Read Northern Rengma Naga 1 KORINTHNYI 2 Bible Online

1 KORINTHNYI 2 - Northern Rengma Naga bible

1 KORINTHNYI 2

¹Icünyuthu, hi kemetsa nu ajühkhi kemehai sen nu Anyiza cüki kekuthi tsentsawa tsü khile kesa ghena nthu wi nghole!

²Kepaghenanye hi nthu jawi keben wi Jisu Khrista nu ma pi kross miwi kejen cüki ketan khe kepa wi mangla chüyale nsa.

³ Tsalina hi kekhang nmila messi pi kedheggü sen nu nthu jawi gho,

⁴nu hi kesansijüh nu ketsijühthu tsüna anyi kemetsa jüh wina nye, isala Anyiza Ghamu kekhang keben chüti kesa pi ccüca chi.

⁵Tsalina nthu kenondi na anyi kemetsa miwi nyela Anyiza kekhang miwi ben.

⁶Isala hi aghamulen wi kezügüthu wi ketan kemetsa jüh khiden. Kemetsa jüh hana ayyi nyi kemetsa nyelela ayyi ha wi kekhang kesenthu kekhang — mathu kekhang bhatagha keten kekhangwa tsü nye.

⁷Hi kemetsa jüh pi kekhi tsüna Anyiza wi kekuthi kemetsa pi anyi tuwi kuthi ketheng, isala ayyi npi kesachi wina Anyiza na ithu nyankethang ghena kiden ketheng tsüle.

⁸Ayyi ha wi kekhang kesenthu kesütanla kemetsa hawa ha nchü. Keujüla mathu ha chü lethu mathu na Apvüwa nyankethangwa tsü pi kross miwi jen nkesa.

⁹ Isala Ntsawajüh na kekhi tsüti, “Anyi thola mu nu za nketen, nu anyi thola aleben pi meshenya nketen, ha Anyiza na ma tizen ketenthu ghena kiden ketheng tsü.”

¹⁰Isala Anyiza na ma Ghamu wina kekuthi tsü sa pi ithu ya chüya thsü. Kepaghenanye Aghamu tsüna pala tsüdila, Anyiza kemeshen kedhu tsü lela bhashiyaden.

¹¹Anyi kesü ghamu ma non wi kebenwa tsü ketan ma cüki tsüdi chüben; tsü makesü Anyiza Ghamu ketan Anyiza cüki tsüdi chüben.

¹²Ithu na ayyi hawa wi ghamu mu meya, isala Anyiza na pi ithu kecü tsüdila chüya thsüle kesalina Anyiza na kesun kechi Aghamu tsü muyadha.

¹³Tsalina ikhang na ajüh ha anyi kemetsa pi kesansijüh wina khi nben, isala Aghamu na pi kesansijüh wina khiben, ikhang na aghamulen wi atsentsawa tsü khi pi Aghamu kepvüthu kizaden.

¹⁴Anyi thowa na Aghamu npvü khe Anyiza Ghamu ju khukechithu tsü yaya nten. Anyi tsüti kesawa na ntsakhiwa tsüthu chüshiya nben; tsüthu na ma ghena kejüphon jüh, kepaghenanye tsüthu men keben tsüna aghamulen wi ketan ghan-nanya mehai.

¹⁵Isala anyi thowa na Aghamu pvüten khe pala tsüdi men keben tsü ghanya mehai, isala anyi thola ma ghanya nben.

¹⁶ Ntsawajüh na kekhi ti, “Thowa na Apvüwa kemeshen chüben nu? Thowa na ma sansiya mehai nu?” Isala ithu na Khrista kemeshenwa tsü ben.