Read Northern Rengma Naga ROMNYI 12 Bible Online

ROMNYI 12 - Northern Rengma Naga bible

ROMNYI 12

¹Tsalina icünyuthu, Anyiza nanketizen na di ntsa kesalina hi nthu wi khieben: Nthu ketanla nthu pi kahang hhansha sa pi Anyiza cülo, ma kekuli ghena satemethachi, nu ma kenenwa satenlo. Hawa ha atsentsa kekinyi nthu na nsathu yishü.

²Nthu ayyi ha wi kahangyen ti nsala, isala nthu kemeshen ketheü kesa wina Anyiza yala nthu kahang sa pi kemilitha sa thsülo. Isathu nthu na Anyiza kemeshenwa, mangwa na mehai nu ma kenenwa nu mehai cencu khe tsü chüyaben

³Nu Anyiza nanketizen pi hi kecü ghena hi nthu tsüdi wi khiben: Nthu ketanla nthu meshen pi misi ntsa nsa lalo. Isala Anyiza na kenondi pi nthu meshu kesüsü cü ketheng qei wina sati nmeshenthu yishü.

⁴ Ithu gwo kesü wi alen kepapa kesa kejonla ben, nu alen hathu tsüdila kepapa kekuli na ben.

⁵Tsü makesü, ithu na kejon lela Khrista wi tsü ithu na agwo kesütan, nu agwo kesü wi alen kepapa keben tsüti ithu tsüdila khokho kizanghuli pvüben.

⁶ Tsalina Anyiza na nanketizen pi ithu kecü tsü kenie wina ithu aju kepapa tsü senten na. Keujüla ithu ju tsüna Anyiza ketsijüh kekhi lethu, ithu kenondi qei wina tsü kesa-u;

⁷keujüla tsüna nyu kekuli kesa lethu, ithu na nyu kekuli kesa-u; keujüla tsüna nyu kesansi lethu, ithu na nyu kesansi-u;

⁸keujüla tsüna nyu kechü-kenong kesa lethu, ithu na tsüti kesa-u. Thowa na pala pi nyu cüten khe mohho ntsa pi kecü-u; thowa na kekhang senben khe apiketsü sa kekuli-u; thowa na nyu tuwi ccatssüten khe anonghethi kesa-u.

⁹Nanketizen tsüna leben tsentsa nsathu yishü. Nkemehaiwa nanmeghü nu kemehaiwa tsü ghansenya.

¹⁰Khristanyi yen wina khokho ketizenliya, nu khokho nyuwakeküli tenlo.

¹¹N-nontssüla nu apiketsü sa kuli. Nleben tsüdi pi Apvüwa kekuli sa tenlo.

¹²Kenondi wi anonghethi sa, agükeccü wi kethankehiya, nu matsü tsüdi wi kekhie sa tenlo.

¹³Nthu keben pi Khristanyi kahhatuthu gishü sen, nu nthu jjen wi kijünyi thu ssiyalo.

¹⁴ Anyiza wi sawegü pi nthu meten-mesha ketenthu cülo khie - anle, nkishencüla nu sawegü pi cülo.

¹⁵Anonghe ketenthu gweghe anonghe, nu qai ketenthu gweghe qailo.

¹⁶ Nthu jawi ajühjja meceqe hanglo. Nkapvüla, isala anyi ma satemeni ketenthu ssinu apvüshang sa. Nthu ketanla nthu metsa benle nmeshenla.

¹⁷Keujüla nyu nthu tuwi nkemehai sa lethu, ma wi nkemehai nsa nengla. Anyi tsüdila mehaile kesawa tsü sa tenlo.

¹⁸Nthu saya kemehai chu anyi tsüdi ssinu kecca wi hanglo.

¹⁹ Ipvüshangthu, khiela ajukhi meyala, isala Anyiza lebenkekha ya tsü sa thsülo. Kepaghenanye Ntsawajüh na khiben. “Apvüwa na khiben, hi ajukhi yaden, nu akutimen pi cüden.”

²⁰ Ntsawajüh na hati khineng ben, “Keujüla nghinyi na ghama ben lethu, ma ghanja cü; nu ma dighe ben lethu, ma ya jjüya thsülo. kepaghenanye no tsüti kesa wina ma sa pi jüghewa thsüaben.”

²¹Nkemehai yala nmiwi nkhang thsüla; isala kemehai sen nu nkemehai miwi khang yalo.