Read Northern Rengma Naga KEKULI 21 Bible Online

KEKULI 21 - Northern Rengma Naga bible

KEKULI 21

¹Ikhang na mathu ssinu keteshili meyi ahunjjen wina meshonqhe wa Kos cuya, nu dhitsüwa wi Rhoda cuya, nu ciwi na Patara wi wa.

²Ciwi ikhang na Fonisia wi kewa ahunjjen kesü muya nu ahunjjen tsüwa wina alentsen chia.

³Ikhang na Cipra kaghape wi waya nu ciwi na sasen Siriya wi wa, ciwi na Tur wi ghoya, kepaghenanye ahunjjen na pala pvü keten tsü pi ciwi chiale ben.

⁴Anyu tsüwa wi kenondithu pahan muya nu ikhang ciwi ghanan tagü ben. Mathu na Aghamu wina Paul Jerusalem wi nwa lalo khi.

⁵Isala ikhang na matsü cenkeya seng wi mathu teshi nu alentsen wa, nu mathu tsüdi mathu wubvü, tsangathu ssinu ikhang ssi wa anyu khensha wi aghüsa wi chicü. Ciwi ikhang tsüdila akhhutsüdu gweghe kekhie sa nu keteshili wa.

⁶Isanu ikhang na ahunjjen wi du, nu mathu na ajjen wi wha neng.

⁷Ikhang na ahunjjen wina sa sen Tur wina wa Ptolemai cuya, ciwi ikhang na kenondithu ssinu shalom sa nu ghanan kesü mathu gweghe ben.

⁸ Dhitsüwa wi ikhang na Kaesarea wi gho keya wi Jerusalem wi kekiqathu meshu tagü kessikeyathu jawi ma nyan Filip, Jühketsinyiwa jjen wi tsü ben.

⁹Anyi tsüwa nga ghala mejü na Anyiza jüh khiden.

¹⁰ Ikhang na ciwi ghanan keu keben jü atusenjüh-kechü nyi Agaba na Judea wina gho cuya.

¹¹Ma ikhang wi ghola Paul geshi keqhan tsü khu pi ma ccükwen bhenya nu khi, “Hawa ha Kemetha Ghamu na khiben: Jerusalem wi Judah nyithu na hati nu ageshi keqhan ha pvüwa bhenya nu pi Judah nyi nkenyethu kwen wi chiaben.”

¹²Ikhang na ajüh ha za keya wi ikhang nu kepathu la Paul na Jerusalem wi nwa lalo khie.

¹³Isala ma luneng, “Nthu mangkesa na hati qai pi ileben sameshü ben nu? Hi Apvüwa Jisu ghena Jerusalem wi nyu hi kebhen thsü ketan nyela keshü la shüya mehai.”

¹⁴Ikhang na ma khen meyala nu “Apvüwa kemeshen sa keyawa salo” khi nu ccen ben wa.

¹⁵Ikhang na ghanan keu ciwi keben seng wi kidenya nu Jerusalem wi wa.

¹⁶Kaesarea wina kegho kenondithu pahan la ikhang gweghe wa nu ikhang ssi wa Cipra wina keghowa kheni na nondi keten nyi kesü Mnason jjen wi ben thsü.

¹⁷Ikhang na wa Jerusalem cuya meyi kenondithu na anonghe ntsa nu ikhang ssiya.

¹⁸Dhitsüwa wi Paul na ikhang ssinu James jjen wi wa nan kemehu shenpfüthu tsüdi ciwi benla.

¹⁹Paul na mathu shalom sachi, nu Anyiza na khati ma ssinu Judah nyi nkenyethu jawi kuli khe tsü cüki mabenla khi pi mathu kiza chia.

²⁰Mathu na ajüh tsü za keya seng wi Anyiza seng ntsawa sa. Tsaseng wi mathu Paul kiza, “Acünyuwa Paul, Judah nyi hazar kejon na kenondi nyi sayadha, nu mathu na Mosa Yenwa wi leben chi ntsa kesa no muyaben.

²¹Nyu na no Judah nyithu na Judah nyi nkenye diyyiwa wi hang ketenthu tsüdi wi Mosa Yenwa tsü n-nie lalo kesa pi sansi; mathu tsathu hyu nhanla, nyelela Judah nyi yenthu tsü n-nie lalo pi mathu kiza tenle kesa ncüki khi pi mathu kizadha.

