Read Northern Rengma Naga 1 KORINTHNYI 15 Bible Online

1 KORINTHNYI 15 - Northern Rengma Naga bible

1 KORINTHNYI 15

¹Icünyuthu, hi khili Jühtheü Kemehaiwa hi pi nthu sansi nu nthu na tsü yaya nu tsü miwi na nthu kenondi zükeqhe kebenwa tsü pi nthu kiza neng chi mvu ben.

²Tsüwa tsüna hi Ajühkemehaiwa ketsijüh pi nthu kesansiwa tsü. Keujüla nthu na zükeqhe tsü ghansen nu nthu kenondi tsü pi ma men nkemi nsa lethu, nthu hangsha yaben.

³ Hi mukeya ti pi nthu wi kiza, nu tsüna aghuti ntsawa: Ntsawajüh wi zhü ketheng ti Khrista na ithu kesami ghena shü;

⁴ Ntsawajüh wi zhü ketheng ti ma pi vhüa nu kecheng ghanan seng wi ma sa pi hang shagha thsüa;

⁵ ma Pitor tu wi gho nu tsaseng wi apostelthu taghakeni tsüdi tu wi gho.

⁶Tsaseng wi ma kutitan na ma senkeniethu meza manga gilli tu wi gho, mathu pahan na shüdha, isala kejiwa na khili la hangben.

⁷Tsaseng wi ma James tu wi gho, nu tsaseng wi apostelthu tsüdi tu wi gho.

⁸ Asakhenwa ma hi atsathang ncenla pvüghakeya ti kesawa ha tuwi la gho.

⁹ Kepaghenanye hi apostelthu tsüdi jawi kizza ntsawa, hi pi apostel kesü lela nci qo, kepaghenanye hi Anyiza kemehu metenmesha.

¹⁰Isala Anyiza nanketizen wina hi hati saben, nu ma nanketizen pi hi kecü tsüna ma men nkemi nye. Tsü miwi la hi apostel kepathu miwi apiketsü sa kuli, tsüna ntsakhiwa hi kulikeya nye, isala Anyiza nanketizen na hi gweghe kuliben.

¹¹Tsalina tsüwa tsüna hi wina ghole mathu wina lela ithu tsüdila tsü pi sansiden, nu nthu na hawa ha nondiden.

¹²Khili ithu ketsijüh na keshü wina Khrista sa pi hang shagha thsüdha kesa pi sansiben, isathu khati nu nthu pahan na keshü wina hang shagha nbenle khiya mehai nu?

¹³Keujüla keshü wina hangneng-shagha nben lethu, tsü ma jjügi keshü wina Khrista sa pi hang nshagha thsü;

¹⁴nu keujüla keshü wina Khrista sa pi hang nshagha thsü lethu, ikhang na pi nyu sansi keten ha mang men la nmi, nu nthu kenondi tsü la mang men la nmi.

¹⁵Tsü miwi la ikhang na Anyiza na keshü wina Khrista sa pi hang cüle kekhi ghena nyu na ikhang Anyiza cüki milikemesa khibenle khia kesa; isala keujüla keshüthu na hang shagha nbenle kesa tsüna ntsakhiwa lethu, Anyiza na Khrista sa pi hangneng ncü.

¹⁶Kepaghenanye keshüthu na hang shagha nben lethu, Khrista la sa pi hang shagha thsü nkesa.

¹⁷Keujüla Khrista sa pi hang nshagha thsü lethu, nthu kenondi na kaghacang kesü nu nthu na khilila kejang wi benla kesa.

¹⁸Isalethu, Khrista wi shü kesathu la dedia kesa.

¹⁹Keujüla ithu Khrista kenondi hana kepa wi nmila kahang hawa ghena ketan kemehai lethu, [1] ithu na ayyi nyi tsüdi miwi la ketizen kesawa sa kesa.

²⁰Isala atsentsawa tsüna keshü wi jen kebenthu bi atuwa sala keshü wina Khrista sa pi hangya thsüdha.

²¹Kepaghenanye anyi kesü ghena keshü na gho kesa tsü makesü anyi kesü ghena keshü wi hang keshagha la ghodha.

²²Kepaghenanye anyi tsüdila Adam wina shü kesa tsü makesü Khrista wina sa pi kahang wi shaghaya thsüaben.

²³Isala tsüdila mehaitsü kesenniela shaghaben: Khrista na tsüdi wila atuwa; tsaseng wi Khrista kegho wi ma wi kebenthu.

²⁴Tsaseng wi asakhenwa na ghoben; Khrista na kekhang kesenthu, kekhang kebenthu, nu kekhangthu tsüdi miwi khang yaben, nu Kadiyyi pi Abawa Anyiza cüaben.

²⁵Kepaghenanye Anyiza na aghinyithu tsüdila chaya nu pi ma ccü kekhu wi npi kechi chu Khrista na kedi nsathu yishü.

²⁶Ghinyi asakhenwa yasa keten tsüna keshü.

²⁷ Kepaghenanye Ntsawajüh na khiben, “Anyiza na pala tsüdi pi Khrista ccü kekhu wi chidha.” Isala “pala tsüdi” kekhi tsüna pala tsüdi pi Khrista ccü kekhu wi kechiwa Anyiza ma pi ciwi saghu nben kesa chütiben.

²⁸Isala pala tsüdi pi Khrista ccü kekhu wi chi lethu, tsaseng wi Atsawa ma la ma ketanla ma pi pala tsüdi pi ma ccü kekhu wi kechiwa Anyiza kekhu wi chiaben; isanu Anyiza na tsüdi miwi kedi saben.

