Read Northern Rengma Naga KEKULI 9 Bible Online

KEKULI 9 - Northern Rengma Naga bible

KEKULI 9

¹Tsü tsüwi Saul na Apvüwa senkeniethu pathi nu pateqhe ben. Ma Keqhaikedi ntsawa wi wa,

²lesü zhü pi Damaska wi Sinagogthu wi chi cülo khie, isanu ma wala nza le npvüza lela Apvüwa Lenwa tsü nie ketenthu muya lethu, mathu bhen sen nu Jerusalem wi gho nengle kesalina.

³Saul na Damaska nyunutiwa tetsaki wa keten wi tang wi kewegü kesü na gho ma ghongya.

⁴Ma ayyi wi khulidu nu ahhai kesü hati kekhi zaya, “Saul, Saul! No mangkesa na hi meten-mesha benden nu?”

⁵Ma keü, “Apvüwa, no thowa nu?” Ahhai tsüwa na luneng, “Hi Jisu, no ma meten-mesha ketenwa tsü.

⁶Isala no shagha nu anyunutiwa wi tsü walo, ciwi no mangwa nsathu yishü khe pi no kizaben.”

⁷Anyi Saul gweghe ketenthu na ajüh kesüla nkhila ngan wa; mathu na ahhai tsü zaben, isala thola nmu.

⁸Saul na ayyi wina shagha nu ma nyon kü pi ghangchi lela mangla nmu. Tsalina ma gweghe ketenthu na ma kwen zanya nu ma ssisen Damaska wi wa.

⁹Ma ghanan kecheng mangla nmu nu tsüjü wi mangla ndsajjü.

¹⁰Ciwi Damaska wi Khristanyi kesü ma nyan Ananiya na ben. Ma kemanthi kesü mu, ciwi Apvüwa na ma cichi, “Ananiya!” Ma luneng, “Hi he wi benle, Apvüwa.”

¹¹Apvüwa na ma wi khi, “Shagha kidenya nu Alen Kemeshonwa wi tsü walo, nu Judah jjen wi anyi kesü Tarsa wina kegho ma nyan Saul tsü keülo. Ma kekhie saben.

¹²nu ma kemanthi wina anyi kesü ma nyan Ananiya na ghola akwen chang pi ma miwi chi nu ma pala mu nengya kesa mudha.”

¹³Ananiya na luneng, “Apvüwa, anyi kejonla anyi hawa cüki nu ma Jerusalem wi n-nyithu miwi qhethiketen kesa kekuli cüki tsüdi khi pi hi kizadha.

¹⁴Nu ma keqhaikedi ntsathu wi kekhang khieya nu he Damaska wi no kinyi ketenthu ghan yale kesalina ghoben.”

¹⁵Apvüwa na ma wi khi, “Walo, kepaghenanye hi ma yala hi kekuli sa nu inyan pi Judah nyi nkenyethu, kadimithu, nu Israel nyithu chüya thsüle kesalina hi ma kessi yadha.

¹⁶Nu ma ighena ketizen nsathu keyishü tsüdi pi ma ccücaden.”

¹⁷Tsalina Ananiya na Saul keben jjen wi tsü wala ma kwen chang pi ma miwi chi nu khi, “Icünyuwa Saul, no he wi gha keten alenca wi ma kemuwa Apvüwa Jisu tsüna hi kesun chiben. No ya pala mu nengya thsü nu Kemetha Ghamu pi pongya thsüle kesalina ma hi kesun chiben.”

¹⁸Tsümeyi angakü ti kesa Saul nyon wina qanca, nu ma pala mu nengya. Ma shagha nu baptaiz saya,

¹⁹nu ma dsajjü keya seng wi zü nengya. Saul na Damaska wi kenondithu gweghe ghanan keu ben.

²⁰Ma meshonqhe Sinagogthu wi wa nu Jisu tsüna Anyiza Tsawa le kesa pi nyu sansi.

²¹Ma jüh kekhi tsü za keyathu tsüdila amansa nu keü, “Anyi hawa ha Jerusalem wi anyi Jisu kinyi ketenthu pathi ketenwa tsü nye kwe? Nu ma he wi tsü jjügi ghena anyithu tsü ghan sen nu keqhaikedi ntsathu wi wale kesa ghena gho nben kwe?”

