Read Northern Rengma Naga 1 KORINTHNYI 10 Bible Online

1 KORINTHNYI 10 - Northern Rengma Naga bible

1 KORINTHNYI 10

¹ Icünyuthu, hi nthu yala ithu bamyithu na Mosa nie kewa wi khati sa khe tsü chüya thsü mvu ben. Mathu tsüdila akulukeshü kekhwen wina mehaitsü Kenmie Tssükedone tsü pvüdhi waya.

²Mathu tsüdila akulukeshü nu atssükedone wina Mosa senkeniethu sala baptaiz saya.

³ Mathu tsüdila aghamulen wi amesa makesü dsa,

⁴ nu aghamulen wi makesü jjü. Mathu na aghamulen wi alon mathu gweghe kewawa wi tsü jjü; nu alon tsüwa tsüna Khrista.

⁵ Isala Anyiza na mathu kejon n-nenla kesalina mathu keshü kamang kejon pi ayyikeshü wi khala.

⁶ Khili hathu ha tsüdila ithu ghena tsütsonca saben, mathu ti nkemehaithu tsü nmemvu thsü,

⁷nyelela mathu pahan ti atsikezhüthu nkinyi thsüle kesalina. Ntsawajüh na kekhi ti, “Anyithu na donki nu dsa nu jjü, nu shagha nashü.”

⁸ Ithu na mathu pahan kahang nkemetha sa nu ghanan kesütan na anyi hazar nkwe nu kecheng shü kesa tsüti sazzi yishü.

⁹ Ithu na mathu pahan Apvüwa ghan-nan le sa nu amaghang na mathu mcüthi kesa tsüti sa yishü.

¹⁰ Ithu na mathu pahan leben nkaghajüh khi nu Keshü Nyilowa na mathu yasa kesa tsüti sa yishü.

¹¹Nyu kepa wi chüya thsüle kesalina mathu miwi pala hathu ha tsüdi sa, nu ithu ghena kekitsan tsütsonca ha zhüchi theng. Kepaghenanye ithu na matsü sakhenwa pang wi hangben.

¹²Anyi thowa na ma zükeqhe ngan yadha le meshen ten khe ma nkhulile kesalina kiden-kesha meyathu yishü.

¹³Ghankenan nthu tuwi gho keten ha tsüdi anyithu tuwi gho keten ji. Isala Anyiza na ma jüh khishikechi tsü nieden, nu ma mangla nthu na pvüya nkesa ghankenan tsü pi nthu miwi gho thsü nben; isala nthu na ghankenan wi keben wi ma nthu ya kekhenengya thsüle kesa kekhang pi nthu cü, nu shhuya kemehai len pi nthu cüben.

¹⁴Tsalina ketizen ipvüshangthu, atsikezhüthu kekinyi tsü ghüyalo.

¹⁵Hi nthu pi kemetsa nyi sa nu nthu kizaben; nthu ketanla hi mangwa khiben khe tsü meshen nanlo.

¹⁶ Ithu na Apvüwa kemeshentsse kesen wi ahyi pie nu tsü ghena keseng pi Anyiza cü ketenwa tsü kejjü wi ithu na Khrista jjü tsü jjüben. Nu ithu na amesa pakhhi nu tsü kedsa wi ithu na Khrista sa tsü dsaben.

¹⁷Kepaghenanye ithu tsüdi ghena ciwi amesa kesütan, ithu na kejon lela agwo kesütan, ithu tsüdi amesa kesütan pi gishü dsa keten ghena.

¹⁸ Israel nyithu cüki tsü meshen chilo; mathu na ahhansha sa pi Anyiza kekuli kesa kekinyipen wi kechi tsü kedsathu.

¹⁹Hi ma jjügi mangwa khiben nu? Atsikezhü kesü nyelela atsse pi tsü kekinyi tsü ma men ben kwe?

²⁰ Nyele! Hi khi kebenwa na pala pi Anyiza nkechü kekinyipenthu wi ahhansha kesa tsüna pi Anyiza ncüla atsaghangthu cüben. Hi nthu yala atsaghangthu gweghe thsü mvu nben.

²¹Nthu na Apvüwa hyi wi tsü jjü nu atsaghangthu hyi wi la jjü isaya nben; nthu na Apvüwa khu wi tsü dsa nu atsaghangthu khu wi la dsa isaya nben.

²² Nyelela ithu na Apvüwa ya anonmeyen thsü mvuben kwe? Ithu na ma miwi khangki le meshen ben kwe?

²³ Tsalina mathu khiben, “Ithu na pala tsüdila kuliya mehai.” Anle, tsüna ntsakhiwa, isala pala tsüdila kemehai ghena nye. “Ithu na pala tsüdila kuliya mehai” — isala pala tsüdila nsenthu keyishü ghena nye.

²⁴Anyi thola ma ketanla ma ghena kemehaiwa ketan nbha lalo, isala nyu kepa ghena kemehaiwa la sa tenlo.

²⁵Nthu kechükeza ghena mangla nkeüla nu asa kejeü pen wi pala tsüdila ya dsaya mehai.

²⁶ Kepaghenanye Ntsawajüh na khiben, “Ayyi nu ciwi kebenthu pala tsüdila Apvüwa ji.”

²⁷Keujüla nkenondi nyi kesü na gho dsajjülo nthu ci, nu nthu na wale südheya lethu, nthu kechükeza ghena mangla nkeüla nu mangwa pi nthu tuwi chicü khe tsü dsayalo.

²⁸Isala keujüla anyi kesü na nthu wi “Ha atsikezhüthu kekinyi tsse le” kiza lethu, anyi nthu kekizawa ghena nu kechükeza ghena tsü ndsa lalo—

²⁹tsüwa tsüna nthu kechükeza tsü nye, isala anyi kepathu kechükeza. Pahan na keüben, “Isathu, mangkesa na anyi kepa wi kechükeza ghena hi kekhenkeghe nkemiwa tsü sa meyala ben nu?

³⁰Keujüla hi kedsakejjü ghena Anyiza seng lethu, mangkesa na nyu kepa na hi keseng pi cü keten kedsakejjü tsü then ben nu?”

³¹Tsalina nthu katsüha sa lela, nthu dsa le jjü lela, tsüdi wi la Anyiza nyankethang ghena salo.

³²Judah nyithu, Judah nyi nkenyethu, nyelela Anyiza kemehu len kekhenwa tsü nsala hanglo.

³³Hi kekuli hati salo; hi kekuli tsüdi wila anyi tsüdi kenenwa tsü sa, mathu hangsha yale kesalina ighena kemehaiwa nmeshenla tsüdi ghena kemehaiwa tsü sa.