Read Northern Rengma Naga 1 KORINTHNYI 1 Bible Online

1 KORINTHNYI 1 - Northern Rengma Naga bible

1 KORINTHNYI 1

¹Jisu Khrista ghena apostel kesü salo Anyiza na ci keyawa Paul nu ithu cünyuwa Sosthenge wina kesun pi

²Kor rinth wi Anyiza kemehu wi, ci pi Anyiza kemetha nyi saya kesathu tsüdi, Jisu Khrista wina ma ji saya kesathu, kahe wi anyi tsüdila gweghe nu mathu nu ithu Pvüwa, Apvüwa Jisu Khrista kinyi ketenthu wi kechi:

³Ithu Ba Anyiza nu Apvüwa Jisu Khrista ya nanketizen nu kecca pi nthu kecüwa salo.

⁴Anyiza na Jisu Khrista wina nanketizen pi nthu kecü ghena hi keshüthangla keseng pi ma cü benden.

⁵Kepaghenanye nthu na Khrista gweghe keya wina pala tsüdi wi keban sayadha, tsüna nthu jühkekhi nu palakechü tsüdila saghuben.

⁶Khrista cüki ketsijüh tsüna nthu wi zükeqhe benya kesalina

⁷nthu na ithu Pvüwa Jisu Khrista kegho hie keben wi nthu kemihhi kesüla mu meyala nsa.

⁸Ma nthu noncca sen wa asakhen tsathang cu cüben tsüna ithu Pvüwa Jisu Khrista tsathang wi nthu kesami nben thsüle kesalina.

⁹Kenondi qowa Anyiza na nthu ci pi ma Tsawa Jisu Khrista ithu Pvüwa wi chiyadha.

¹⁰Icünyuthu, hi ithu Pvüwa Jisu Khrista nyan wina nthu wi khieben: nthu tsüdila ajühjja keyali nu nthu jawi gishü kepapa nsa lalo; isala nthu saghula kemeshen kesütan nu aleben kesütan sabenlo.

¹¹Kepaghenanye icünyuthu, nthu jawi sashü na kitagha benle kesa Khloe theghi wi anyi pahan na hi kiza.

¹² Hi khi kebenwa na nthu jawi khokho kepapa khiben: Kesü na “Hi Paul nieden” khi; kepawa na “Hi Apollo nieden” khi; kepawa na “Hi Pitor nieden” khi; nu kepa na “Hi Khrista nieden” khiben.

¹³Khrista tsü gishü pi akhang kepapa saben man! Paul na nthu ghena kross miwi shü kwe? Nthu na Paul nyan wina baptaiz saya kwe?

¹⁴ Hi Krispa nu Gaiya manyi ketan khe nthu thola pi baptaiz nkesa ghena Anyiza seng ben.

¹⁵Tsalina nthu thola inyan wina baptaiz sayale khiya nben.

¹⁶ (Anle, hi Stefana theghi la pi baptaiz sacüle, isala nthu thola pi baptaiz sala nye khe nchüladha.)

¹⁷Kepaghenanye Khrista na hi nyu baptaiz salo kesa ghena kesun nchi. Khrista na kross miwi keshü kekhang tsü meyasa thsüle kesalina hi anyi kemetsa jüh tsü nsenla Jühtheü Kemehaiwa tsü pi nyu kizalo kesa ghena hi kesunchi.

¹⁸Kepaghenanye Khrista na kross miwi keshü cüki ketsijüh hana dedi kebenthu tuwi kejüphon jüh, isala ithu hangshaya kebenthu tuwi tsü hana Anyiza kekhang.

¹⁹ Ntsawajüh na khiben, “Hi kemetsathu kemetsa tsü yasa cüden, nu palakechüthu chüshikeya tsü pi ma men nkemi sa cüden.”

²⁰ Isathu, kemetsawa tsü khie nu? Palakechüwa tsü khie nu? Ayyi he wi ajühkhi kemehaiwa khie nu? Anyiza na ayyi he wi kemetsa tsüna kejüphon le kesa pi ccücadha!

²¹Kepaghenanye Anyiza na ma kemetsa wina ayyi nyithu na mathu kemetsa sen nu ma chüya nben sadha. Tsüti kesawa nyela, ikhang na pi sansi keten ketsijüh pi “kejüphon jüh” le khi ketenwa ha kenondithu na hangsha yaben kesa Anyiza na südhedha.

²²Judah nyithu na chüyale kesa ghena azensuthu tsü bha, nu Grik nyithu na kemetsa tsü ghang.

²³Isala ikhang na Khrista kross miwi keshü cüki ketsijüh Judah nyithu ccükemeshüwa nu Grik nyithu ghena kejüphon jüh tsü pi thangchiden;

²⁴isala Judah nyithu nu Judah nyi nkenyethu la Anyiza na ciya kesathu ghena tsü ketsijüh hana Khrista, Anyiza kekhang nu Anyiza kemetsa tsü le!

²⁵Kepaghenanye Anyiza wi kejüphon tsüna ayyi nyi kemetsa miwi metsaki, nu Anyiza wi nkekhang tsüna ayyi nyi kezü miwi züki.

²⁶Icünyuthu, Anyiza na khati kesa wi nthu ciya khe meshen chilo. Ayyi nyi kahang kenie wi tsü nthu keu ketan na kemetsa nyi, kekhang nyi, nu atheghi kemehai nyi.

²⁷Anyiza na ayyi wi kemetsathu kejügheya thsüle kesalina kejüphonthu kessiya, nu ayyi wi kekhangthu kejügheya thsüle kesalina nkekhangthu kessiya.

²⁸Ma ayyi nyi na pi kemechan ntsa meshen keten tsü yasa cüle kesalina ayyi nyi na nkhichi nu n-nyuwa nu pi ma men nkemi sa ketenthu kessiya.

²⁹Ha ma jjügi anyi kesütanla Anyiza tuwi kapvüya nben.

³⁰Isala Anyiza na nthu sa pi Jisu Khrista wi benya thsü, nu Anyiza na Khrista sa pi ithu ghena kemetsawa, ketsatanwa, satekemethawa, nu khushikeyawa sa thsüdha.

³¹ Tsalina Ntsawajüh na kekhi ti, “Anyi thowa na kapvüten khe Apvüwa ghena kapvü thsülo.”