthu jüh la tsü makesü:

¹⁶ ‘Apvüwa na khiben, hi ha seng wi gho neng den, nu David kadiyyiwa tsü sa neng den. Hi yasa kebenwa tsü sa neng nu sa pi zü nengya thsüaden.

¹⁷Isanu anyi kepa wila tsüdi hi wi ghoben, hi Judah nyi nkenyethu tsüdi pi inyithu le ciyadha.

¹⁸Kheni na ha pi chü thsü kesawa Apvüwa na tsüti khiben.’

¹⁹“Tsalina hi kemeshen tsü ikhang na Judah nyi nkenyethu na Anyiza wi kheneng kegho tsü nkivvüla mehai.

²⁰ Isala mathu na atsse nkemethathu tsü ndsa lalo, kepaghenanye tsü pi atsi-kezhüthu kinyidha; qheza-inamu kekuli nsala; nu asahang kehanthi nu ajjü ndsa lalo kesa zhü pi mathu cü na.

²¹Kepaghenanye Mosa Yenwa tsüna kheni wina Sabbath tsathang kaghapenla pi Sinagogthu wi si ghodha, nu ajühwa tsü pi anyuti tsüdi wi khichidha.”

²²Apostelthu, keshenpfüthu, nu kemehu nyi mabenla saghu nu anyi pahan kessi pi Paul nu Barnaba gweghe Antiok wi kesunchile cenya. Mathu na kenondithu na kinyikü ntsa sa keten nyi meshu keni Judah Barsabba nu Sila manyi kessiya,

²³nu mathu na lesü hati zhü pi mathu wi kesunchi: “Ikhang, apostelthu nu keshenpfüthu, nthu cünyuthu na shalom pi Judah nyi nkenye Antiok, Siriya, nu Silisia wi keben kenondithu tsüdi cüben.

²⁴Ikhang jawi anyi pahan na ikhang jüh nchila wa nyu yasa nu pakivvü benle kesa chüya.

²⁵Tsalina ikhang kemetuli nu ajühkesü sala ikhang jawi nyilothu pahan kessiya nu mathu kesun pi nthu wi chiben. Mathu na ithu pvüshangthu Barnaba nu Paul,

²⁶ithu Pvüwa Jisu Khrista kekuli ghena ma nyi kahang khuchi keten keni gweghe waden.

²⁷Ikhang na Judah nu Sila manyi kesun chiben, nu mathu na ikhang zhükechi hati khi pi nthu kizaben.

²⁸Kepaghenanye Kemetha Ghamu nu ikhang lela ayen hathu miwi kepa pi nthu npvü thsüle kesa cenya.

²⁹Atsikezhüthu kekinyi tsse, ajjü, asahang kehanthithu tsü ndsala, nthu qheza-inamu kekuli nsala. Keujüla nthu na hathu ha ghüya lethu nthu ghena kemehaiwa sayaben. Kemehaiwa sabenlo.”

³⁰Nyilothu kesun kechi ti wala Antiok cuya nu kenondithu maben cighu chi nu lesükezhü tsü pi mathu cüa.

³¹Anyithu na lesükezhü tsü si wa nu tsüna mathu sa ketezü jüh tsü ghena anonghe ntsa sa.

³²Judah nu Sila manyi na atusenjüh-kechüthu jüh kejon khi pi mathu satezü nu kechü-kenong chi cü.

³³Ghanan keu ciwi keben seng wi kenondithu na manyi kesun pi manyi kesun kechithu wi chi neng.

³⁴Isala Sila na ciwi benla le südheya.

³⁵Paul nu Barnaba manyi na matsü pahan Antiok wi ben, nu kepathu kejon gweghe Apvüwa jüh pi nyu sansi nu khi.

³⁶Matsü pahan seng wi Paul na Barnaba wi khi, “Ghalo, ishinyi wala kheni Apvüwa jüh pi sansi kethengthu anyuti tsüdi wi wa nu acünyuthu na khati saben khe ghangchi nan na!”

³⁷Barnaba na Johan Mark ssinu mathu gweghe wa mvu sa;

³⁸ isala Paul na Johan Mark na manyi ssinu kekuli nsa cenla Pamfilia wi manyi teshi nu kheneng wha kesa ghena ma ssi neng wale nmeshenla.

³⁹Ha jjügi ghena manyi kicennali ntsa sa nu ma nyi keteshilia. Barnaba na Mark ssiya nu atssü wina Cipra wi wa,

⁴⁰Isala Paul na Sila kessiya nu wa, nu kenondithu na manyi pi Apvüwa nanketizen kekhu wi chi cüa.

⁴¹Ma Siriya, nu Silisia pvüdhi wa kemehuthu satezü cüa.