Read Northern Rengma Naga KEKULI 22 Bible Online

KEKULI 22 - Northern Rengma Naga bible

KEKULI 22

¹“Acünyu nu abathu, hi khili nthu tuwi ishei kepijüh ha kina chilo!”

²Mathu na Paul Ibri jüh wina mathu ccüneng keben za keya wi mathu na tsü miwi ccen ben wa, nu Paul na mathu wi khi:

³ “Hi Silisia yyi wi Tarsa nyu wi kepvügha Judah nyi kesü, isala hi Jerusalem he wi Gamaliel pi hi kesansiwa sa nu hang shagha . Hi ithu bamyithu yenwa tsü khang ntsa nie gho, nu khili nthu tsüdi kahang ti hi kahang pi Anyiza cü ghole.

⁴ Hi Alen hawa nie ketenthu meten-mesha pi shü thsüa. Hi wa npvüza nu nzathu ghanya nu mathu pi atssüzüjjen wi chia.

⁵Keqhaikedi ntsa nu hoho mabenla hi atsentsawa khiben le kesa chüben. Hi mathu na lesüzhü pi Damaska wi Judah nyithu kecü tsü muya, isanu hi wala ciwi anyithu ghan sengho Jerusalem wi mathu meten-mesha le sa.

⁶“Hi ghanan lapvü Damaska tetsaki wa keten wi tang wi kewegü kesü na gho hi wegüya.

⁷Hi ayyi wi khulidua, nu ahhai kesü na hati hi wi kekhi zaya, ‘Saul, Saul, no mangkesa na hi meten-mesha ten nu?’

⁸Ciwi hi ‘Apvüwa, no thowa nu?’ keü. Ma hi wi ‘Hi Nazareth nyiwa Jisu, no ma meten-mesha ketenwa tsü.’ isa khi.

⁹Anyi hi gweghe ketenthu na kewegüwa tsü mu, isala hi zakeben ahhaiwa tsü nza.

¹⁰Hi ma wi ‘Apvüwa, hi khati sa nu?’ keü. Apvüwa na hi kiza, ‘Shagha nu Damaska wi walo, ciwi no mangwa nsathu yishü khe kiden ketheng tsüdi pi no kizaben.’

¹¹Kewegü tsüwa ghena inyon pala nmula, tsalina hi gweghe ketenthu na ikwen zan sen nu Damaska wi wa.”

¹²“Anyunuti ciwi anyi kesü ma nyan Ananiya kesa keccüna sen kemehai nyi ma Ayenwa tsü nie den, nu Judah nyi Damaska wi kahangthu tsüdila ma kinyikü ntsa saden.

¹³Ma ghola ikete wi ngan nu hi kiza, ‘Icünyuwa Saul, no pala mu neng yalo!’ Tsümeyi hi pala mu nengya nu ma ghangchi.

¹⁴Ma khi, ‘Ithu bamyithu Nyiza na no yala ma kemeshen chüya, ma ketsatan maghawa muya, nu ma hhai zaya thsüle kesalina no kessi yadha.

¹⁵Kepaghenanye no mangwa mu nu zayadha khe tsü pi anyi tsüdi kiza nu ma chüza saden.

¹⁶No mangkesa na ngan ben nu? Shagha nu baptaiz saya nu no kesami samethaya, nu ma nyan ci chilo.’

¹⁷“Hi Jerusalem wi wa neng nu Kekinyijjen wi kekhie sa keben wi kemanthi kesü mu.

¹⁸Hi ciwi Apvüwa mu nu ma hi kiza, ‘Wan shagha Jerusalem teshi nu bvülo, kepaghenanye he wi anyithu na no isheikepi jüh tsü ya nten.’

¹⁹Hi luneng, ‘Apvüwa, hi Sinagog tsüdi wi wala no kenondithu ghan pi atssüzü sa thsü nu kiccü tenle kesa mathu na chüti ben.

²⁰ Nu nsheikepiwa Stefan kepathi wi tsü hi la ciwi ben, ma kepathi tsü kesa-u sadha le sa nu hi ma kepathithu thsümeni tsü noncca.’

²¹Apvüwa na hi wi khi, ‘Walo, hi no kesun pi kelensie wi Judah nyi nkenyethu wi chiben.’ ”

²²Anyithu na Paul ajühkhi keben chu ma jüh kina; isala tsü seng wi mathu hhai misi ntsa magha nu jisha, “Ma ssi bvülo! Ma pathilo! Ma pi kahang thsü-u nyele!”

²³Mathu na magha nu athsü ketheng nu ayyi wha pi tang wi cüki.

²⁴Rom süpahi benchüwa na ma süpahithu yala Paul ssi wa aghikehiepen wi chi, nu ma kiccü nu mangkesa na Judah nyithu na hati magha nu ma shunben khe chüyalo kesa ahza khuchia.

²⁵Isala mathu na ma bhenya nu kiccü le sa keben wi Paul na ciwi ngan keben kediwa wi khi, “Nthu na Rom nyi kesü ma kemshensa nkemi ghan pi kiccü kesa ayen ben kwe?”

²⁶Kediwa na ajüh ha zaya nu ma benchüwa wi wala keü, “No khati saben nu? Anyi hawa ha Rom nyi kesü le!”

²⁷Tsalina benchüwa na Paul wi wa ma keü, “Hi kizalo, no Rom nyi kesü kwe?” Paul luneng, “Anle!”

²⁸Benchüwa na khi, “Hi Rom nyi kesü sale kesa ghena apisa kejon pi cü.” Paul na luneng, “Isala hi tsü hi kepvügha wina Rom nyi kesü.”

²⁹Tsümeyi anyithu Paul jühkaghatenle gho kebenthu na asenkheneng; nu benchüwa na messi, kepaghenanye ma Paul na Rom nyi kesü lela ghan pi bhen kesalina.

³⁰Benchüwa na mangkesa na Judah nyithu na Paul kimenni ben khe chüyale sa; tsalina ma dhitsüwa Paul kebhen tsü lisha, nu keqhaikedi ntsathu nu hoho maben cighu chilo ahza khuchia. Tsaseng wi ma Paul ssi wa mathu tuwi ngan thsü.