Read Northern Rengma Naga KEKULI 3 Bible Online

KEKULI 3 - Northern Rengma Naga bible

KEKULI 3

¹Ghanan kesü Pitor nu Johan manyi minulen amighe kecheng kekihhe kekhie kesa tsü wi Kekinyijjen wi wa.

²Ciwi anyi kesü ma kahang chu accü nkemehai na ben. Mathu na atsathangla ma pie gho Khweti-jenka Tsikemehaiwa wi tsü chi nu ma yala nyu Kekinyijjen wi kewathu wi kuwhe thsüden.

³Anyi tsüna Pitor nu Johan manyi na Kekinyijjen wi du keten muya nu manyi wi pala khie.

⁴Manyi anyi tsü ghang nu Pitor na khi, “Ishinyi ghanglo.”

⁵Tsalina ma manyi wi pala pahan muya ben she meshen nu manyi ghangchi.

⁶Pitor na ma wi kiza, “Hi suna rükatssü mangla nmi, isala hi mangwa ben khe pi no cüden; Nazareth nyiwa Jisu Khrista nyan wina shagha nu alentsen walo!”

⁷Isanu ma anyi tsüwa kwen ajewa zan nu ma zankichi. Tsü meyi anyi tsüwa ma ccü nu ma kwen na zü shagha;

⁸ma penshagha nganya nu alentsenwa. Tsaseng wi ma manyi gweghe Kekinyijjen wi wa nu penshagha alentsen nu kephenki nu Anyiza seng.

⁹Anyi tsüdila ma alentsen keten muya nu Anyiza seng,

¹⁰nu mathu na anyi tsüwa tsüna Khweti-jenka Tsikemehaiwa wi donki nu kuwhe ketenwa tsüle kesa chüya, mathu tsüdila ma miwi khati sa khe tsüghena amansa ntsa sa.

¹¹Anyi tsüna Solomon Ccühha wi Pitor nu Johan manyi gweghe keben ghena anyi tsüdila amansa nu bvü sen nu mathu wi wa.

¹²Pitor na anyithu mu keya wi ma mathu wi khi, “Hi Israel nyithu, nthu mangkesa ha ghena amansa nu ikhang ghangben nu? Nthu kemeshen tsü ha ishinyi kekhang kemehai wina anyi ha sa pi alentsenya thsüle ben kwe?

¹³ Abraham, Isak, nu Jakob Nyiza, nu ithu baqhaithu Nyiza na ma maghawa Jisu nyankethang sa kechi. Nthu na ma ghan pi kekhang kesenthu kwen wi chia, nu Pilat na ma teshi chiale sa lela nthu na Pilat tuwi na ma meya mvula.

¹⁴ Ma metha nu tsatan, isala nthu na ma meya mvula, nu nthu na Pilat wi nthu kenenwa anyi kepathi nyi tsü lisha chi cüa.

¹⁵Nthu na ma wina kahang keghowa tsü pathia; isala Anyiza na keshü wina ma sa pi hangnengya thsüa— nu ikhang na ha ghena chüzathu.

¹⁶Hawa ha Jisu nyan kekhang wina kezü pi anyi accü nkemehaiwa ha kecü. Nthu na mu nu chü kebenwa hana ma nyan kenondi wina saya; Ha Jisu kenondi wina nthu tsüdi tuwi hati ma sa pi mehai cüdha.

¹⁷“Icünyuthu, nthu nu nthu ccülikesathu na Jisu miwi kuli kechi tsüna nkechü ghena le kesa hi chüben.

¹⁸Anyiza na kheni wi atusenjüh- kechüthu wina Khrista na ketizen saben kesa khi ketheng tsü hati nu cenya thsüdha.

¹⁹Tsalina leben khapegheya nu Anyiza wi gholo, isathu ma nthu kesami teshi pi cüben na.

²⁰Isanu Apvüwa wina aghamulen wi sa ketezü matsü na ghoben, nu ma nthu ghena kessikeyawa Jisu, pi Messiya le ci ketenwa tsü kesun chi cüben.

²¹Anyiza na kheni ma atusenjüh-kechü kemethathu wina khi ketheng pala tsüdila sa pi ketheü sa keten matsü na npi kegho chu ma tang wi nbenthu yishü.

²² Kepaghenanye Mosa na khitheng: ‘Apvüwa nthu Nyiza na atusenjüh-kechü kesü kesun pi nthu wi chi cüben; ma hi kesun kechi ti, ma nthu nyi kesü saben. Ma pala pi nthu kekiza tsüdila nsathu yishü.

²³ Anyi thowa na atusenjüh-kechüwa tsü jüh nkina khe Anyiza nyithu jawi na ma kepa sa nu pi yasaben.’

²⁴Atusenjüh- kechüthu, Samuel nu ma seng wi keghothu tsüdila ketsijüh-khi nu shita-ghanen mangwa saben khe tsü cüki la khi.

²⁵ Atusenjüh-kechüthu wina Anyiza jühkhukechi tsüna nthu ghena, nu Anyiza na nthu bamyithu ssinu cenkethenjüh wi tsü nthu shei la ben. Ma Abraham wi kekhi ti, ‘Nthu shicübvüghathu wina hi sawegü pi ayyi nyi tsüdi cüben.’

²⁶Anyiza na nthu tsüdila nkemehai len wina kheneng gho nu kesawegü pvüyalo kesalina ma ma maghawa kessiya nu atuwa kesun pi nthu wi chicüle.”