²²Isala Saul kesansijüh na khang pfüpfü sa nu Jisu tsüna Messiya le chütiya kesalina Damaska wi kahang Judah nyithu na ma luneng meyala.

²³ Ghanan kejon seng wi Judah nyithu na saghuya nu Saul pathiale kesa kiden,

²⁴isala nyu na mathu cho tsü pi ma kiza. Mathu na aghaja ghanan anyunutiwa khweti jenka wi ma hie.

²⁵Isala ghaja kesü wi Saul senkeniethu na ma pi ashijü kesü wi chiya nu pi akhweti ku kebhi wina shhu thsüa.

²⁶Saul na Jerusalem wi kewa wi ma sansikeyathu gweghe le sa, isala mathu tsüdi ma messi, kepaghenanye mathu na ma la sansikeya nyi kesü sayadha le kesa n-nondi.

²⁷Tsaseng wi Barnaba na gho Saul ssinu apostelthu wi wala ma khati nu alenca wi Apvüwa metuya nu Apvüwa na ma keccüneng cüki tsü khimetha pi mathu kiza. Nu Saul na khati nu Damaska wi kempvüza sala Jisu nyan khi pi nyu sansi khe tsü cüki la khi pi mathu kiza.

²⁸Tsalina Saul na mathu gweghe ben wa, nu Jerusalem tsüdi wi wa kempvüza sala Apvüwa nyan khi pi nyu sansi.

²⁹Ma Judah nyi Grik jüh kekhithu la ssinu keccücanli, nu mathu na ma pathiale kiden.

³⁰Kenondithu na ha chükeya wi mathu na Saul ssinu Kaesarea wi wa nu ma kesun pi Tarsa wi bvü thsüa.

³¹Tsalina ha Judea, Galilee, nu Samaria tsüdi wi kemehu na kecca tsü kesü sa. Kemetha Ghamu kekiqa wina kemehu satezü nu ji pfüpfü sa, nu Apvüwa kinyikü nu hang.

³²Pitor na kahe tsüdi wi wa, matsü kesü wi ma Luda wi Anyiza nyithu hhainan wa.

³³Ma ciwi anyi kesü ma nyan Aena tsüna cügüshü nu amapi tazen awe dha keben muya.

³⁴Pitor na ma wi kiza, “Aena, Jisu Khrista na no sa pi mehai cüben, shagha nu nwe pie yalo.” Isa nan Aena na wan shagha .

³⁵Luda nu Sharon yyi wi kahangthu tsüdila ma muya theng nu Apvüwa wi kheneng gho.

³⁶Joppa wi kenondi nyi nza kesü ma nyan Tabitha (Grik jüh wina ma nyan Dorka, ma jjügi “ameshü”) na ben. Ma matsü tsüdi wi kemehai kuli nu ketha-uthu kiqaden.

³⁷Tsü tsüwi ma naa nu shü. Mathu na ma kamang tsü bhu nu pi ajjenshha tangwa wi chitheng.

³⁸Joppa nu Luda manyi jü na kesie nye. Joppa wi kenondithu na Pitor na Luda wi benle kesa chükeya wi mathu na meshu keni wi hati khila kesun pi ma ci wa thsü, “Tizen lethu, wan ikhang wi gholo.”

³⁹Tsalina Pitor na shagha kidenya nu mathu gweghe wa. Ma wala cu keya wi mathu na ma ssinu ajjenshha tangwa wi ki. Denyilethu tsüdila qai gho ma vü nu Dorka na hang keben wi athsümeni sa kethengthu tsü pi ma ccüca.

⁴⁰Pitor na mathu tsüdi kesun pi akhemi wi shhu thsü nu ma akhhutsüdu kekhie sa; tsaseng wi ma khapeghe wa akamang tsü ghang nu khi, “Tabitha, shagha lo!” Nzawa na ma nyon kü shagha Pitor muya nu shagha donki wa.

⁴¹Pitor na ma kwen pi ma ghati pi shagha thsüa. Tsaseng wi ma kenondithu nu denyilethu cichi nu nzawa tsü pi mathu cüa.

⁴²Ha cüki ha Joppa yyi tsüdi wi khi wa nu anyi kejonla Apvüwa nondiya.

⁴³Pitor na ghanan kejonla Joppa wi asayhu kedegüwa Simon gweghe ben.