Read Northern Rengma Naga KEKULI 7 Bible Online

KEKULI 7 - Northern Rengma Naga bible

KEKULI 7

¹Keqhaikedi ntsawa na Stefan keü, “Ha ntsakhiwa kwe?”

²Stefan na luneng, “Acünyuthu nu abathu, ijüh kina chilo! Ithu baqhai Abraham na wa Haran wi npi kahang Mesopotamia wi keben Anyiza nyankethang na ma wi gho,

³ nu khi, ‘Ntheghi nu no diyyiwa tsü teshi nu hi ayyi pi no ccüca keten wi tsü walo.’

⁴ Tsalina ma ma diyyiwa tsü teshi nu wa Haran wi hang wa. Abraham na ma ba keshü seng wi Anyiza na ma kesun pi nthu khili hang keben yyi ha wi chia.

⁵ Tsü tsüwi Anyiza na Abraham ya ayyi meter kesütanla pi ma ji sayalo pi ncü. Isala tsü pi ma ji nu ma tsangathu ji saya thsüden kesa khishi chia. Abraham na atsa nkemi tsü wi ajüh ha khichi.

⁶ Hawa ha Anyiza na ma wi kekiza, ‘Nshicübvüghathu na wala amapi meza mejü asang diyyi wi nyu nssümaghathu sala hang nu nyu na mathu meten-mesha ntsa saben.

⁷ Isala hi kemeten-kemesha pi anyithu mathu pi nssümaghathu sa thsü kebenthu cüden, isanu tsaseng wi mathu na ayyi ciwi na shhuya lethu, apen he wi hi kinyiben.’

⁸ Tsaseng wi Anyiza na cenkethenjüh zensu wina ahyukahan yen pi Abraham cüa. Tsalina Abraham na Isak pvügha nu tazen ghanan wi ma hyuhan; Isak na Jakob hyuhan, nu Jakob na abamyi kemechanthu taghakeni hyuhan.”

⁹ “Ithu bamyithu na Josef ghang pi anyonsa nu ma ghan pi Ejipt wi nyu nssümagha sala jeü chia, isala Anyiza tsü ma ssiden,

¹⁰ nu agükeccü tsüdi wi lela ma hangshaya. Josef na Ejipt Kadimiwa tuwi kewa wi Anyiza na ayencüki kemehai nu kemetsa pi ma cü nu ma Kadimiwa kaghali pvüya, nu Kadimiwa na Josef pi Ejipt yyi nu kadipen tsüdi miwi ahng sa thsüa.

¹¹ Tsaseng wi Ejipt nu Kanaan yyi tsüdi wila azeng sa gho, nu anyithu na ketizen sa ntsa sa. Tsalina ithu bamyithu na kedsakejjü mangla nmula.

¹²Jakob na Ejipt yyi wi asu benle kesa zakeya wi ma tsathu, ithu bamyithu tsü atuwa sa kesun pi hhainan wa thsü.

¹³ Keni tughuwa wi Josef na ma cünyuthu yala ma chüya thsüa, nu Ejipt Kadimiwa la Josef theghi cüki chüya.

¹⁴ Josef na ma ba Jakob nu ma theghithu acentagü nu manga tsüdi ssinu Ejipt wi dugholo kesun chia.

¹⁵ Tsalina Jakob na Ejipt wi cü nu ma nu ithu bamyithu la ciwi shü.

¹⁶ Mathu kamang pvü wa Shekhem wi Abraham na apisa pi Hamor tsanga wi ashüjjen shei ketheng wi tsü vhüa.”

¹⁷ “Anyiza jüh khi pi Abraham kiza kethengwa tsü cenyale kesa matsü kecu pang wi Ejipt wi ithu nyi la ji kayi ntsa sa.

¹⁸Asakhen wi Josef nkechü nyi kesü na Ejipt yyi wi Kadimiwa saya.

¹⁹ Ma ithu nyi n-nanmvu ntsa sa nu ithu bamyithu meten-mesha, nu mathu meten nu mathu tsangathu pi shü thsüale kesalina pi khala thsüa.

²⁰ Tsü tsüwi Mosa, ghanyi atsikemehai kesü tsü pvüghaya nu asha kecheng ma pi ajjen wi noncca.

