Read Northern Rengma Naga KEKULI 23 Bible Online

KEKULI 23 - Northern Rengma Naga bible

KEKULI 23

¹Paul na hoho ghang nu khi, “Hi Israel nyithu, hi Anyiza tuwi kahang cüki ha ileben wi mangla kesütu kesa nmila methasi ben.”

²Keqhaikedi ntsa Ananiya na anyi pahan Paul kete wi ngan kebenthu na ma pang cen cülo khi.

³ Ciwi Paul na ma kiza, “No kemiki pi agacü nyen kethengwa! No ayenwa kenie wina ijühkaghakhi le ciwi donki ben, isala no mathu na ipang cen cülo kekhi wina ayenwa tsü pakhhi ben.”

⁴Anyi pahan Paul kete wi kebenthu na ma wi kiza, “No Anyiza wi Keqhaikedi ntsawa kimenni ben le!”

⁵ Paul na luneng, “Hi Israel nyithu, hi ma Keqhaikedi ntsawa kesa nchü le! Ntsawajüh na ‘Nthu na nthu nyithu miwi kekhang kesenthu wi ajüh nkemehai nkhi lalo,’ khiben.”

⁶ Paul na anyi tsü khang jawi pahan na Sadukithu nu pahan na Farisithu kesa mukeya wi ma hoho wi magha nu khi, “Hi Israel nyithu, hi Farisi tsa nu hi la Farisi kesü. Hi anyi ha keshü wina hangneng-shagha ben kesa kenondi ghena he wi ijühkaghakhi ben le!”

⁷Ma ajüh ha khichi meyi Farisithu nu Sadukithu jawi kitagha shagha nu mathu ajüh kepapa sa.

⁸ (Kepaghenanye Sadukithu na anyi ha keshü wina hangneng-shagha nben nu ciwi tangnyilothu nu aghamuthu la nmi; isala Farisithu na tsü kecheng qho nondiden.)

⁹Anyithu kejisha tsüna misi pfüpfü shagha, nu Farisithu jawi Ayenkesansithu pahan na shagha khang ntsa nu khi, “Ikhang na anyi hawa ha kesazzi mangla mu meya le! Ha aghamu nyelela tangnyilo kesü na ma kiza benla metsiben!”

¹⁰Ajüh keccücanliwa tsüna kivvü ntsa shagha kesalina benchüwa na mathu Paul zandhi-zanghe nashe kesa messiya. Tsalina ma süpahithu ya anyitenti jawi wa Paul zan sen wa aghikehiepen wi chilo khi.

¹¹Tsü ghaja Apvüwa na gho Paul kete wi ngan nu ma wi khi, “Nmessi lalo! No he Jerusalem wi icüki pi khichidha, nu no wa Rom wila tsüti nsathu yishüben.”

¹²Ghanenwa wi Judah nyithu na saghu nu acho kesü kidenya. Mathu na Paul npi pathikeya chu dsajjü ntenle kesa kishen.

¹³Ciwi meshu jügha gilli na acho ha kidenya.

¹⁴Tsaseng wi mathu na keqhaikedi ntsathu nu keshenpfüthu wi wa nu khi, “Ikhang na Paul npi pathikeya chu dsajjü ntenle khila kishendha.

¹⁵Tsalina no nu hoho na Paul cüki chütiyale kesa ghe sala ma ssinu he wi gholo kesa ajüh pi Rom benchüwa kizalo. Isanu ma he wi npi kegho tuwi na ikhang ma pathiaben .”

¹⁶Isala Paul tssüggüwa tsa na acho ha chüya nu wala aghikehiepen wi du nu khi pi Paul kiza.

¹⁷Tsaseng wi Paul na kedi kesü cichi nu khi pi ma kiza, “Pvüza hawa ha ajüh pahan pi Rom benchüwa kekiza ben na ma ssi wa ma wi chicülo.”

¹⁸Kediwa na anyi tsü ssinu Rom benchüwa wi wa nu khi, “Atssüzüwa Paul na hi cichi nu pvüza hawa ha no wi ajüh pahan pi kekiza ben na ssinu no wi walo kiza.”

¹⁹Rom benchüwa na anyi tsü kwen zan sen wa ma kepa sa nu ma wi keü, “No mangwa pi hi kiza le ben nu?”

²⁰Ma khi, “Judah nyi kekhang kesenthu na dhitsü wi Paul cüki chütiyale kesa ghe sala ma ssinu hoho tuwi gholo kesa no wi khie tenle centheng.

²¹Isala mathu jüh nkina lalo, kepaghenanye anyi jügha gilli na kuthi nu ma hieben. Mathu tsüdila Paul npi pathikeya chu mangla dsajjü ntenle khila kishendha. Mathu khili tsüti sale njüh khukechi hie ben.”

²²Benchüwa na khi, “No ajüh hapi hi kizadha le kesa pi thola nkiza lalo.” Isanu ma pvüzawa tsü kesun pi bvü thsüa.

²³Tsaseng wi benchüwa na ma kekhu wi kedi keni cichi nu kiza, “Süpahi meza keni, gorukessithu achentagü, nu apie kesenthu meza keni gweghe shita amighe tugu wi Kaesarea wi wale kesa ghena kiden yalo.

²⁴Goru pahan pi Paul ghena khuchi nu ma yala yazishu wala Ahng Felix cuya thsülo.”

²⁵Tsaseng wi benchüwa na lesü hati zhüpi cüchi:

²⁶“Klaudia Lusia na zhü pi ajenkebenwa ahng Felix cüben: Shalom saben.

²⁷Judah nyithu na anyi ha ghanya nu ma pathiale saben. Hi chükeya ma Rom nyi kesü kesalina hi süpahithu ssi wa ma khushiya.

²⁸Hi mathu mangkesa na ma kimenni ben khe chüyale kesalina ma ssinu mathu hoho wi wa.

²⁹Ciwi hi ma keshü-u nyelela pi atssüzü kesa-u sazzi ketheng mangla mu meya, mathu na ma kimenni kebenwa na mathu Yenwa tsü ghena.

³⁰Hi Judah nyithu na ma pathiale acho kiden benle kesa chükeya wi ma kesun pi no wi chiale kesa südheya. Nu ma nanmeghü kebenthu na ntuwi wala ma kekimenni jüh khilo kesa kizadha.”

³¹Tsalina süpahithu na ajüh tsü kekina wina mathu aghaja na Paul ssi wa Antipatri cuya.

³²Dhitsüwa süpahi alenketsenthu na kheneng sen nu aghikehiepen wi ghoa, nu gorukessithu na ma ssi wa thsüa.

³³Mathu na ma ssinu Kaesarea wi wa, nu lesü kezhü tsü nu Paul pi ahngwa kwen wi chi cüa.

³⁴Ahng na lesü kezhü tsü si nu ma Paul na ayyi khiewa kahang nyi nu kesa keü. Ma Paul na Silisia wina ghole kesa chükeya wi

³⁵ma khi, “Hi no nankemeghüthu na gho ccüla njüh kinaden.” Tsaseng wi ma Paul ssi wa ahng jjen aghikehiepen wi chilo kesa ahza khuchia.