Read Northern Rengma Naga KEKULI 16 Bible Online

KEKULI 16 - Northern Rengma Naga bible

KEKULI 16

¹Paul na Derbe nu Lustra wi wala ciwi Khristanyi kesü ma nyan Timothi muya. Ma jja na Judah nyi Khristanyi kesü, nu ma ba na Grik nyi.

²Lustra nu Ikonium wi kahang kenondithu na Timothi cüki khi pi mehaiden.

³Paul na Timothi ssi wa mvu ntsa kesalina ma Timothi hyuhan, kepaghenanye apen ciwi keben Judah nyithu tsüdila Timothi ba na Grik nyi le kesa chüben.

⁴Mathu na anyunuti kejon wi wala kenondithu ghena Jerusalem wi apostelthu nu keshenpfüthu na cenkeya jüh tsü pi mathu kiza nu tsü nie tenlo kiza.

⁵Tsalina kemehuthu na kenondi wi zü kayi nu atsathangla anyi la ji kayi sa.

⁶Kemetha Ghamu na mathu yala Asia yyi wi ketsijüh nkhi thsü mvula kesalina mathu na Frugia nu Galatia pvüdhi wa.

⁷Mathu na wa Musia ggü cu keya wi mathu na Bithunia yyi wi wale kiden, isala Jisu Ghamu na mathu ya tsüti nsa thsü mvu.

⁸Tsalina mathu na Musia yyi pvüdhi sen nu Troa wi wa.

⁹Tsü ghaja Paul na kemanthi kesü mu, ciwi Macedonia nyi kesü na gho ma tuwi ngan nu ma wi khie, “Macedonia wi ghala ikhang kiqa cülo!”

¹⁰Paul na kemanthi tsü chüya meyi ikhang na Macedonia wi wale kidenya, kepaghenanye Anyiza na Jühtheü Kemehaiwa pi ciwi anyithu kizalo kesa ghena ikhang ci benle kesa südheya.

¹¹Tsalina ikhang na Troa teshi nu ahunjjen wina wa Samothra cuya, nu dhitsüwa wi Neapoli wi wa.

¹²Nu ciwi na wa Rom nyi na Macedonia yyi wi anyunuti sa keben Filippi wi tsü waya, isanu ikhang na ghanan keu ciwi ben.

¹³Sabbath tsathang wi ikhang na anyunuti na ameiwa aghaku ghüsa wi Judah nyithu na kekhie kesa pen benle meshen nu wa, ciwi nzathu na saghu keben wi ikhang na wa mathu ssinu keccünengli.

¹⁴Ciwi nza kesü Thiatira wina kegho athsümeni menkedhu pi jeü keten ma nyan Lydia na ben. Ma Anyiza kinyi nu hang keten nyi kesü, Apvüwa na ma leben sha chicü nu ma Paul jüh kekhi tsü zaya.

¹⁵Lydia nu ma theghithu na baptaiz sakeya seng wi ma ghola ikhang ci, “Nthu na hi pi Apvüwa kenondi tsentsa nyi kesü sa lethu, ghola ijjen wi benlo.” Isanu ma ikhang ci khvu sa.

¹⁶Ghanan kesü ikhang na kekhie kesa pen wi wa keten maghale kesü na atsaghang ssinu dema keten metuya. Ma kedema ghena ma pvüwa na sashü na kekiyi muyaden.

¹⁷Nza tsüwa na Paul nu ikhang niela jisha, “Anyi hathu hana Kemisintsa Anyiza maghathu le! Mathu na nthu khati nu hangsha yaben khe tsü khi pi nthu kizaben!”

¹⁸Ma ghanan kejonla hati sa wa kesalina Paul na ma lebentsu nu ma ghang nu aghamuwa wi khi, “Hi Jisu Khrista nyan wina no ma gwo wina shhugholo kizaben.” Tsümeyi kivvü keten ghamu tsüna ma gwo wina shhughoa.

¹⁹Nzawa pvüwa na ma kekiyi nmila kesa chüya meyi Paul nu Sila manyi ghan sen nu anyitenti pen wi kekhang kesenthu tuwi wa.

