Read Northern Rengma Naga ROMNYI 14 Bible Online

ROMNYI 14 - Northern Rengma Naga bible

ROMNYI 14

¹ Anonkeghe sa kenondi wi nkekhang nyi tsü ssiya, isala ma kemeshenwa tsü ssinu nkeccücanlila.

²Anyi kesü ma kenondi ghena pala tsüdi dsaden, isala ma kenondi nkezüwa na aghang-wenjja ketan dsaden.

³Anyi pala tsüdila dsa ketenwa na anyi aghang-wenjja ketan dsa ketenwa nkhichi nsala, nu aghang-wenjja ketan dsa ketenwa la pala tsüdi dsa ketenwa nmeshensala, kepaghenanye Anyiza na ma yayadha.

⁴Nthu na thowa lenu nyu kepa wi maghawa kesami bhaten nu? Tsüna ma mehaiya le ncenla lela ma Pvüwa ketanla südhe ben. Nu ma mehai yaben, kepaghenanye Apvüwa na ma sa pi mehai thsüya mehai.

⁵Anyi kesü na ghanan kesü pi ghanan kepa miwi mechanki le meshenden, nu anyi kepa na ghanan tsüdila makesü le meshenden. Anyi kesüsü ma ketanla ma kemeshen tsü ghansen khvu benyalo.

⁶Thowa ghanan kesü meshen pi mehai ntsa saten khe ma Apvüwa kinyikü wina tsüti satenlo; thowa na pala tsüdila dsaten khe ma Apvüwa kinyikü wina tsüti satenlo, kepaghenanye ma kedsakejjü ghena keseng pi Anyiza cüden. Thowa pala pahan ndsa mvuten khe ma Apvüwa kinyikü wina tsüti saden, nu ma keseng pi Anyiza cütenlo.

⁷Kepaghenanye ithu thola ma ketanla ma ghena ketan hang nten, nu thola ma ketanla ma ghena shü nten.

⁸Keujüla ithu na hang lela tsüna Apvüwa ghena hangben, nu shü lela tsüna Apvüwa ghena shüaben. Tsalina ithu na shü le hang lela Apvüwa ji sadha.

⁹Kepaghenanye Khrista na keshü nu kahang wi lela Apvüwa sale kesalina ma shü nu hangneng-shagha.

¹⁰ Tsalina nthu aghang-wenjja ketan dsa ketenthu — mangkesa ncünyuwa meshensaten nu? Nu nthu pala tsüdila dsa ketenthu — mangkesa na ncünyuwa nkhichi saten nu? Ithu tsüdila Anyiza jühkekaghakhi tuwi ngan benle.

¹¹ Kepaghenanye Ntsawajüh na khiben, “Apvüwa na khi, hi hang keben tsüti tsüdila ituwi akhhutsüben, nu tsüdila hi Anyiza le khishiben.”

¹²Tsalina ithu tsüdila Anyiza tuwi papa kekuli cüki tsü khiben.

¹³Isalethu, ithu khokho nkemeshensali la nalo. Isala no khiela pala katsüha lela kuli pi ncünyuwa ccümeshü nyelela kesami wi khulidu thsü yishü.

¹⁴Hi Apvüwa Jisu wi keben ghena hi kemeshen tsü kedsakejjü ha mangla nkemetha nmi kesa chütiben, isala keujüla anyi kesü na kedsakejjü pahan na nmetha le meshen lethu, tsüna ma ghena nmetha.

¹⁵Keujüla no pala pahan kedsakejjü ghena ncünyuwa ccümeshü lethu, no nanketizen wi nkuli ladha. No kedsakejjü pahan tsü kedsajjü ghena Khrista na ma ghena shü ketheng ncünyuwa tsü meyasa lalo.

¹⁶No metha le kesawa tsü nyu yala nkhisa thsü lalo.

¹⁷Kepaghenanye Anyiza Kadiyyi tsüna kedsa nu kejjü ghena nye, isala ketsatan, kecca, nu anonkeghe Kemetha Ghamu na khuchi keten tsü.

¹⁸Thowa na hati nu Khrista kekuli saten khe ma Anyiza kaghali pvüya nu anyi kenen la sayaden.

¹⁹Tsalina ithu na keshüthangla kecca sengho nu khokho satezüya kesa kekulithu tsü nmitsüthu yishü.

²⁰Kedsakejjü ghena Anyiza kekuliwa tsü meyasala. Kedsakejjü tsüdila dsajjüya mehai, isala katsüha lela kedsajjü ghena nyu sa pi kesami wi khulidu thsü lethu, tsüna kesazzi.

²¹Kemeshon ntsawa na asa ndsala, kisengtssü njjüla, nu ncünyu sa pi khuli thsüa kesa kekuli tsü nsala.

²²No ha jjügi ghena kenondiwa tsü pi Anyiza nshinyi jüwi thengya. Anyi thowa na ma kekuli wi meshon le meshen nu ma ketanla ma nmeshensala saya khe kemihhi ntsawa!

²³Isala keujüla ma kesütu nu dsa lethu, Anyiza na ma meshensa den, kepaghenanye ma kekuliwa tsüna kenondi miwi na nye. Nu katsüha lela kenondi miwi nkenye tsü tsüna kesami.