²¹ Mosa pila amei wi khala kesa wi Ejipt Kadimiwa nga na Mosa noncca pi ma tsa ti saya.

²²Mosa na Ejipt palakechü pi ma pongya nu ma kekuli nu ma jüh wina anyi kesü sa shagha .

²³ “Mosa na ma kahang mapi jügha wi ma Israel nyithu hhainan wale meshenya.

²⁴Ciwi ma Ejipt nyi kesü na ma nyi meten-mesha keben muya nu tsüwa sheipi wala Ejipt nyiwa tsü pathia.

²⁵(Ma kemeshen ma nyithu na Anyiza na ma ssinu mathu lisha chicü keten tsü chüya benshe sa; isala mathu na tsüwa tsü chü meyala.)

²⁶Dhitsüwa wi la ma Israel nyi meshu keni na kitagha keben muya nu ma manyi yala kemehaiwa sa thsüle nu khi, ‘Kinachilo! Nshinyi qho Israel nyi, mangkesa na hati nshinyi kitaghaben nu?’

²⁷Isala anyi ma pvüshangwa kiccü kebenwa na Mosa deshen pi bvü thsü nu khi, ‘Thowa na no pi ishinyi pendhewa nu kaghanwa sa thsü nu?

²⁸No ghanie Ejipt nyi pathi kesa tsüti hi la pathi mvuben kwe?’

²⁹ Mosa na ajüh ha zakeya wi ma Ejipt wina bvüsen wa Midia yyi wi hang wa. Ma ciwi atsa keni muya.

³⁰ “Amapi jügha seng wi tangnyilo kesü na Sinai Yikha kete ayyikeshü wi aghangbhon kesü kemecang wi Mosa tuwi gho.

³¹Mosa na tsü mu pi ma mansaya nu ma tsü ghangchi nanle tetsaki wha, isala ma Apvüwa hhai zaya:

³²‘Hi nbamyithu Abraham, Isak, nu Jakob Nyiza.’ Mosa na messi pi kedheggü nu tsü ghang messia.

³³Apvüwa na ma wi khi, ‘Nccüguwen khushilo, kepaghenanye no ngan keben yyi tsüna kemetha.

³⁴Hi inyithu na Ejipt wi ketizen sa keben tsü muyadha. Hi mathu kiqai hhai zaya nu mathu hangshaya le ghoben. Khili ghalo; hi no kesun pi Ejipt wi chi neng tenle!’

³⁵ “Israel nyithu no meya mvula kesawa tsüna Mosa. Mathu ma wi keü, ‘Thowa na no pi ishinyi pendhewa nu kaghanwa sa thsü nu?’ Anyiza na Mosa kesun pi ma nyithu miwi kekhang kesenwa nu aghangbhon kemecang wi ma tuwi keghowa tangnyilowa tsü kekiqa sen nu mathu lisha chicüle sa thsü.

³⁶ Ma Ejipt wina anyithu ssinu shhu, ma Ejipt nu Kenmie Tssükedone, nu ayyikeshü wi amapi jügha azensuthu nu amankesathu kuli.

³⁷ Mosa na Israel nyithu wi khi, ‘Anyiza na hi kesun kechi ti [2] atusenjüh-kechü kesü kesun pi nthu wi chi cüben, nu ma nthu nyi kesü saben.’

³⁸Israel nyithu na ayyikeshü wi keten wi ma la ciwi mathu gweghe den; ma ciwi ithu bamyithu nu tangnyilo Sinai Yikha wi ma keccünengwa gweghe den, nu ma Anyiza ketsijüh kahangwa tsü muya nu pi ithu cü.

³⁹“Isala ithu bamyithu na ma jüh nkina mvula; mathu na ma teshi theng nu Ejipt wi wa neng mvu sa.

⁴⁰ Tsalina mathu na Aaron wi khi, ‘Acenpvüthu zhü pi ithu ssi wa thsülo, anyi Ejipt wina ithu ssi keshhughowa Mosa tsüna khati sadha khe ithu na nchüladha.’

⁴¹ Isanu mathu na atsikezhü kesü amesü süpon tsi ti kesa saya, nu ahhansha sa pi tsü cü, nu mathu atsikezhü sakeya tsü kekinyi wi kemishu sa.

⁴² Tsalina Anyiza na mathu teshi nu mathu yala tang wi ghotsithu kinyi wa thsü, tsüna atusenjüh- kechüthu lesüshen wi zhü ketheng ti: ‘Israel nyithu! Nthu na amapi jügha ayyikeshü wi keten wi, nthu na aghangsathu pathi pi ahhansha sa pi hi ncü.

⁴³Tsüna nthu na Molek cenpvü nithsüjjen, nu nthu ghotsi cenpvü Refan tsikezhü tsü pvü; tsüna nthu na kinyile kesa atsikezhüthu tsü. Tsalina hi nthu kesun pi Babilon kushinyi sa bvü thsüa.’

⁴⁴ “Ithu bamyithu na ayyikeshü wi cenkethenjüh Nithsüjjenwa tsü pvüden. Tsüna Anyiza na Mosa ya sayalo kiza nu matsi pi Mosa keccüca tsüti nie nu sa theng.

⁴⁵ Tsashi seng wi ithu bamyithu na mathu bathu wi nithsüjjen tsü muya nu tsü pvü wa Joshua gweghe mathu na atujügüwa lethu Anyiza na amizza kepathu jügüshi kesa wi ayyi tsü nkaya. Nu tsüna David tsü kecu chu ciwi ben.

⁴⁶Ma Anyiza kaghali pvüya nu Anyiza na Jakob Nyiza keben pen pi ma cülo khie.

⁴⁷ Isala tsüna Solomon na Anyiza ghena ajjen sachi.

⁴⁸“Isala Kemisintsa Nyiza na anyi kwen pi kesa jjen wi tsü ben nten; atusenjüh-kechüwa na kekhi ti,

⁴⁹ ‘Apvüwa na khi, tang wi tsüna hi kadipen, nu ayyi tsüna iccü kenni pen. Nthu na ajjen khati kesa sa pi hi cü mvu ben nu? Ighena kemnanpen tsüna khiewa nu?

⁵⁰Hi pala ha tsüdi nsachi kwe?’

⁵¹ Stefan na mathu wi khi, “Nthu na khatila leben dhu nu! Nthu leben na Anyiza nkechüthu leben ti, nu nthu khuna tecu pi Anyiza ketsijüh tsü kina meya! Nthu na nthu bamyithu ti, nthu la Kemetha Ghamu tsü ssi kaghashenden!

⁵²Nthu bamyithu na atusenjüh- kechüthu kesüla nkemeten-kemesha ben kwe? Mathu na kheni na Anyiza nyilothu na ketsatan maghawa gho keten cüki kekhithu tsü pathia. Nu nthu na khili ma kematsa nu kepathithu sadha.

⁵³Nthu na tangnyilothu wina Anyiza yenwa tsü muya, isala nthu na tsü nkina le!”

⁵⁴Hoho wi anyithu na Stefan jüh tsü kina pi aghepvü ntsa sa, alebenminu nu ma ghang nu mathu yha kemeküli.

⁵⁵Isala Stefan na Kemetha Ghamu pi pong pvü nu tang wi ghangchi nan Anyiza nyankethang nu Jisu na Anyiza kwen ajewa ngan keben muya.

⁵⁶Ma khi, “Ghangchilo! Tang wi sha nu Anyi Tsawa na Anyiza kwen ajewa wi ngan keben hi mu ben le!”

⁵⁷Anyithu na magha ntsa sa nu mathu kwenzza pi mathu khuna duwen bhonya. Isanu mathu na ma wi bvü wha,

⁵⁸mathu na anyunutiwa wina ma zanshi nu alon pi ma kicenthia. Chüzathu na mathu thsümeni teshi pi kepvünyi kesü Saul ccü wi chia.

⁵⁹Mathu na alon pi Stefan kecen keben wi ma Apvüwa cichi nu khi, “Apvüwa Jisu, ighamu ssiyalo!”

⁶⁰Ma khutsüdu misikhhali jisha nu, “Apvüwa! Kesami ha pi mathu miwi nchi lalo!” Ma ha khichi nu shü wa.