²²Mathu na no gho cudha le kesa zaya benla metsidha. Isathu, khati sa nu?

²³ Tsalina ikhang na no kizaten na tsüti salo. Meshu mejü pala pahan ghena kishen kethengthu na he wi ben.

²⁴No mathu gweghe wa satekemetha yen tsü saya nu mathu kededi tsü sa pi cü; isalethu, mathu na alicaya mehai. Isalethu tsüdila no Mosa Yenwa tsü nie tenle nu hatu wi ncüki khi keten tsüna ntsakhiwa nyele kesa chüyaben.

²⁵ Isala Judah nyi nkenye nondiya kesathu ghena ikhang na mathu wi atsikezhü kekinyi tsse, ajjü, asahang kehanthithu tsü ndsala, nu qheza-inamu kekuli nsa lalo kesa zhü pi kiza chidha.”

²⁶Tsalina Paul na anyi tsüthu ssiya nu dhitsüwa wi wala mathu gweghe satekemetha yen tsü saya. Tsaseng wi ma Kekinyijjen wi du nu satekemetha yen tsü ghanan khaju wi sacen ben, nu kusi mathu kesüsü ghena ahhansha saben khe pi nyu chü thsüa.

²⁷Ghanan tagü cen keten wi Asia yyi wina kegho Judah nyithu pahan na Paul Kekinyijjen wi keben muya. Mathu na anyi tsüdi kethukehi chi nu wa Paul ghanya nu jisha pi

²⁸“Ae, Israel nyithu ghola kiqalilo! Anyi hawa ha kahe wi wala anyi tsüdi sansi pi Israel nyithu, Mosa Yenwa, nu Kekinyijjen ha shun thsüden. Nu ma khili Grik nyithu la ssigho kemetha penwa Kekinyijjen ha nakhi ben le!

²⁹ (Kepaghenanye mathu hatu Efesa wina keghowa Trofima na anyunutiwa wi Paul gweghe keten mu, nu mathu Paul na ma ssinu Kekinyijjen wi wa she kemeshen ghena hati khi.)

³⁰Anyunuti mabenla kivvü ntsa sa shagha, nu anyi tsüdila bvü wa Paul ghanya nu Kekinyijjen wina ma zanshiya. Nu Kekinyijjen jenka tsüdi khen.

³¹Anyithu na Paul pathiale saben, nu Jerusalem mabenla kivvü ben le kesa ajüh pi Rom süpahi benchüwa wi kesun chia.

³²Benchüwa na wan kedithu nu süpahithu pahan ssinu anyitenti jawi du. Anyithu na benchüwa nu ma süpahithu muya meyi Paul nkiccü la.

³³Benchüwa na Paul ghanya nu amighe ssüli keni pi ma bhen yalo kesa ahza khuchia. Isanu ma “Anyi ha thowa nu ma mangwa sa theng nu?” kesa keü.

³⁴Anyitenti jawi pahan na kesü khi, nu kepa na ajüh kepa wi khi nu jisha. Tsalina benchüwa na ajjügi mangla chüti meyala; tsalina ma ma süpahithu na Paul ssi wala aghikehiepen wi chilo kiza.

³⁵Mathu na acükhaku miwi keki kecu wi Paul nie shhugho nu nmehaitha sa gha kesalina süpahithu na wala ma kaghassi pie nu bvüa.

³⁶Anyithu na mathu seng wi magha nu jisha, “Ma pathilo!”

³⁷Mathu na Paul ssinu aghikehiepen non wi du keten pang wi Paul na benchüwa wi khi: “Hi no wi pala pahan kizaya mehai ma?” Benchüwa na ma wi keü, “No Grik jüh khiya mehai kwa le?

³⁸No Ejipt nyi khilili kivvü nu nyu kepathi nyi hazar mejü ssinu ayyikeshü wi bvü kesawa tsü nye kwe?”

³⁹Paul na luneng, “Hi Judah nyi kesü, Silisia yyi wi Tarsa wi kepvügha nyi, nu anyunuti kemechan wi kahang nyi kesü. Tizenthu, hi yala anyithu wi ajühkhi thsülo.”

⁴⁰Benchüwa na ma ajühkhiya kemehai khuchia, tsalina Paul na shagha acükhaku miwi ngan nu ma kwen zanki pi anyithu na ccen benlo khi. Mathu na ccen kesa seng wi Paul na Ibri jüh wina anyithu wi khi: