Read Northern Rengma Naga 1 KORINTHNYI 14 Bible Online

1 KORINTHNYI 14 - Northern Rengma Naga bible

1 KORINTHNYI 14

¹Tsalina nthu nanketizen tsü meshenki bentenlo. Aghamulen wi ajuthu tsü nmvuthi sa nu tsüdi miwi la Anyiza ketsijüh kekhi tsü ya mvuthi salo.

²Anyi kesü ajüh ketheü khi kebenwa tsüna anyi wi nyela Anyiza ccüneng ben, kepaghenanye anyi thola ma jüh tsü nchü. Ma Aghamu kekhang wina kekuthi tsentsawa tsü khiben.

³Isala anyi kesü Anyiza ketsijüh khi kebenwa tsüna anyithu wi khiben, nu tsüna mathu kiqa, kechü-kenong, nu leben satecca cüben.

⁴Anyi ajüh ketheü khi kebenwa tsüna ma ketanla ma kiqaben, isala Anyiza ketsijüh khi kebenwa tsüna kemehu tsüdi kiqaben.

⁵Hi nthu tsüdi yala ajüh ketheü khi thsü mvuben, isala tsü miwi nthu tsüdila Anyiza ketsijüh khithu tsüwa hi nenben. Kepaghenanye anyi kesü ciwi ben nu ajüh ketheü khi keben jjügi tsü khimetha pi kemehu tsüdi kiza nu kekiyi mu meya thsü lethu, anyi Anyiza ketsijüh khi kebenwa tsüna ajüh ketheü khi kebenwa miwi ma men ben.

⁶Tsalina icünyuthu, hi nthu wi kegho wi Anyiza wina ccücakechi, nyelela palakechü, nyelela ketsijüh, nyelela kesansijüh sen nu nghola nthu wi ajüh ketheü khi lethu, hi nthu ghena kekiyi mangwa ben nu?

⁷Keujüla kahangli nkemi akhwi kesa ji achünong nyelela harp, tsüthu khou keben wi ma hhai methasi sashi nchi lethu, thowa na tsü chüya mehai nu?

⁸Nu keujüla anyi tutuwa khou kebenwa na mehaitsü khoushi nchi lethu, thowa na aghi ghena kidenya mehai nu?

⁹Tsü makesü, keujüla nthu na ajüh ketheü kekhi wi ketsijüh tsü methasi nsa lethu, thowa na tsü jjügi chüya mehai nu? Nthu jüh tsüna ma men nkemi saben.

¹⁰Ayyi wi ajühjja kepapa kesa kejonla ben, isala tsüthu kesütanla ajjügi nkemi nmi.

¹¹Isala keujüla hi ajühkhi keben tsü nchü lethu, anyi ajühkhi kebenwa na ituwi asang kesü sa, nu hi la ma tuwi asang kesü saben.

¹²Nthu na tsüdi miwi la Aghamu juthu tsü ya mvu keten ghena nthu na pala kepa miwi la tsüthu sen kayi pi kemehuwa tsü kiqa cülo.

¹³Tsalina ajüh ketheü khi kebenwa na ma khi keben jjügi khimethaya kemehai kekhang khie meyathu yishü.

¹⁴Kepaghenanye keujüla hi ajüh ketheü wina kekhie sa lethu, ighamu na ntsakhiwa kekhie saben, isala hi kemeshen tsü ciwi nmi.

¹⁵Isathu, hi khati sa nu? Hi ighamu wi akhwi saten nu hi kemeshen wi la kekhie saden; hi ighamu wi nu hi kemeshen wi la akhwi saden.

¹⁶Nthu na aghamu wi ketan keseng pi Anyiza cü lethu, khati nu anyi jümu kesü nthu jawi kebenwa tsü na nthu keseng kekhie kesa wi gweghe “Amen” khiya mehai nu? Ma nthu na mangwa khiben khe chükeya len nmi.

¹⁷Nthu na Anyiza wi kekhie tsü mehai ntsa sa lela anyi kepathu ghena tsü kekiyi mangla nmiladha.

¹⁸Hi nthu tsüdi miwi la jiki ajüh ketheü khi keten ghena Anyiza seng ben.

¹⁹Isala hi kemehujjen wi kekinyi kesa wi nyu sansile kesalina ajüh ketheü hazar tagha kekhiwa nyela kechü jüh manga ketan khiben.

²⁰Icünyuthu, nthu kemeshen wi ghanyithu ti nsa lalo; nkemehai wi ghanyithu ti sa, isala nthu kemeshen wi tsü anyi kezügü ti sayalo.

²¹ Ntsawajüh wi hati zhü theng, “Apvüwa na khiben, hi anyithu pang wina ajüh ketheü khi pi inyithu ccüneng den, hi asangthu pang wina khiben, isalela inyithu na ijüh kina nben.”

²²Tsalina ajüh ketheü kekhi hana nkenondithu ghena azensu kesü khe kenondithu ghena nye; isala Anyiza ketsijüh kekhi tsüna kenondithu ghena khe nkenondithu ghena nye.

²³Tsalina keujüla kemehu nyi tsüdi gho saghuya nu kesüsü tsüdila ajüh ketheü khi wa, nu keujüla anyi jümu nyelela nkenondithu pahan na dugho lethu, mathu na nthu tsüdila deja benle khi nben kwe?

²⁴Isala keujüla tsüdila Anyiza ketsijüh khi keben wi nkenondi nyelela anyi jümu na dugho lethu, ma tsü zakeya wi ma kesami chüshi yaben. Ma za keyathu tsüdi pi ma ghan-nan ben,

²⁵ma kekuthi kemeshen tsüdila khishiaben, nu ma akhhutsüdu Anyiza kinyi nu khishiben, “Ntsakhiwa, Anyiza na he wi nthu jawi ben le!”

²⁶Icünyuthu, hi khi keben jjügi na ha. Nthu na kinyile gho saghu keya wi meshu kesü na akhwi ben, kesü na kesansijüh ben, kesü na Anyiza wina pi ccücakechi ben, kesü na ajüh ketheü kekhi ben, nu kepa na tsü khimethakeya ben. Tsüdi wila kemehu ghena kemehaiwa nsathu yishü.

²⁷Keujüla anyi pahan na ajüh ketheü khiben lethu, matsü kesü wi meshu keni nu kecheng ketan kesenniela khi thsü, nu anyi kesü yala tsü jjügi nkhi thsüthu yishü.

²⁸Isala keujüla ciwi anyi kesüla tsü jjügi khikeya nmi lethu, ajüh ketheü khi kebenwa la ccen ben nu ma ketanla ma nu Anyiza ccüneng wa thsü nsathu yishü.

²⁹Meshu keni nu kecheng na Anyiza ketsijüh khi, nu nyu kepathu na mathu jühkekhi tsü ghan-nan thsü.

³⁰Isala keujüla ciwi donki keben pahan na Anyiza wi ketsijüh muya lethu, ajühkhi kebenwa la ngan wa.

³¹Kepaghenanye nthu tsüdila kesüsü na Anyiza ketsijüh khi nu anyi tsüdila zaya nu chüya thsüle kesalina.

³²Anyiza ketsijüh kekhi juwa tsüna ajühkhi kebenwa kekhu wi nbenthu yishü,

³³kepaghenanye Anyiza na kekivvü Nyiza nye isala keccawa tsü. Anyiza kemehu nyithu tsüdi wi sa keben tsüti,

³⁴nzathu na kemehujjen wi ccen keben-u. Mathu na ajüh njaji thsüla; isala Judah Yenwa wi khi keben ti mathu na nyu kekhu wi benlo.

³⁵Keujüla mathu na pala pahan chüya mvu ben lethu, ajjen wi mathu wubathu wi keüyalo. Nza kesü na kemehujjen wi ajüh kejaji tsüna kejüghe kesüle.

³⁶Nyelela nthu wina Anyiza jüh tsüna shhugho kwe? Nyelela tsüna nthu ghena ketan gho kwe?

³⁷Keujüla meshu kesü ma Anyiza nyilo le nyelela aghamulen wi ajuthu pvüten le sa lethu, ma hi zhü pi nthu wi chi keben hana Apvüwa yenkhukechi le kesa nchüthu yishü.

³⁸Isala keujüla ma ha nkina mvu lethu, ma jüh nkina lalo.

³⁹Isalethu, icünyuthu, nthu leben wi Anyiza ketsijüh tsü khile meshenki salo, isala ajüh ketheü kekhi tsü nkhenla.

⁴⁰Pala tsüdi wila sa jiketsü nu mayenwa wina nsathu yishü.