Read Northern Rengma Naga 1 KORINTHNYI 16 Bible Online

1 KORINTHNYI 16 - Northern Rengma Naga bible

1 KORINTHNYI 16

¹ Khili nthu na Judea wi Anyiza nyithu ghena apisa khukechi cüki zhükechi tsü khi waden. Nthu na hi Galatia kemehuthu wi kekiza tsü nsathu yishü.

²Nthu tsüdila Apvüwa tsathang kaghapenla nthu apisa mukeya qei wina pahan pi theng lalo, isathu hi kegho wi nthu apisa nsaghula mehai.

³Hi gho lethu nthu na kessi ketheng anyithu tsü ghena lesü zhüchi nu mathu kesun pi nthu na keben khukechi tsü sen nu Jerusalem wi wa thsüben.

⁴Keujüla hi la kewa-u sa lethu, hi mathu gweghe waben.

⁵ Hi Macedonia hhainan wa keculi ccüla nthu wi ghoden, kepaghenanye hi Macedonia hhainan nwathu yishüben.

⁶Hi matsü pahan, saya mehaithu pathsü chuli nthu gweghe benla mechü, isanu tsaseng wi hi kijünyi khiewa waten khe nthu yala hi kiqa thsüden.

⁷Hi kewalen sala nthu hhainan mele ketan sa mvu nben; Apvüwa kemeshen ti lethu, hi matsü kesie nthu gweghe benden.

⁸ Hi Pentekost tsathang npi kecu chu he Efesa wi benden.

⁹ Kepaghenanye he wi hi keshun nyi na kejon ben lela kekuli keti nu kemehai sa keya matsü na ben.

¹⁰ Keujüla Timothi na nthu wi gho lethu, nthu nonkeghe sala ma ssiyalo, kepaghenanye ma la hi ti Apvüwa kekuli saden.

¹¹Thola ma n-nansala, isala ma kiqa pi ma yala mehaitsü hi wi gho thsülo; kepaghenanye ma acünyuthu pahan ssi nu hi wi ghoben kesa nondiben.

¹²Hi ithu cünyuwa Apollo na acünyuthu pahan ssi wa nthu hhainan chilo ma kechü-kenong benden, isala ma hajü wale kesa tsü ma kemeshen nsa laben. Isala matsü kemehai muya lethu, ma ghaben.

¹³Meghe-metsa ben, kenondi wi zükeqhe nganya, kempvüza sa nu zükeqhe benya.

¹⁴Nthu kekuli tsüdi wi nanketizen wina salo.

¹⁵ Nthu na Stefana nu ma theghi cüki chüben; mathu na Akhaya yyi wi Khristanyi sakeya atuwa nu mathu tsü tsüdi pi Anyiza nyithu ghena kuli ketenthu. Icünyuthu, hi nthu wi khieben,

¹⁶anyi hathu ccülikesa kekhu wi ben, nu mathu gweghe kekuli sa ketenthu jüh kinalo.

¹⁷Hi Stefana, Fortunata, nu Akhaika mathu kegho ghena inonghe ben; kepaghenanye mathu na nthu nkemiwa tsü sacü,

¹⁸nu nthu sa pi anonghe kecü ti hi sa pi anonghe cüdha. Tsalina anyi hathu ha kechü-u le!

¹⁹ Asia yyi wi kemehuthu na nthu shalom saben; Aquila nu Piskilla nu manyi jjen wi kemehu nyithu na Apvüwa nyan wina nthu shalom saben.

²⁰He wi acünyuthu tsüdila nthu shalom saben. Kemetha kekimangli wina khokho shalom satenlo.

²¹Hi Paul ikwen pi ha zhü pi nthu shalom saben.

²²Thowa na Apvüwa tizen nten khe kishen-keshi ma miwi benlo! Marana tha — Ithu Pvüwa, gholo!

²³Apvüwa Jisu nanketizen ya nthu ssiben ketenwa salo.

²⁴Jisu Khrista wi hi ketizen yala nthu tsüdi ssiben ketenwa salo.