Read Northern Rengma Naga ROMNYI 7 Bible Online

ROMNYI 7 - Northern Rengma Naga bible

ROMNYI 7

¹Icünyuthu, nthu na hi mangwa khile saben khe tsü chüshi yaben, kepaghenanye nthu tsüdila ayenwa cüki tsü chüben. Anyithu na hang keben chu ayenwa tsüna mathu miwi ben.

²Tsütsonca kesü, kinyibvü kesü na ma wuba hang keben chu ayenwa na ma bhenben; isala keujüla ma wuba na shü lethu, ayenwa ma bhen kebenwa wina ma lisha chi cüdha.

³Tsalina keujüla ma wuba hang keben wi ma npvüza kepa wi ssi nu hang wa lethu, ma pi keqheza nyi kesü le ciaben; isala keujüla ma wuba na shü lethu, ayenwa wina ma lishadha nu ma npvüza kepa wi ssi nu hang wa lela ma keqheza nyi nye.

⁴Icünyuthu, nthu la tsü makesü le! Ayenwa ghena tsü, nthu na ayenwa wiwa keshü sadha, kepaghenanye nthu na Khrista gwo wi pahan sadha; ithu ya Anyiza kekuli wi nsenthu keyishü saya thsüle kesalina nthu khilitsü keshü wi sa pi hang kecüwa ji sadha.

⁵Kepaghenanye ithu na ithu sajjü kenmvu wi hang, ayenwa na kechü-kenong kechi kesami kesa mvuwa tsüna ithu gwo wi kuli thsü, nu ithu na keshü kekuli wi tsü nsenthu keyishü sagho thsü.

⁶Isala ithu na khilitsü kheni ithu pi atssüzü sa thsü keten wiwa shüdha ghena Ayenwa wina lisha chicüdha. Tsalina ithu na kheni zhüketheng yen kaghawenwa kekuli nsala Aghamu wi ketheüwa tsü sa wadha.

⁷ Isathu, ithu khatile khi nu? Ayenwa tsüna kesami kwe? Tsüti nyele! Isala Ayenwa tsüna hi sa pi kesami tsüna mangwa khe chüya thsü. Keujüla Ayenwa tsüna “No nyu ji ntepaghala” nkhi lethu, hi nyu ji ketepagha tsüna mangwa khe chü nkesa.

⁸Ayenkhukechi tsüwa wina kesami na matsü kemehai muya nu hi wi nyu ji ketepagha tsüdi kuli thsüle kesa kechü chiden. Kepaghenanye ayenwa wi nkenye tsü kesami na kekhang nmi.

⁹Hi la matsü kesü wi ayenwa nchüla hang gho, isala ayenkhukechi tsü kegho seng wi kesami la hang shagha,

¹⁰nu hi shü. Ayenkhukechi ya kahang sengho thsüle kesawa tsüna ighena keshü senghoa.

¹¹ Ayenkhukechi tsüwa wina kesami na matsü kemehai muya nu hi mechu nu hi pathia.

¹²Tsalina Ayenwa tsüna metha, nu ayenkhukechi tsü la metha, meshon, nu mehai.

¹³Isala tsü ma jjügi kemehaiwa tsüna hi sa pi keshü sa kwe? Tsüti nsale! Kesami na tsü sa; kesami na ntsakhiwa kesami yencüki tsü pi ccücale kesa ghena kemehaiwa sen nu keshü sengho hi cüa. Tsalina ayenkhukechiwa tsü ghena kesami tsüna tsü miwi la sami kayi kesa pi ccücadha.

¹⁴Ayenwa tsüna aghamulen wi ghena kesa ithu na chüben; isala hi keshü nyi kesü ha pi kesami nssümagha sala jeü chidha.

¹⁵ Hi ketanla hi sa keten ha chüshi meya; kepaghenanye hi sa mvu kebenwa tsü nyela hi sa mvu nkebenwa tsü sa yaden.

¹⁶Hi sa mvu kebenwa nyela sa mvu nkebenwa tsü sakeya wi hi Ayenwa tsüna meshon le kesa chüyaden.

¹⁷Tsalina ha sa ketenwa hana ntsakhiwa hi nye, isala hi wi hang kebenwa kesami na tsü saben.

¹⁸Kemehai saya kemehai tsüna hi — tsüna isajjü wi ha nmile kesa hi chüben. Kepaghenanye kemehaiwa sa mvu keten tsüna hi wi ben lela hi tsü saya nten.

¹⁹Hi sa mvu keben kemehaiwa tsü saya nten; isala hi sa mvu nkeben nkemehai wa tsü sa yaden.

²⁰Keujüla hi sa mvu nkebenwa tsü saya lethu, tsüna hi nye; isala hi wi kebenwa kesami tsüna tsü kuliben.

²¹Tsalina ayenwa ha kekuli saben kesa hi muyaben; hi kemehaiwa tsü sa mvu lela nkemehaiwa tsüna hi teshi nten.

²²Ileben non wi tsü Anyiza yenwa wi inonghethi benden.

²³Isala igwo wi ayen kepa kesü kuliben — ayen tsüna ileben wi ayenwa tsü ssi nu aghi saben kesa hi muben. Ha hi sa pi igwo non wi kuli keben kesami yenwa tssüzü sa thsüden.

²⁴Hi ha anyi anonkeghe nkemi ntsa sadha man! Thowa na keshü gwo hawa wina hi khushi yaten nu?

²⁵Apvüwa Jisu Khrista wina ha kuli kechiwa Anyiza sengle! Tsalina isalethu, hi hati saden: hi isajjü wi kesami yenwa tsü nssümagha saben lela hi hi kemeshen pi Anyiza yenwa tsü kekuli saden.