Read Northern Rengma Naga ROMNYI 4 Bible Online

ROMNYI 4 - Northern Rengma Naga bible

ROMNYI 4

¹Isathu, ithu na ithu baqhaiwa Abraham ghena khatile khi nu? Ma mangwa khati muya nu?

²Keujüla ma pala pahan kekuli wina Anyiza tuwi meshonya lethu, ma tsü ghena kapvü kesa — isala ma Anyiza tuwi kapvü meya.

³ Ntsawajüh na khiben, “Abraham na Anyiza nondi, nu ma kenondi ghena Anyiza na ma pi ketsatan nyi kesü saya.”

⁴Anyi kesü na kulithu ma kutimen pi cüden, tsüthu tsüna aju ti kesa nye, isala ma mellikeya.

⁵Isala anyi kesü na ma kekuli wi nyela Anyiza nondi nu ma kenondi ghena nkemehai pi mehaiya thsü lethu, tsüna ma kenondi ghena Anyiza na ma pi ma tuwi meshonya thsüdha.

⁶Ha David na anyi kesü kekuli wi nyela Anyiza na ma pi ketsatan nyi sa keyawa nonkeghe cüki khi kechi:

⁷ “Anyi nyu ma kesazzi nu kesami teshi pi cü kesawa na khatila anonghe nu!

⁸Anyi, Apvüwa na ma kesami nsila kesawa na khatila anonghe nu!”

⁹Anonkeghe cüki ha David na ahyu kahanthu ghena ketan khi kwe? Nye le, hawa ha ahyu nkahanthu ghena la le! Kepaghenanye ithu na Ntsawajüh wi na khiben, “Abraham na Anyiza nondi, nu ma kenondi ghena Anyiza na ma pi ketsatan nyi saya.”

¹⁰Hati kesa hana khathansha wi sa nu? Abraham na ma hyukahan seng wi la npi kahan wi nu? Ma ahyu npi kahan tuwi khe kahan seng wi nye.

¹¹ Ma tsü seng wi na ahyuhan, nu ma ahyu npi kahan tuwi na Anyiza na ma kenondi ghena ma pi ketsatan nyi kesü saya kesa zensu kesü wina ma hyuhan. Tsalina Abraham na ahyu nkahanthu lela Anyiza nondi nu pi ketsatan nyi saya kesathu tsüdi ghena aghamulen wi abawa sadha.

¹²Ma ahyu nkahanthu ba la sadha, tsüna mathu ahyukahan ghena nye, isala Abraham na ma hyu npi kahan wi kenondi wina hang kegho ti mathu la tsüti hang thsüle kesalina.

¹³ Anyiza na Abraham nu ma shicübvüghathu wi ayyi tsüdi pi ma ji sa thsüaden khishichi, ma tsüti sa, tsüna ma Ayenwa kenie ghena nye, isala ma kenondi ghena Anyiza na ma pi ketsatan nyi saya.

¹⁴ Keujüla Anyiza jühkhukechi hana Ayenwa kenie ghena lethu, anyi kenondi ha mangla nye nu Anyiza jühkhukechi tsü ma men nmidha.

¹⁵Ayenwa tsüna Anyiza leben kekha sengho den, isala ayenwa tsü nkemi wi ayenwa tsü kepakhhi nmi.

¹⁶ Ajühkhukechi tsüna kenondi ghena, isathu ajühkhukechi tsüna Anyiza na kekila wina aju pi Abraham shicübvüghathu tsüdi cüle kesa khiti chidha, tsüna ayenwa nie ketenthu ketan nyela Abraham kenondi tsüti sa nu ketenthu tsüdi ghena la. Kepaghenanye Abraham na aghamulen wi ithu tsüdi bawa;

¹⁷ Ntsawajüh na khiben, “Hi ma pi mizzatenti kejon bawa sa thsüdha.” Tsalina ajühkhukechi tsüna Abraham na nondi ketenwa Anyiza, keshü sa pi hang kecüwa nu ma jühkhukechi wina kheni hang nketen lela nansü sa pi hang cü kesawa tuwi mehai.

¹⁸ Abraham na nhiela kemehai seng wi lela nondi nu hie, tsalina ma “mizzatenti kejon bawa” saya. Ntsawajüh na kekhi ti, “Nshicübvüghathu na ghotsithu ti sha yaben.”

¹⁹ Ma kahang na amapi meza cen wa kesalina ma gwo na keshüwa la mehaidha, nu ma wubvü Sarah la atsa nmi, isala ma kenondi nzan neng.

²⁰Ma Anyiza jühkhukechi tsü n-nondila nsa, isala ma kenondi na kekhang pi ma pong cü nu ma keseng pi Anyiza cü.

²¹Kepaghenanye ma Anyiza na khishi kethengwa tsü sa cenben kesa chüti sa.

²²Tsalina Abraham kenondi ghena “Anyiza na ma pi ketsatan nyi saya.”

²³“Ma pi ketsatan nyi saya,” kesa zhüketheng jühthu tsüna ma ghena ketan nye.

²⁴Isala tsüthu tsüna Anyiza na keshü wi ithu Pvüwa Jisu sa pi hang kecüwa kenondithu pi ketsatan nyi saya ketenthu tsüdi ghena la zhütheng.

²⁵ Jisu pi ithu kesami ghena shü thsüa, nu ithu pi Anyiza tuwi meshonya thsüle kesalina ma sa pi hangya thsüa.