Read Northern Rengma Naga ROMNYI 16 Bible Online

ROMNYI 16 - Northern Rengma Naga bible

ROMNYI 16

¹Hi ithu tssüggüwa Foebe Kenkrea wi kemehu kekuli sa ketenwa ha anyi kemehai le kesa pi nthu wi kizaben.

²Anyiza nyithu na kesa-u tsüti Apvüwa nyan wina ma ssiya nu ma nthu wi nsenthu keyishü tsüdi pi ma cülo, kepaghenanye ma anyi kejon pvüshang kemehai kesü nu ighena la mehai.

³ Hi shalom pi hi gweghe Jisu Khrista kekuli kesa nyi Priskilla nu Aquila manyi cüben.

⁴Manyi ighena keshü la nmessila kuli. Hi ketan nyela Judah nyi nkenye kemehuthu tsüdila keseng pi manyi cüben.

⁵Shalom pi manyi jjen wi kemetuli keten kemehu la cüben. Shalom pi Asia yyi wi anyi Khrista nondi tegü keyawa ipvüshangwa Epaeneta cüben.

⁶Shalom pi nthu ghena apiketsü sa kekuliwa Maria cüben.

⁷Shalom pi hi Judah nyi hi gweghe atssüzü kesa keni Andronika nu Junia cüben; apostelthu jawi mehaitsü manyi cüki chüben, manyi na itu wi Khristanyi saya.

⁸Hi shalom pi Apvüwa wi ipvüshangwa Ampliata cüben;

⁹Shalom pi ithu gweghe Khrista kekuli kesawa Urbana, nu ipvüshangwa Stakhi manyi cüben;

¹⁰Shalom pi Khrista tizen ntsa keghowa Apelle cüben; Shalom pi Aristobula theghi tsüdila cüben.

¹¹Shalom pi hi Judah nyi kesü Heridion, nu Narkissa theghi wi Khristanyi cünyuwa cüben.

¹²Hi shalom pi Apvüwa kekuli sa keten keni Trifaena nu Trifosa manyi nu Apvüwa kekuli sa ntsa kechiwa ipvüshangwa Persi cüben.

¹³ Hi shalom pi Apvüwa kekuli kesa wi kemechan ntsawa Rufu nu ma jja keshüthangla hi pi ma tsa ti sa ketenwa manyi cüben.

¹⁴Hi shalom pi Asunkrita, Flegon, Herme, Patroba, Herma, nu mathu gweghe keben Khristanyi cünyuthu tsüdila cüben.

¹⁵Shalom pi Filologa nu Julia, Nerea nu ma tssüggüwa, nu Olimpa nu mathu gweghe keben Anyiza nyithu tsüdila cüben.

¹⁶Kemetha kekimangli wina shalom pi khokho cütenlo. Khrista kemehuthu tsüdila shalom pi nthu cüben.

¹⁷Icünyuthu, hi nthu kizaben: anyi nyu pvükhhi-pvüsa nu nyu kenondi yasa, nu nthu na yayakesa kesansijüh tsü shun ketenthu ghena kiden-kesha yalo. Mathu ngweghe lalo.

¹⁸Kepaghenanye anyi tsüti sa ketenthu tsüna ithu Pvüwa Khrista kekuli nyela mathu kesa mvu tsü saden. Mathu ajüh tsikemehai nu ajühkhi kemehai wina anyi mangla nkechüthu mechuden.

¹⁹Anyi tsüdila nthu na Jühtheü Kemehai kaghali cüki zayadha, nu hi ha ghena inonghe ben. Isala hi nthu yala kemehaiwa wi metsashhu nu nkemehaiwa wi mangla nkechü ti saben thsü mvuben.

²⁰Nu Anyiza, ithu kecca bvüwa na wan nthu ccü wi Satan cücha cüben. Ithu Pvüwa Jisu nanketizen yala nthu ssiben keyawa salo.

²¹ Hi gweghe kekuli sa ketenwa Timothi; nu ithu Judah nyithu Lusia, Jason, nu Sosipater hathu na shalom pi nthu cüben.

²²Hi, Tertia, ha zhükechiwa na Khristanyi shalom pi nthu cüben.

²³ Ijjen pvüwa Gaya, ma jjen wi kemehu kemetuli ketenwa na shalom pi nthu cüben; Anyunuti wi keben kesenwa Erasta, nu ithu cünyuwa Quarta manyi na nthu shalom saben.

²⁴Ithu Pvüwa Jisu Khrista nanketizen yala nthu tsüdila ssiben keyawa salo. Amen.

²⁵Ithu anyankethang pi Anyiza cü nalo! Hi Jisu Khrista cüki Jühtheü Kemehaiwa pi nthu kesansi, nu kheni tsüwi pi kesiela kuthi kegho pi ccücakechi atsentsawa tsü kenie wina Anyiza na nthu sa pi nthu kenondi wi zükeqhe ngan thsüya mehai.

²⁶Isala khilitsü, atusenjüh- kechüthu na zhükethengthu nu anuphan Nyiza na khi kechi wina atsentsawa tsü sen shhugho mizzatentithu tsüdi chüya thsüdha, isanu tsüdila nondi nu nieya thsüle kesalina.

²⁷Tsüdi miwi la kemetsawa Anyiza ketan, Jisu Khrista wina anuphan nyanthangkeyawa salo! Amen.