²⁹Anyithu na keshü mithon wi baptaiz sa kebenthu tsü khati saben nu? Mathu na kaghang mangwa sacen yale saben nu? Keujüla pahan na kekhi ti keshüthu na hang shagha nben lethu, mangkesa na anyi tsüthu na keshü mithon wi baptaiz saben nu?

³⁰Mangkesa na ikhang ketanla matsü tsüdi wi ikhang pi kemessi wi chiben ten nu?

³¹Icünyuthu, hi keshüthangla keshü metu benle! Hi nthu miwi kapvü ben, ithu kahang Apvüwa Jisu Khrista wi keben ghena hi ha khishiben.

³² Keujüla hi asajjü wi kaghang ketan ghena Efesa wi “aghangsa nkemehaithu” ssikaghashen lethu, hi kekiyi mangwa ben nu? Isala keujüla keshüthu na hang shagha nben lethu, hati khi keben ti, “Ithu dhitsü wi shü wa keben ghena dsa nu jjü nalo.”

³³Nyu ya nthu nmechu thsüla, “Kegweghethu nkemehai na ayencüki kemehai yasaden.”

³⁴Nthu leben metsashhu sa nengya nu nsamila yilo. Kepaghenanye nthu pahan na Anyiza npi chüyale, hi ha khi pi nthu kejügheya thsüben.

³⁵Pahan na keüben, “Khati keshü na hang shagha ben nu? Mathu agwo khati kesa pvüben nu?”

³⁶Nthu kejüphon! Nthu na palacü pi ayyi wi yang kechi wi tsüna shü nkesa tsü hang shagha nten.

³⁷Nu nthu pi yang kechiwa tsüna asu nyelela pala kepa wi cü kesü sabenla metsi khe nthu na maton pi sheng nchi.

³⁸Anyiza na ma kemeshen wina palacü tsü pi maton sa cüden; nu ma palacü kesüsü kenie wina maton sa cüden.

³⁹Nu kahangli kebenthu sajjü tsüdila makesü nye; anyi sajjü kepa, aghangsathu sajjü kepa, awathu sajjü kepa, nu anga sajjü kepa.

⁴⁰Nu ciwi tang wi gwothu nu ayyi wi gwothu ben; tang wi gwothu tsikemehai nu ayyi wi gwothu tsikemehai kepapa.

⁴¹Aghani tsikemehai kepa, asha tsikemehai kepa, nu ghotsithu tsikemehai kepa; nu ghotsithu jawi lela tsikemehai kepapa na ben.

⁴²Keshüthu na hangneng-keshagha wi hati saben. Agwo pi vhü kesawa tsüna shüden; hang shagha lethu, tsüna shü nben.

⁴³Pi vhü kesa wi tsüna atsi nmehai nu nzü; hang shagha lethu, tsüna atsimehai nu zü yaben.

⁴⁴Pi vhü kesawa tsüna agwo sajjü; hang shagha lethu, tsüna aghamulen wi gwo saben. Keujüla agwo sajjü ben lethu, ciwi aghamulen wi gwo benben.

⁴⁵ Kepaghenanye Ntsawajüh na khiben, “Anyi atuwa, Adam tsüna kahangli keben kesü sahangchi”; isala Adam sakhenwa na kahang khukechiwa Aghamu.

⁴⁶Aghamulen wi atuwa nye, isala agwo sajjü, nu tsaseng aghamulen wi.

⁴⁷Adam atuwa tsüna ayyi pi zhü, nu ayyi wina shhugho; Adam keniwa tsüna tang wi na gho.

⁴⁸Anyi thothu na ayyiwa ji sa khe ayyi pi zhü kechiwa tsüti kesa; thothu na tang wi ji sa khe tang wi na keghowa tsüti kesa.

⁴⁹Ithu na anyi ayyi pi kezhüwa tsi ti kesa pvü keten tsüti anyi tang wi na keghowa tsi ti la pvü yaben.

⁵⁰1cünyuthu, hi khi kebenwa na asa nu ajjü hana Anyiza Kadiyyi ghongya nben, nu shü ketenwa tsüna shü nketenwa tsü pvüya nben.

⁵¹ Kekuthi tsentsawa ha kinachilo: ithu tsüdila shü nben, isala khathansha wi tutuwa sakhen tsü khou chi khe ithu tsüdila wan anyon kekama kesü jüwi kemiliaben. Kepaghenanye khathansha wi tutuwa sakhen tsü khou chi khe keshü na hang shagha nu khiela shü neng nben, nu ithu tsüdila kemiliaben.

⁵²

⁵³Kepaghenanye dedi ketenwa ha kemili pi dedi nketenwa sa, nu shü ketenwa ha kemili pi shü nketenwa sa nsathu yishü.

⁵⁴ Tsalina khathansha wi hati sa, nu shü ketenwa ha kemili pi shü nketenwa saya khe Ntsawajüh kekhi tsü cenyaben:

⁵⁵ “O keshü, no khangkeya khie nu? O keshü, no nyu patena ya kemehai kekhang tsü khie wi ben nu?

⁵⁶Keshü na kesami wi kekhang muya den, nu kesami na Ayenwa wi kekhang muya den.

⁵⁷Isala ithu Pvüwa Jisu Khrista wina kekhang pi ithu kecüwa Anyiza seng ben.

⁵⁸Tsalina hi ketizen icünyuthu, kiden-kesha nu zükeqhe ngan benlo. keshüthangla nthu Apvüwa kekuli kesa wi dhamang benlo, kepaghenanye nthu na Apvüwa kekuli kesa wi ma men nmi nsa kesa nthu na chüben.