Read Northern Rengma Naga ROMNYI 6 Bible Online

ROMNYI 6 - Northern Rengma Naga bible

ROMNYI 6

¹Isathu, ithu khatile khi nu? Anyiza nanketizen ya ji kayiya thsüle kesalina ithu kesami wi hang ben kwe?

²Nyele, tsüti saya nben! Ithu na kesami wiwa keshü sa dhathu khati nu ciwi hang nu kesami saya mehai nu?

³Kepaghenanye nthu na ha chübenla metsi, ithu na Jisu Khrista gweghe baptaiz kesa wi ma keshü wi la gweghe baptaiz sadha.

⁴ Abawa nyankethang kekhang na keshü wina Khrista sa pi hang kecü tsüti ithu la kahang ketheü wi hangyale kesalina baptaiz kesa wi ma gweghe shü nu ma gweghe pi vhüdha.

⁵Kepaghenanye ithu na ma keshü wi ma gweghe kesü saya lethu, tsü makesü ma sa pi hang kecü wi la ma gweghe ya metsiben.

⁶Ithu na ha chüben, kesami gwowa tsü yasa pi nu ithu kesami magha nsa nengle kesalina ithu gwo kaghawenwa tsü pi Khrista gweghe kross miwi jendha.

⁷Kepaghenanye anyi kesü ma shü meyi kesami kekhang wina ma lisha chi cüdha.

⁸Ithu na Khrista gweghe shü kesalina ithu na ma gweghe la hang yaben kesa nondiben.

⁹Kepaghenanye ithu na chüben, keshü wina Khrista sa pi hangya thsüdha nu ma khiela shü neng meyacha — keshü na ma miwi kekhang nmidha.

¹⁰Tsalina ma shü kesalina keshü na ma miwi kekhang nmidha; nu ma khili kahang wi Anyiza gweghe hang wadha.

¹¹Tsü makesü kesami ghena tsü, nthu na kesami wiwa keshü ti sadhale meshenya, isala kahang wiwa lethu Jisu Khrista wina Anyiza gweghe hang wadha.

¹²Nthu sajjü wi kenmvuwa tsü nsala le kesalina kesami ya nthu keshü gwo tsü miwi kekhang sen thsü yishü.

¹³Nyelela nthu gwo pi kesami cü nu pi gheshighena ghena kuli thsü yishü, isala pi ketsatan ghena kuli thsüle kesalina keshü wina sa pi hangya thsü kesathu tsüti nthu gwo mabenla pi Anyiza cülo.

¹⁴Kesami pi nthu pvüwa sayishü; kepaghenanye nthu na ayenwa kekhu wi nyela Anyiza nanketizen kekhu wi hang wadha.

¹⁵Isathu, khati sa nu? Ithu na kesami kekhu wi nyela Anyiza nanketizen kekhu wi hangwa kesalina ithu na kesami saben kwe? Khiela tsüti saya nben!

¹⁶Nthu na ha chübenla metsi: keujüla nthu na nssümagha kesü ti nyu jühkina lethu, nthu na ma jühkina ketenwa tsü nssümagha sadha —keshü sengho ketenwa kesami, nyelethu Anyiza tuwi meshonya ketenwa ajühkeya.

¹⁷Isala Anyiza sengle! Kepaghenanye matsü kesü wi nthu na kesami nssümagha sagho, isala khilitsü nthu leben tsüdi pi nthu kesansijüh mukeya wi atsentsawa tsü kinaden.

¹⁸Kesami wina nthu lisha chi cüdha, nu nthu na khili ketsatanwa nssümagha sayadha.

¹⁹(Nthu nkekhang chükeben ghena hi ajüh lekete kesa khiben.) Matsü kesü wi nthu ketanla nthu pi gheshighena kekuli ghena nkemetha nu nkemehai nssümagha sagho. Tsü makesü khili nthu ketanla nthu pi kemetha kekuli ghena ketsatan nssümagha nsathu yishü.

²⁰Nthu na kesami nssümagha sa keben wi ketsatan wi nthu kekhenkeghe nmi.

²¹Nthu khili jüghe kebenwa ha kekuli wi nthu ghena kekiyi mangwa muya nu? Tsüthu kekuli tsüna keshü sengho le!

²²Isala khili kesami wina nthu lisha chi cüdha, nu nthu na Anyiza nssümaghathu sayadha. Nthu ghena kekiyiwa tsüna nthu kahang maben satemetha pi ma wi chi nu anuphan kahang mukeyawa tsü.

²³Kepaghenanye kesami kutimen tsüna keshü, isala Anyiza na Apvüwa Jisu Khrista wina kekila khukechi ajuwa tsüna anuphan kahang.