Read Northern Rengma Naga KEKULI 28 Bible Online

KEKULI 28 - Northern Rengma Naga bible

KEKULI 28

¹Ikhang na aghüsa cukeya wi ayyi-mangkehi tsüna Malta le kesa chüya.

²Anyi ciwi kahangthu na ikhang ghena sashü na mehai. atsangho pi mejen kesalina mathu na anni sa pi anonkeghe sala ikhang ssiya.

³Paul na achan bhen pie gho annibhon wi khalachi nu jeng keshagha wi amaghang kesü na shhugho ma kwen kejiya.

⁴Anyithu na amaghang na Paul kwen kejisen keben kemu wi khokho wi khi, “Anyi ha nyu kepathi nyi sabenla metsiben. Ma atssükedone wina shhugho yadha, isala ma kekuli tsü ghena ma hangya thsü nben.”

⁵Isala Paul na mangla nsala amaghang tsü kethengsha pi annibhon wi khala chia.

⁶Mathu Paul na wan ma gwo pvü shagha nu khulidu shüaben le sa. Isala matsü kesie hie lela mangla nkesa ghena mathu kemeshen kemili nu khi, “Ma acenpvü kesü le!”

⁷Ayyi-mangkehi tsüwa wi kekhangwa Publia lli pahan na lensie khang nkesa wi ben. Ma nonkeghe sa ikhang ssiya nu ikhang na ghanan kecheng ma kejen sa.

⁸Publia ba na muwhe nu ajjü ku nu awe wi ben. Paul na ma kejenpen wi du ma kwen chang pi ma miwi chi nu kekhie sachi nu sa pi mehai cüa.

⁹Tsüti sa keya wi ayyi-mangkehi ciwi kesakinaathu tsüdi gho nu mathu sa pi mehai cüa.

¹⁰Mathu aju kejon pi ikhang cü, nu ikhang na wa keten wi alenca wi nsenthu keyishü pi ikhang cü.

¹¹Asha kecheng seng wi ikhang na ahunjjen Alexandria wina kegho pathsü ayyi-mangkehi tsüwa wi ben wa kesa ma nyan “Acenpvü gweghe tsa” tsü wina wa.

¹²Ikhang wala Surakuse cuya nu ciwi ghanan kecheng ben.

¹³Ikhang ciwi na kevüli sen wa Rhegium nyunuti cuya. Dhitsüwa acülawa na ameghü sho ntsa sa nu ikhang keni ghanan wi ccüna wa Puteoli cuya.

¹⁴Ciwi ikhang na kenondithu pahan muya, nu mathu na ikhang mathu gweghe ghanan tagü ben lalo khie. Tsaseng wi ikhang na wa Rom cuya.

¹⁵Rom wi kenondithu na ikhang cüki zaya nu ghala Appia Senkesapen nyuti nu Kijünyikewa Jjen Kecheng le ci keten wi ikhang metu. Paul na mathu mu keya wi Anyiza seng, nu satezü ntsa sachi.

¹⁶Ikhang na gho Rom cukeya wi Paul yala ma ketan ben nu süpahi pi ma ghihie thsü.

¹⁷Ghanan kecheng seng wi Paul na Judah nyi ccülikesathu ci pi keccünengli. Mathu na gho saghukeya wi ma mathu wi khi, “Hi Israel nyithu, hi mangla anyithu nyelela ithu bamyithu Yenwa tsü keshun kekuli nsa lela hi ghan pi Jerusalem wi atssüzü sa thsü nu pi Rom nyithu kwen wi chile.

¹⁸Mathu na hi ghan-nan nu hi teshichi mvu sa, kepaghenanye hi keshü qo kekuli mangla sazzi ketheng mu meya.

¹⁹ Isala Judah nyithu na ha shun kesa wi hi inyithu keshun jüh mangla nmi lela Rom Kadimiwa tuwi wa tenle khieya.

²⁰Tsalina hi ha jjügi ghena nthu metu chi nu ajüh pi kizale kesa khie, kepaghenanye hi Israel nyithu na nondi ketenwa tsü ghena hi amighe ssüli pvü le!”

²¹Mathu na ma kiza, “Ikhang na Judea wi ncüki lesükezhü kesüla mu meya, nu kenondithu la gho ikhang nkiza nyelela ncüki nkemehai kekhi la za meya.

²²Isala ikhang na no wi kinaya mvu benle, kepaghenanye kahe wi anyi tsüdila nthu keccüna zi wa ha keshun jüh khiden kesa ikhang na chüben.”

²³Tsalina mathu na Paul gweghe atsathang kesü ssan pi theng, nu tsü ghanan wi anyi ji ntsawa na Paul keben pen wi gho. Ma ma khi ketenwa Anyiza Kadiyyi cüki tsü aghanen na wa shitawa kecu khi pi mathu kiza. Ma Jisu cüki khi pi mathu zanyale kesalina Mosa Yenwa nu atusenjüh-kechüthu na zhüketheng wi la khi.

²⁴Ma jüh ghena mathu pahan zanya, isala pahan na n-nondi.

²⁵Tsalina mathu na Paul ajüh ha kekhi seng wi mathu ajüh kepapa sa nu bvü zighe: “Kemetha Ghamu na Isa atusenjüh-kechüwa wina nthu bamyithu wi mehaitsü kizachidha le!

²⁶Ma hati khi: ‘Wala anyi hathu wi kizalo: Nthu na kina nu kinaben lela chüshiya nben; nthu na ghang nu ghangben lela mushiya nben,

²⁷kepaghenanye anyi hathu leben na kejüphon sa, mathu khuna decu, nu mathu nyon nmuladha. nyelethu, mathu nyon pi mu, mathu khuna pi za, nu mathu leben pi chüshiya, isanu hi wi kheneng ghothu hi mathu sa pi mehai cüa kesa, Anyiza na khiben.’ ”

²⁸Tsaseng wi Paul na khi, “Nthu na ha chü meyathu yishü, Anyiza na hangshakeya ketsijüh ha kesun pi Judah nyi nkenyethu wi chicüdha. Mathu na tsü yayaben.”

²⁹Paul na ha kekhi seng wi Judah nyithu na mathu jawi kicennali ntsa sa nu bvüa.

³⁰Paul na amapi keni ciwi ma ketanla ma ghena ajjen denga nu hang, nu nyu na ma hhainan keghothu tsüdila anonkeghe sala ssiya.

³¹Ma nkuthila kempvüza sa nu Anyiza Kadiyyi cüki pi khi nu Apvüwa Jisu Khrista cüki pi nyu sansi.