²⁰Mathu na manyi ssinu Rom kedithu tuwi wa nu khi, “Anyi ha keni na Judah nyi, nu manyi na ikhang nyunutiwa wi ha kekivvü pfüsi chiben.

²¹Manyi na ithu yenwa nkenye pi nyu sansiden, hi Rom nyithu na tsü nie nu saya nben.”

²²Nu anyitenti la mathu gweghe nu Paul nu Sila manyi shun. Tsaseng wi kedithu na Paul nu Sila manyi thsümeni mezüqhe nu manyi kiccülo kesa ahza khuchia.

²³Mathu na manyi kiccü ntsa sa nu pi atssüzüjjen wi khala chia, nu manyi pi khentenlo kesa atssüzüjjen wi kediwa kiza.

²⁴Atssüzüjjen wi kediwa na tsü zaya meyi manyi ssi wa ajjen non ntsawa wi manyi ccü pi achan wi bhenki pi theng.

²⁵Ghaja non wi Paul nu Sila manyi na kekhie sa nu akhwisa pi Anyiza seng ben, nu atssüzüthu na manyi hhai tsü kina ben.

²⁶Zuli ciwi ameghükuju ntsa sa, nu atssüzüjjen zankeju ntsa sa. Tsümeyi ajenkathu tsüdila sha, nu atssüzüthu tsüdi ccükwen kebhen kenengca shan.

²⁷Isanan atssüzüjjen wi kediwa na shagha, ma ajenkathu na sha ketheng mu keya wi atssüzüthu tsüdila bvüdhale meshen; tsalina ma ketanla ma njünnu hanshi pi ma süthiale kiden.

²⁸Isala Paul na misikhhali magha nu khi, “No ketanla no npathi lalo, ikhang tsüdila he wi ben le!”

²⁹Atssüzüjjen wi kediwa na anni kecanki khieya nu bvü dugho, nu kedheggü nu Paul nu Sila manyi ccü wi nkhwendu.

³⁰Tsaseng wi ma manyi ssi shhula manyi wi keü, “Kediwa keni, hi hangshaya le kesa ghena mangwa nsathu yishü nu?”

³¹Manyi na ma wi khi, “No Apvüwa Jisu nondiya, isa lethu no nu ntheghithu la hangsha yaben”

³²Tsaseng wi manyi na Apvüwa jüh khi pi ma nu ajjen wi kebenthu tsüdi kiza.

³³Tsü ghaja na atssüzüjjen wi kediwa na manyi ssi wa kekihhe yisü tsü bhu cüa, ma nu ma theghithu tsüdila baptaiz saya.

³⁴Tsaseng wi ma manyi ssi wa ma jjen wi kedsakejjü pi cü. Ma nu ma theghithu na anonghe ntsa sa, kepaghenanye mathu na khilitsü Anyiza nondiyadha.

³⁵Ghanenwa wi atsathangya meyi Rom kedithu na kedithu wi “Anyi tsü keni ya bvü thsülo” khi.

³⁶Tsalina atssüzüjjen wi kediwa na wala Paul kiza, “Kedithu na no nu Sila nshinyi teshichilo kesa ahza kesun chidha, tsalina nshinyi shhu nu lebencca whalo.”

³⁷Isala Paul na kediwa wi khi, “Ishinyi na Rom nyi, mathu na ishinyi kesami mangla mu meya lela nyu jawi na ishinyi kihhe nu pi atssüzüjjen wi chi theng nu khili nyu kuthila ishinyi teshi chiale ben kwe? Tsüti sa keya nmi, Rom kedithu ketanla ghola ishinyi khushi thsülo.”

³⁸Kedithu na ajüh hapi Rom kedithu wi kiza chia; nu mathu na Paul nu Sila manyi na Rom nyi le kesa zakeya wi mathu messi ntsa sa.

³⁹Tsalina mathu ghola manyi wi kesami keteshi khie nu atssüzüjjen wina manyi ssi shhula anyunuti tsüwa wina bvülo khie.

⁴⁰Paul nu Sila manyi na atssüzüjjen wina shhu nu Lydia jjen wi wa. Ciwi manyi na kenondithu metuya, nu mathu saketezü jüh khitheng nu bvüa.