Read Northern Rengma Naga ROMNYI 15 Bible Online

ROMNYI 15 - Northern Rengma Naga bible

ROMNYI 15

¹Ithu kenondi wi kezüthu na nkezüthu khhi pvüqa kecü-u. Ithu ketanla ithu kenen nsala.

²Tsüti kesawa nye ithu tsüdila ithu cünyuthu kenondi satezü cüle kesalina mathu kenen sa nu mathu ghena kemehaiwa kesa-u.

³ Kepaghenanye Khrista na ma ketanla ma kenenwa nsa, isala Ntsawajüh na khiben, “Nyu no kekimenni jüh tsüna imiwi ghodha.”

⁴Ntsawajüh wi zhüketheng tsüdila ithu kesansi ghena zhütheng, tsüna Ntsawajüh na pi kecü lebenkesie nu kechü-kenong tsü wina ithu kenondi benya thsüle kesalina.

⁵Anyiza, lebenkesie nu kechü-kenong bvüwa na Jisu Khrista tsütsonca tsü kenie wina nthu kiqa pi nthu jawi tsü makesü ben keyawa salo,

⁶isanu nthu tsüdila ahhai kesütan sala ithu Pvüwa Jisu Khrista Bawa nu Anyiza sengya thsüle kesalina.

⁷Khrista na nthu ssiya kesa tsüti Anyiza nyankethang ghena nthu la khokho ssiyalo.

⁸Kepaghenanye hi nthu kizaben, Khrista kahang wi Judah nyithu mithon wina kekuli tsüna Anyiza na jühtsentsa sala kheni mathu bamyithu wi khishi kethengthu tsü sacendha kesa pi ccüca,

⁹ nu Judah nyi nkenyethu lela kiqa pi Anyiza nanketizen tsü seng thsüle kesalina. Ntsawajüh na kekhi ti, “Tsalina hi Judah nyi nkenyethu jawi no seng den; hi n-nyan keseng khwi saden.”

¹⁰ Tsüna kheneng hati khiben, “Judah nyi nkenyethu, Anyiza nyithu gweghe anonghe yalo!”

¹¹ Kheneng khi, “Judah nyi nkenyethu, tsüdila Anyiza senglo; anyithu tsüdila, ma senglo!”

¹² Kheneng Isa na khiben, “Jesse shicübvügha kesü na shhughoben; ma ghola Judah nyi nkenyethu miwi kekhang senben, nu mathu na mathu kenondi pi ma miwi chiben.”

¹³Anyiza, kenondi bvüwa na nthu ma kenondi ghena anonkeghe nu kecca pi nthu tsüdi pong kecüwa salo, isanu Kemetha Ghamu kekhang wina nthu kenondi yala shigü kayi waya thsüle kesalina.

¹⁴Icünyuthu, hi nthu na kemehai pi pong pvü, nthu na palakechü ben, nu nthu khokho kesansiliya mehaile kesa chütiben.

¹⁵Isala hi ha zhükechi wi ajjügi pahan wi kapvüshüsha sa nu pi nthu kiza neng chi theng. Hi kapvüshüsha kesawa ha Anyiza na pi hi kecü,

¹⁶tsüna hi ya Jisu Khrista magha kesü sala Judah nyi nkenyethu ghena kuli thsüben. Hi keqhaikedi kesü ti kuli nu Anyiza wi Jühtheü Kemehaiwa pi sansi, isanu Judah nyi nkenyethu ya kekinyi kesü ti sa nu Kemetha Ghamu wina satemetha pi Anyiza wi chi nu yaya kemehai saya thsüle kesalina.

¹⁷Isathu, hi Jisu Khrista wina hi Anyiza kekuli ghena kapvüya mehai.

¹⁸Khrista na hi wina kuli kechi Judah nyi nkenyethu ssi wa Anyiza jüh kinaya thsü kesa cüki tsü ketan pi hi kapvüshüsha nu khiya mehai. Ma ajüh nu kekulithu wina,

¹⁹azensu nu amankesathu kekhang wina nu Anyiza Ghamu kekhang wina ha sachidha. Tsalina hi Jerusalem wina Ilurikum wi wa keten chuli Khrista cüki Jühtheü Kemehaiwa tsü pi nyu sansi.

²⁰Hi kaghangwa na nyu magi kedegü ketheng miwi tsü nsale kesalina hi keshüthangla Khrista cüki npi zakeya pen wi tsü Jühtheü Kemehaiwa pi thangchile saden.

²¹ Ntsawajüh na kekhi ti, “Ma cüki pi npi kekizathu na muyaben, nu npi zakeyathu na chüshi yaben.”

²² Ha jjügi ghena hi matsü kejon tughula nthu wi ghole kesa kijü ghodha.

²³Hi ayyi he wi hi kekuli sacendha nu hi amapi kejon wila gho nthu ghangchi mvuthi sagho ben,

²⁴hi tsüti saya benle nondiben. Hi Spain wi kewalen sala nthu hhainan chiden, nu matsü keu nthu gweghe keben seng wi ciwi wale kesalina nthu ya hi kiqachi thsü mvuben.

²⁵ Isala hi khili Jerusalem wi Anyiza nyithu kekuli ghena ciwi waden.

²⁶Kepaghenanye Macedonia nu Akhaya wi kemehuthu na anonghethi nu keben khuchi pi Jerusalem wi Anyiza nyi kahhatuthu kiqaben.

²⁷ Mathu ketanla hati sale kesa südheya, isala ntsakhiwa mathu na kehhatuthu kekiqa-ule. Kepaghenanye Judah nyithu na aghamulen wi kemihhi pi Judah nyi nkenyethu gweghe gishü keya ghena Judah nyi nkenyethu la ayyi wi kemihhi mukeya tsü pi Judah nyithu gweghe gishü keya-ule.

²⁸Tsalina hi kekuli ha sacen nu mathu ghena apisa saghukechi ha pi mathu kecü seng wi hi Spain wi kewalen sala nthu hhainan chiben.

²⁹Hi nthu wi gho lethu, Khrista wi kemihhi pongkemeni sa sen nu nthu wi ghoten kesa hi chüben.

³⁰Icünyuthu, hi ithu Pvüwa Jisu Khrista nu Aghamu na khuchi keten nanketizen wina nthu wi khieben; hi gweghe nu Anyiza wi ighena kekhie sa ntsa sa cülo.

³¹Judea wi nkenondithu kwen wi hi hangshaya nu Jerusalem wi Anyiza nyithu yala hi kekuli ha yaya thsüle kesalina kekhie salo.

³²Tsalina hi inonghe ntsa nu nthu wi ghoden, Anyiza kemeshen lethu, hi nthu hhainan kechi wi hanha neng yaben.

³³Anyiza, ithu ghena kecca bvüwa yala nthu tsüdi ssiben keyawa salo. Amen.